បរទេស៖ ប្រជាជនភាគច្រើនដែលរស់នៅលើដែនកោះជាប់មហាសមុទ្រប៉ាស៊ីហ្វីករវាងឆ្នេរខាងត្បូងទ្វីបអាស៊ី និងអូស្ត្រាលីបានរស់នៅផ្ដាច់ខ្លួនចេញពីយុគសម័យឌីជីថល។ លោក Christian Patouraux ដែលជានាយកប្រតិបត្តិក្រុមហ៊ុនផ្កាយរណប Kacific បានថ្លែងប្រាប់សារព័ត៌មាន CNN ថាក្រុមហ៊ុនផ្គត់ផ្គង់បណ្ដាញសកលភាគច្រើនគិតថានៅតំបន់នោះប្រហែលមិនសូវមានមនុស្សរស់នៅច្រើន ឬមិនត្រូវការភ្ជាប់ទំនាក់ទំនងអ្វីទេ ហើយក្រុមហ៊ុនទាំងនោះមិនអាចស្វែងរកប្រាក់ចំណេញបានឡើយ ប៉ុន្តែលោក Patouraux មិនបានគិតដូច្នោះឡើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កាលពីល្ងាចថ្ងៃចន្ទរ៉ុកកែត SpaceX បានបញ្ជូនផ្កាយរណប Kacific ទៅទីអវកាស ហើយមិនយូរនោះទេប្រជាជនចំនួន១លាននាក់នៅលើដែនកោះទាំងនោះនឹងអាចភ្ជាប់ទំនាក់ទំនងជាមួយពិភពលោកបានហើយ។ ឧបសគ្គដ៏ធំបំផុតដែលរារាំងដំណើរការចែកចាយបណ្ដាញសកល ឬ អ៊ីនធឺណិតល្បឿនលឿនទៅកាន់តំបន់អាស៊ីប៉ាស៊ីហ្វីក គឺដោយសារសណ្ឋានដី ហើយខ្សែកាបអុបទិកដែលលាតសន្ធឹងក្រោមសមុទ្រអាត្លង់ទិកមានតម្លៃថ្លៃ។
ជាមួយគ្នានេះដែរសេវាកម្មចែកចាយបណ្ដាញសកលផ្ដល់ឲ្យតែតំបន់ទីប្រជុំជន ចំណែកតំបន់ជនបទមិនត្រូវបានគេអើពើ។ នៅក្នុងតំបន់អាស៊ីប៉ាស៊ីហ្វិកប្រជាជនប្រមាណ ៨០% រស់នៅក្នុងទីជនបទ ហើយបណ្ដាញទំនាក់ទំនងផ្សេងៗនៅមានការខ្វះខាត នេះបើយោងតាមការលើកឡើងរបស់លោក Patouraux។ ផ្កាយរណប Kacific-1 គឺជាផ្កាយរណបជំនាន់ថ្មីដែលមានសមត្ថភាពខ្ពស់ជាងផ្កាយរណបជំនាន់មុនៗ ហើយវាអាចកាត់បន្ថយការចំណាយបានយ៉ាងច្រើនទៀតផង។
ផ្កាយរណប Kacific-1 នឹងបញ្ជូនបណ្ដាញសកលទៅកាន់ស្ថានីយទទួលនៅលើដី រួចវានឹងចែកចាយបន្តទៅកាន់អង់តែនផ្សេងៗទៀត។ លោក Patouraux បាននិយាយថាការដំឡើងអង់តែនតាមផ្ទះនីមួយៗត្រូវចំណាយខ្ពស់ចាប់ពី ៥០០ ទៅ១,០០០ដុល្លារ ប៉ុន្តែការដំឡើងវានៅតំបន់សាលារៀន មន្ទីរពេទ្យ និងតំបន់ប្រជុំជនអាចឲ្យមនុស្សជាច្រើនបានប្រើប្រាស់បណ្ដាញសកល៕
Bong I.T