បុរស និងស្ត្រីសុទ្ធតែមានគម្រោងអនាគតរៀងខ្លួន។ ពួកគេមួយចំនួនអាចនឹងពេញចិត្តនូវជីវិតដែលមានដៃគូរ ខណៈអ្នកមួយចំនួនបែរជាសប្បាយចិត្តនៅពេលនៅម្នាក់ឯង ហើយអន់ចិត្តពេលមានគេជម្រុញឲ្យមានគ្រួសារ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខាងក្រោមនេះ ជាចំណុចខ្លះៗដែលអ្នកជួបប្រទះពេលនៅម្នាក់ឯង៖
១. ញ៉ាំអ្វីក៏បាន៖
ពេលនៅម្នាក់ឯង អ្នកមានភាពឯករាជ្យពេញលេញលើចំណួលចិត្តនៃអាហារ។ អ្នកមិនចាំបាច់បារម្ភថា ធ្វើម្ហូបនេះ ឬម្ហូបនោះដើម្បីផ្គាប់ចិត្តនរណា។ អ្នកអាចធ្វើម្ហូបខ្លួនឯង រឺចេញទៅញ៉ាំខាងក្រៅក៏បាន។
២. ទៅណាមិនបាច់មានគម្រោង៖
កម្មវិធីខ្លះ អ្នកមិនបានត្រៀមក៏ដោយ តែក៏អាចទៅបានដោយមិនបាច់ត្រូវជជែកវែកញែកជាមួយអ្នកណា។ គ្មានអ្នកប្រចណ្ឌ ឬរំខានអារម្មណ៍អ្នក។ ត្រូវទៅវិស្សមកាលជាមួយគ្រួសារ ឬមិត្ត អ្នកអាចទៅបានដោយគ្មានសម្ពាធ។
៣. គ្មានអ្នកកុហក៖
អ្នកមិនចាំបាច់រស់នៅក្នុងពិភពនៃការកុហក។ អ្នកមានម្ចាស់ការគ្រប់គ្រាន់ មិនស្មុគស្មាញ។ បើធ្វើអ្វីមួយកើត អ្នកធ្វើវាដោយខ្លួនឯង។ បើធ្វើមិនកើត ក៏រកជំនួយ ដោយមិនបាច់នៅរារែកចិត្តថា គេថាមិនអាចមកទទួលយើងទៅញ៉ាំអីបាន ព្រោះរវល់ ម្នាក់នោះនិយាយពិត រឺអត់?
៤. គ្រែគេងផ្តាច់មុខ៖
គេង អង្គុយ លោតលើគ្រែគេង អ្នកមិនបាច់បារម្ភ។ មានសណ្តាប់ធ្នាប់ខ្លះ មិនមានខ្លះ តែវាជាជីវិតរបស់អ្នក ដោយមិនចាំបាច់ត្រូវមកបារម្ភថា ភ្លេចរៀបកន្លែងគេងឲ្យស្អាតសម្រាប់គេម្នាក់នោះ។
៥. ធ្វើជាខ្លួនឯង៖
វានឹងពិបាកបំផុត បើអត្តចរិតរបស់យើងត្រូវសំដែងពីមុខនរណាម្នាក់ ក្រោមហេតុផលណាមួយ។ ឥរិយាបថ ការនិយាយ ការសើចដោយគ្មានសម្ពាធ ជាអ្វីដែលគ្រប់គ្នាចង់បាន។ នៅលីវអ្នកអាចធ្វើជាអ្នកបានគ្រប់ពេល មិនបាច់ត្រូវពិចារណារឿងស្លៀកពាក់បែបម៉េចឲ្យគេកាន់តែស្រលាញ់?
៦. ឯករាជ្យរឿងលុយកាក់៖
ប្រាក់ខែ ដែលអ្នករកបាន អ្នកអាចចំណាយដោយមានសេរីភាព។ អ្នកអាចសន្សំ ជូនមនុស្សជាទីស្រលាញ់ ឬធ្វើអ្វីក៏បាន។ មិនចាំបាច់ត្រូវគិត រឿងទិញអលង្ការបន្តិចបន្តួច ឬសម្លៀកបំពាក់ថ្មីក៏ត្រូវប្រាប់គេគ្រប់ពេលនោះទេ។
៧. មនុស្សថ្មីចូលក្នុងជីវិត៖
អ្នកមិនបារម្ភខ្លាចថា ពេលស្គាល់មនុស្សថ្មីៗ តិចមានអ្នកប្រចណ្ឌ រករឿង។ អ្នកអាចបង្កើតមិត្តភាព ដោយមិនមានអារម្មណ៍ភ័យខ្លាច។ ខ្លួនមួយ អ្នកមិនសូវខ្វាយខ្វល់ច្រើនពីការជំពាក់វាក់វិននឹងសម្ព័ន្ជភាព និងមិនចាំបាច់ខូចចិត្តឡើយ។
ទាំងនេះជាចំណុចខ្លះៗដែលអ្នកនៅលីវជួបប្រទះ។ អ្នកអាចពិចារណាទៅតាមខួរក្បាល និងបេះដូងបាន ថាតើជីវិតនៅលីវជាជម្រើសល្អរឺទេ?