បរទេស៖ អង្គការអភិរក្សសត្វព្រៃអន្តរជាតិនិងក្រុមហ៊ុន Google បានរួមសហការគ្នានិងប្រើប្រាស់បច្ចេកវិទ្យាបញ្ញាសប្បនិម្មិត (AI) ដើម្បីឃ្លាំមើលនិងការពារសត្វព្រៃ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអង្គការ Wildlife Insights បានប្រើប្រាស់បច្ចេកវិទ្យា AI និង Google Cloud សម្រាប់រក្សាទុកទិន្នន័យដែលទាក់ទងនឹងសត្វព្រៃនៅលើពិភពលោក ហើយវាអាចតាមដាននិងឃ្លាំមើលសត្វព្រៃរហូតដល់៤.៥លានក្បាលដោយមិនរំខានឬប៉ះពាល់ដល់ការរស់នៅរបស់ពួកវាឡើយ។
លោក Tanya Birch មកពីក្រុមហ៊ុន Google និងលោក Jorge Ahumada មកពីក្រុមអភិរក្សសត្វព្រៃអន្តរជាតិបានសរសេរនៅលើប្លក់ (Blog) មួយស្ដីពីបច្ចេកវិទ្យាដ៏ទំនើបនេះថាជាមួយទិន្នន័យទាំងអស់នេះ អ្នកគ្រប់គ្រងនៅតំបន់គាំពារសត្វព្រៃឬតំបន់ប្រឆាំងនឹងការប្រមាញ់សត្វព្រៃខុសច្បាប់អាចពិនិត្យមើលសុខភាពរបស់សត្វព្រៃទាំងឡាយ ហើយចំណែករដ្ឋាភិបាលនៅក្នុងតំបន់អាចប្រើប្រាស់ទិន្នន័យទាំងអស់នេះសម្រាប់អភិវឌ្ឍន៍គោលនយោបាយនិងច្បាប់អភិរក្សសត្វព្រៃ។
នៅក្នុងកម្មវិធីនេះបានប្រើប្រាស់កាំមេរ៉ាយ៉ាងទំនើបដែលដាក់ពង្រាយជាច្រើនតំបន់នៅលើពិភពលោក ហើយកាំមេរ៉ាទាំងអស់នោះមានសមត្ថភាពផ្ដិតយករូបភាពសត្វព្រៃបានយ៉ាងជិត។ ដោយសារទិន្នន័យទាំងនេះបើកឲ្យប្រើប្រាស់ជាសាធារណៈ អ្នកអាចស្វែងរកមើលប្រភេទសត្វផ្សេងៗរួមទាំងប្រភេទសត្វដែលកម្របាននៅគ្រប់តំបន់ដែលកាមេរ៉ាបានដាក់ពង្រាយនិងផ្ដិតយកទិដ្ឋភាពនៅជុំវិញនោះ៕