កុំចេះតែហ៊ាន តារាក៏វាយដែរ! ក្តៅៗ នាយចឺម ត្រូវប្រុសស្អាតម្នាក់ វាយបែកក្បាល ព្រោះឆាតញ៉ែសង្សារគេ

ប៉ៃលិន៖ ជារឿងមួយគួរឲ្យភ្ញាក់ផ្អើល កាលពីវេលាល្ងាច ថ្ងៃទី ១៨ ខែធ្នូ ឆ្នាំ២០១៩ ដោយមានករណីបុរសម្នាក់ បានវាយ តារាចម្រៀងប្រុស​ប្រចាំ ផលិតកម្ម សាន់ដេ នាយ​ចឺម យ៉ាងដំណំ រហូតមានឃើញឈាមហូរជោគពេញក្បាល។

តាមប្រភពព័ត៌មាន បានឲ្យដឹងថា បុរសដែលជាជនសង្ស័យ មានឈ្មោះថា ង៉ែត លីទី ភេទប្រុស អាយុ២២ឆ្នាំ មុខរបរ បុគ្គលិកក្រុមហ៊ុន រស់នៅភូមិផ្សារព្រំជើង ឃុំស្ទឹងកាច់ សាលាក្រៅ ខេត្តប៉ៃលិន​ ដោយជនសង្ស័យបានយកកំណាត់ឈើ មកវាយជនរងគ្រោះឈ្មោះ សុខ មេសា ហៅ នាយចឺម បណ្តាលឲ្យមានរងរបួសត្រង់កំភួនដៃទាំងសងខាង​ បែកក្បាលចំនួន៥ថ្នេ​រ និងបែកទូរស័ព្ទខ្ទេចមើលលែងយល់ផងដែរ។

ចំពោះមូលហេតុដែល បណ្តាលឲ្យជនសង្ស័យ បានវាយ ទៅកាន់ តារាចម្រៀងប្រុសរូបនេះ ដោយសារតែ រូបគេ​បានចោទប្រកាន់ថា នាយចឺម បានឆាតញ៉ែសង្សារគេ ធ្វើឲ្យកើតចិត្តប្រច័ណ្ឌយ៉ាងខ្លាំង រហូតឈានដល់ដំណាក់កាល វាយដំ យ៉ាងដូច្នេះ។ បច្ចុប្បន្នជនសង្ស័យត្រូវបានឃាត់ខ្លួន នៅអធិការដ្ឋាននគរបាលស្រុកសាលាក្រៅ ដើម្បីកសាងសំណុំរឿងបញ្ជូនទៅតុលាចាត់ការតាមនីតិវិធីច្បាប់៕

យ៉ាងណាមិញ ខណៈមកទល់ពេលនេះ នាយចឺម ក៏មិនទាន់បកស្រាយ​ច្រើននោះដែរ ជុំវិញដំណើរដើមទង ថាតើ មានរឿងអ្វីកើតឡើងខ្លះ ទម្រាំឈានដល់ ការប្រើអំពើហិង្សាបែបនេះ ចាំរង់ចាំតាមដាន​ជាមួយនឹងខ្មែរឡូតទាំងអស់គ្នា៕