បរទេស៖ ទោះបីរថយន្តស៊េរី GT-R របស់ក្រុមហ៊ុននីសាន់ (Nissan) ដាក់លក់នៅលើទីផ្សារអស់រយៈពេលជាច្រើនឆ្នាំទៅហើយក៏ដោយ ក៏វានៅតែជាផលិតផលមួយដែលមានការប្រកួតប្រជែង។ ទោះហាក់ដូចជាមិនមានម៉ូដែលថ្មីសម្រាប់ចេញនៅពេលអនាគតក្តី តែអ្នកដែលនៅចាប់ចិត្តនឹងវា នៅតែស្រមើស្រមៃនៃការរចនាម៉ូតពិសេសឡើងសម្រាប់ប្រភេទ GT-R50 សម្រាប់ទីផ្សារបច្ចុប្បន្ន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សគំនិតរចនាមួយ (Concept) ដែលសហការជាមួយក្រុមហ៊ុន Italdesign ត្រូវបានបំផុសគំនិតច្នៃប្រឌិតដ៏ទាក់ទាញដោយលោក Rain Prisk ដើម្បីចង់ប្រែក្លាយវាជារថយន្តទំនើបមួយគ្រឿងនេះឲ្យមើលទៅប្រកបដោយថាមពល។ គេអាចឃើញផ្នែកខាងមុខរចនាឡើងយ៉ាងពិសេស ជាមួយអំពូលភ្លើងស្រស់ប្រណីត ការច្នៃនិងការប្រើប្រាស់ពណ៌រួមជាមួយកង់ទាំងបួនពិតជាធ្វើបានយ៉ាងល្អ។ បើយើងក្រឡេកមើលទៅបន្ទះជាប់ទ្វារទាំងសងខាង គឺត្រូវបានគេរចនាឡើងដើម្បីអាចឱ្យខ្យល់ឆ្លងកាត់បាន ជាពិសេសជួយទប់លំនឹងរថយន្តបានល្អខណៈពេលយើងបើកបរក្នុងល្បឿនលឿន។
សាកធ្វើការគិតស្រមៃមើល បើ Concept នៃរថយន្តមួយគ្រឿងនេះពិតជាត្រូវរចនាឡើងដោយបំពាក់ជាមួយម៉ាស៊ីន កម្លាំង ៧១០ សេះ រួមជាមួយការបំពាក់បច្ចេកវិទ្យាទំនើបទៀតនោះ តើវានឹងល្អយ៉ាងណាទៅ? តែជាអកុសលសេចក្តីរាយការណ៍ថ្មីៗនេះបានឲ្យដឹងថាក្រុមហ៊ុន Nissan មិនមានផែនការបន្តផលិតស៊េរី GT-R របស់ខ្លួនទៀតទេ។
ក្រុមផលិតរថយន្តស៊េរី GT-R របស់ក្រុមហ៊ុន Nissan ដឹកនាំដោយលោក Hiroshi Tamura បានគិតថា រូបរាងរបស់រថយន្តបច្ចុប្បន្នមិនមានការផ្លាស់ប្តូរ ២០ឆ្នាំមកហើយ។ ដូច្នេះហើយសំរាប់គំរូ ឬគំនិតរចនាផ្សេងទៀត អាចនឹងត្រូវការផ្លាស់ប្តូរបន្តិចបន្តួចប៉ុណ្ណោះនៅរយៈពេល ៨ ឆ្នាំខាងមុខទៀត៕