ខឹង​ឪពុក​ម្តាយ​ស្តីបន្ទោស​ជិះ​កង់​ចេញពី​ផ្ទះ​នៅ​ខេត្ត​កំពង់ចាម មកដល់​ទី​ក្រុងភ្នំពេញ

រាជធានីភ្នំពេញ ៖ នារីវ័យក្មេងឈ្មោះហេង ស្រីពៅ អាយុ១៧ឆ្នាំ មានទីលំនៅ ភូមិត្រពាំងបឹង ឃុំថ្មពួន ស្រុកព្រៃឈរ ខេត្តកំពង់ចាម បានប្រាប់ថា នាងខឹងឪពុកម្តាយ របស់នាងចេះតែស្តីបន្ទោស រាល់ថ្ងៃពេក បានជិះកង់ចេញពីផ្ទះ មកដេកនៅលើសួនច្បារ ខេត្តកំពង់ចាម មួយយប់រួចជិះបន្ត រហូតមកដល់ក្រុងភ្នំពេញ មិនដឹងទៅណាបន្តទៀត ក៏ឈប់កង់អង្គុយ យំនៅមុខវិមានសន្តិភាព តាមមហាវិថីសហព័ន្ធរុស្ស៊ី សង្កាត់ស្រះចក ខណ្ឌដូនពេញ បង្កឱ្យមានការភ្ញាក់ផ្អើល វេលាម៉ោង៩និង៣០នាទី យប់ថ្ងៃទី១៣ មីនា ។

តាមការរៀបរាប់ របស់ក្មេងស្រី ហេង ស្រីពៅ បានឱ្យដឹងថា នាងមានឪពុកឈ្មោះទុយ រ៉េន អាយុ៤៧ឆ្នាំ ម្តាយឈ្មោះឈាង សុវណ្ណា អាយុ៤៣ឆ្នាំ ជាអ្នកលក់ខោអាវជជុះ។ ដោយសារតែនាង ខឹងឪពុកម្តាយចេះតែ ស្តីបន្ទោសជារៀងរាល់ថ្ងៃពេក ទើបនៅវេលាម៉ោង៧យប់ថ្ងៃទី១២ មីនា នាងបានជិះកង់ចេញ ពីផ្ទះមកដល់ទីរួមខេត្តកំពង់ចាម បានដេកនៅសួន ច្បារនោះមួយយប់ ។ លុះព្រឹកឡើងនៅថ្ងៃទី១៣ មីនា នាងមិនបានត្រឡប់ទៅផ្ទះវិញទេ បានជិះកង់ឆ្ពោះទៅទីក្រុងភ្នំពេញ ដោយជិះមកដល់មុខវិមាន សន្តិភាពនៅវេលាម៉ោង១២ថ្ងៃត្រង់ ហើយមិនដឹងទៅណាក៏ឈប់ អង្គុយយំនៅទីនោះ ៕

បញ្ចូលអត្ថបទ ៖ បុប្ផា កោះ

ផ្តល់សិទ្ធដោយ កោះសន្តិភាព