ដាណឺម៉ាក៖ ក្រុមអ្នកវិទ្យាសាស្ត្របានរកឃើញជ័រកៅស៊ូដែលជាប្រភេទជ័រឈើមួយប្រភេទដែលត្រូវបានក្មេងស្រីនៅក្នុងយុគថ្មរំលីងទំពារតាំងពី៦,០០០ឆ្នាំមុន ហើយនៅលើជ័រកៅស៊ូនោះនៅមានជាប់ស្នាមធ្មេញរបស់នាងដែលអាចឲ្យក្រុមអ្នកវិទ្យាសាស្ត្រធ្វើក្រមពន្ធុបាន។ ក្រុមអ្នកស្រាវជ្រាវបានលើកឡើងថាវាជាលើកទី១ហើយដែលបណ្ដុំពន្ធុត្រូវបានយកចេញពីអ្វីផ្សេងក្រៅពីឆ្អឹងឬធ្មេញមនុស្សបុរាណដែលតែងតែត្រូវបានគេសិក្សាកន្លងមក។ បន្ទាប់ពីធ្វើក្រមពន្ធុរួចមក ជាលទ្ធផលគេអាចដឹងថាក្មេងស្រីម្នាក់នោះទំនងជាមានស្បែកខ្មៅ សក់ពណ៌ត្នោត និងភ្នែកពណ៌ខៀវ ហើយវិចិត្រករម្នាក់បានគូររូបភាពរបស់នាងចេញមកដោយផ្អែកតាមលទ្ធផលដែលបានរកឃើញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកបណ្ឌិត Hannes Schroeder មកពីសាកលវិទ្យាល័យ Copenhagen បាននិយាយថាជ័រឈើមួយដុំដែលត្រូវបានក្មេងស្រីបុរាណនោះទំពារពិតជាប្រភពដ៏មានតម្លៃបំផុតសម្រាប់ការធ្វើតេស្តឌី.អិន.អេដើម្បីស្វែងរកនិងសិក្សាពូជពង្សរបស់មនុស្សកាលពីសម័យមុន។ ពន្ធុ(ហ្សែន)របស់នាងទំនងជាមានទំនាក់ទំនងយ៉ាងជិតស្និទ្ធិជាមួយក្រុមអ្នកប្រមាញ់មកពីអឺរ៉ុបដីគោកជាងអ្នកដែលរស់នៅតំបន់ Scandinavia កណ្ដាលនាពេលនោះ ពីព្រោះក្រុមអ្នកប្រមាញ់ទាំងនោះមានស្បែកខ្មៅ សក់ពណ៌ត្នោត និងភ្នែកពណ៌ខៀវដែរ។
ក្រុមអ្នកស្រាវជ្រាវបានបង្ហើបឲ្យដឹងទៀតថាព័ត៌មានដែលបានមកពីពន្ធុនោះអាចប្រាប់យើងពីពូជពង្ស ជីវភាព និងសុខភាពរបស់មនុស្សនោះ។ បន្ទាប់ពីការសិក្សាធ្វើឡើងដោយជោគជ័យ ក្រុមអ្នកស្រាវជ្រាវបានដាក់ឈ្មោះឲ្យក្មេងស្រីម្នាក់នោះថាឡូឡា៕