ភ្នំពេញ៖ តើគួរតែមានការកែប្រែនៅទម្លាប់ ក៏ដូចជាផ្នត់គំនិតដ៏ខុសឆ្គង តាមជំនឿបុរាណដែលមានចំពោះម្តាយ និងទារកអស់ទាំងនេះចោលដែរឬទេ? ចំពោះឪពុកម្តាយគ្រប់រូបដែលត្រៀមនឹង ទទួលយកបុត្រថ្មីថ្មោង ស្ត្រីដែលត្រៀមនឹងសម្រាលបុត្រទាំងអស់ គួរតែមានចំណេះដឹងក៏ដូចជាមាន ការប្រុងប្រយ័ត្នខ្ពស់ទាក់ទងទៅនឹង ជំនឿក៏ដូចជាទម្លាប់តាមបែបចាស់ៗបុរាណ ដែលអាចធ្វើឲ្យប៉ះពាល់ក៏ដូចជា អាចបង្កឲ្យមានជាគ្រោះថ្នាក់ដល់ សុខភាពរបស់ម្តាយនិង ទារកដោយមិនដឹងខ្លួន។ ជំនឿមិនមែនសុទ្ធតែជារឿងអាក្រក់ទាំងអស់នោះទេ ផ្ទុយទៅវិញប្រសិនបើយើងជឿ លើជំនឿតៗគ្នាដោយងងឹតងងុលនោះ វាក៏អាចនឹងបង្កឲ្យមានជាហានិភ័យ មកកាន់យើង ដោយមិនដឹងខ្លួនវិញផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក វេជ្ជបណ្ឌិត ហ៊ាង រតនា ដែលមានឯកទេសខាងផ្នែកជំងឺទូទៅ បានចែករំលែក ចំណេះដឹងដែលទាក់ទងនឹង ទម្លាប់តាមបែបចាស់ៗ តែងតែមានតៗគ្នាចំពោះស្ត្រីដែល ទើបសម្រាលបុត្រហើយ ត្រូវឲ្យដេកអាំងភ្លើង ផឹកស្រាថ្នាំ ឬសង្កត់ថ្មជាដើមនេះ គឺពិតជាទម្លាប់មួយដែលផ្តល់ នូវផលប៉ះពាល់ដល់សុខភាពម្តាយយ៉ាងខ្លាំង ហើយមិនត្រឹមតែប៉ះពាល់ ដល់ម្តាយនោះទេ តែវាក៏អាចផ្តល់នៅផលប៉ះពាល់ដល់ សុខភាពរបស់ទារកផងដែរ។
ជាក់ស្តែងលោក វេជ្ជបណ្ឌិត រតនា ក៏បានបញ្ជាក់បន្ថែមទៀតថា ជាទូទៅនៅពេលដែលស្ត្រីទើបតែ សម្រាលកូនហើយថ្មីៗគឺ នៅមានសុខភាពខ្សោយជាងស្ត្រីធម្មតា ពីព្រោះគាត់ត្រូវពរពោះអស់រយៈពេលយូរ។ ម្យ៉ាងវិញទៀតអំឡុងពេលដែល សម្រាលត្រូវធ្លាក់ឈាមអស់ច្រើនថែមទៀត។ ដូច្នេះបន្ទាប់ពីសម្រាលហើយ ត្រូវសម្រាកឲ្យបានច្រើន ក៏ដូចជាត្រូវបរិភោគអាហារឲ្យបានគ្រប់គ្រាន់ ទើបអាចទៅបំពេញនៅកង្វះថាមពលដែល គាត់បានបាត់បង់ក្នុង អំឡុងពេលសម្រាលបាន។ ក៏ប៉ុន្តែតាមជំនឿក៏ដូចជាទម្លាប់ របស់ចាស់ៗបែរជាតម្រូវឲ្យស្រ្តី ដែលទើបសម្រាលកូនហើយតបអាហារ មិនហ៊ានឲ្យបរិភោគសាច់ឬ ប្រភេទបន្លែមួយចំនួន ក្នុងហេតុផលថាខ្លាចស្តី្រ ដែលទើបសម្រាលកូនហើយ បើបរិភោគអាហារទាំងនេះនឹង អាចនាំឲ្យទាស់ជាដើម-ល- ។ ជាហេតុដែលធ្វើឲ្យស្រ្តីកាន់តែកង្វះ នៅអាហារឧបត្ថម្ភ កាន់តែស្លេកស្លាំង ដែលពេលខ្លះអាចបង្កជាគ្រោះថ្នាក់ ដល់អាយុជីវិតទៀតផង។ តែជាការពិតបើយោងតាម ការបកស្រាយរបស់លោក វេជ្ជបណ្ឌិត រតនា ថាស្ត្រីដែលទើបតែសម្រាលបុត្រហើយ គឺអាចញុំាអាហារបានដូចជាមនុស្សធម្មតាដែរ តែជៀសវាងតែអាហារណាដែលជា ប្រភេទផ្អាប់ ក្រៀមក្រោះ ហឹល រួមទាំងស្រាតែប៉ុណ្ណោះ។
ម្យ៉ាងវិញទៀតចំពោះ ជំនឿដែលថាឲ្យស្ត្រីដែលទើបតែសម្រាលបុត្រហើយ ត្រូវផឹកស្រាព្រោះអាចជួយឲ្យសាច់ស្អាត ឬជួយឲ្យចេញទឹកដោះនេះ ក៏មិនមែនជាទម្លាប់មួយ ដែលគួរតែអនុវត្តតទៅទៀតផងដែរ។ ពីព្រោះថាទម្លាប់នេះអាចបង្កជា ផលប៉ះពាល់យ៉ាងធ្ងន់ធ្ងរ អាចធ្វើឲ្យស្ត្រីជាម្តាយរឹតតែកង្វះ នៅអាហារឧបត្ថម្ភ ធ្វើឲ្យស្រវឹងពុលថ្លើមទាំងទារក នឹងម្តាយឬអាចបង្កទៅ ជាជំងឺក្រិនថ្លើមកូនតែម្តង។ ហើយប្រសិនបើម្តាយទទួលទានស្រា កាន់តែច្រើននោះជាតិស្រានឹង បញ្ចេញទៅតាមទឹកដោះម្តាយ ធ្វើឲ្យទារកដែលបានបៅទឹកដោះនោះហើយ បង្កទៅជាការប៉ះពាល់ដល់ខួរក្បាលនិង កាយសម្បទានក្មេងទាំងមូលធ្វើឲ្យក្មេងធំឡើង មិនសូវមានភាពវ័យឆ្លាត រួមទាំងងាយទទួលឆ្លង នៅជំងឺផ្សេងៗផងដែរ។
រីឯការដេកអាំងភ្លើង ទម្លាប់នេះក៏អាចមានជាផលប៉ះពាល់ធ្ងន់ធ្ងរ ចំពោះម្តាយផងដែរ។ ប្រសិនបើស្រ្តីខ្លះគាត់សម្រាលដោយ ការវះកាត់ផងនោះគឺកាន់តែធ្វើឲ្យ ហូរឈាមកាន់តែច្រើន ព្រោះតែកម្តៅក្តៅ ចាប់ផ្តើមអស់កម្លាំងពីព្រោះតែខំប្រឹងទប់នឹង កម្តៅដែលជាហេតុនាំឲ្យស្រ្តីកាន់តែចុះខ្សោយទៅៗ ជាលំដាប់ផងដែរ។
ជំនឿគឺកើតចេញមកពីការស្រលាញ់ ការភ័យខ្លាច ការខ្លាចបាត់បង់ ក៏ប៉ុន្តែបើជឿខុសវាក៏នឹងបង្កមកជាគ្រោះថ្នាក់ កាន់តែលើសដើមទៅវិញ។ ទោះយ៉ាងដូចជាជំនឿ ក្នុងការពាក់ខ្សែក ខ្សែដៃយ័ន្តកថា ឬលាបប្រេងក្រឡា ដល់ទារកដែលទើបតែកើតមកដោយជឿថា អាចឲ្យទារកនោះគេងលក់ស្កប់ស្កល់ អាចជួយឲ្យមានសុខភាពល្អជាដើម។ ក៏ប៉ុន្តែជំនឿនេះគឺរឿងដែលខុសឆ្គងមួយ ដែលអាចបង្កឲ្យមានជា គ្រោះថ្នាក់យ៉ាងច្រើនដល់ទារកដោយមិនដឹងខ្លួន ដែលឪពុកម្តាយមួយចំនួន មានការធ្វេសប្រហែល មិនបានគិតដល់ផងដែរ។
ជាមួយគ្នានេះលោក វេជ្ជបណ្ឌិត ហ៊ាង រតនា ក៏បានលើកឡើងបន្ថែមថា ការពាក់ខ្សែកឬ ខ្សែដៃទាំងនេះគឺ សុទ្ធសឹងតែជាបណ្តុំនៃមេរោគជាច្រើន ហើយងាយឆ្លងទៅកាន់ទារកជាទីបំផុត ពីព្រោះប្រព័ន្ធនែភាពការពារ របស់កុមារនៅខ្សោយខ្លាំង ងាយទទួលរងនៅ ការវាយប្រហាររបស់ជំងឺផ្សេងៗ។ ជាក់ស្តែងនៅពេលដែលក្មេង ចាប់ឬ បៀម នៅខ្សែកឬ ខ្សែដៃទាំងនោះ មេរោគដែលនៅជាប់ទាំងអស់នោះ នឹងឆ្លងចូលតាមបំពងករបស់ក្មេង ជាហេតុដែលធ្វើឲ្យក្មេងនោះងាយនឹងមានជំងឺ ឈឺច្រើន ហើយត្រូវប្រឈមជាមួយនឹងជំងឺទាំងអស់នោះ អស់មួយជីវិត ក៏ព្រោះតែមេរោគនៃ កង្វះអនាម័យដែលជាប់មាននៅ ក្នុងខ្សែកកថា ឬខ្សែដៃយ័ន ទាំងអស់នោះផងដែរ។
ជាចុងក្រោយលោក វេជ្ជបណ្ឌិត ហ៊ាង រតនា ក៏សូមផ្តាំផ្ញើរក៏ដូចជាស្នើសុំឲ្យ ឪពុកម្តាយទាំងអស់គួរតែព្យាយាមស្វែងរក ចំណេះដឹងឲ្យបានច្រើនតាមរយៈ ការស្តាប់ការណែនាំរបស់គ្រូពេទ្យ ហើយមុននឹងសម្រេចចិត្តថាធ្វើអ្វីមួយ លើទារកតាមតាមបែបជំនឿបុរាណ គួរតែមានការគិតពិចារណាឲ្យបានច្បាស់លាស់ ឬបើមិនដូច្នេះទេអាចមកពិភាក្សា ជាមួយពេទ្យជាមុនបាន កុំចេះតែជឿឬធ្វើតាមផ្តេសផ្តាស ដោយគ្មានហេតុផល ពីព្រោះជំនឿដែលគ្មានហេតុផលគឺ តែងតែនាំមកនៅភាពខាតបង់តែប៉ុណ្ណោះ៕