អាមេរិក៖ យោងតាមសេចក្តីរាយការណ៍របស់គេហទំព័រ CBS San Francisco បានឲ្យដឹងថា មេបញ្ជាការនៃនាយកដ្ឋានពន្លត់អគ្គិភ័យ បានបង្ហាញរថយន្តពន្លត់អគ្គិភ័យដើរដោយចរន្តអគ្គិសនីដំបូងបង្អស់កាលពីល្ងាចថ្ងៃពុធ ហើយបានប្រកាសពីផែនការដាក់ឱ្យប្រើប្រាស់នៅចុងឆ្នាំ២០២១។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Harold Schapelhouman ប្រធាននាយកដ្ឋាននៅក្នុងទីក្រុង Menlo Park បានមានប្រសាសន៍ថា“ រថយន្តអគ្គិសនីមិនមែនជារឿងដែលថ្មីនោះទេ ប៉ុន្តែវាថ្មីសំរាប់យើងដែលយកវាទៅប្រើក្នុងការងារពន្លត់អគ្គិភ័យ។
រថយន្តពន្លត់អគ្គិភ័យនេះមានពណ៌ខ្មៅនិងពណ៌លឿង ហើយបើយើងមើលទៅវាមិនដូចជារថយន្តពន្លត់អគ្គិភ័យនោះទេ តែដូចរថយន្តក្រុងច្រើនជាង។ វាត្រូវបានផលិតដោយក្រុមហ៊ុន Rosenbauer ។ ជាការពិតណាស់ សំណួរដែលមនុស្សជាច្រើនបានសួរគឺថា តើម៉ាស៊ីនពន្លត់អគ្គិភ័យអាចអស់ថាមពលក្នុងកំឡុងពេលដំណើរការដែរឬទេ។
លោក Schapelhouman បាននិយាយទៀតថា " ខ្ញុំមិនបារម្ភអំពីរឿងនោះទេ ហើយខ្ញុំនឹងប្រាប់អ្នកពីមូលហេតុ គឺថាយើងកំពុងតែស្ថិតក្នុងដំណាក់កាលនៃការរៀបចំ ដូច្នេះវាប្រាកដណាស់ថា យើងនឹងមិនធ្វើឲ្យមានចំនុចខ្វះខាតណាមួយកើតមានឡើយ " ។
ទោះបីជារថយន្តពន្លត់អគ្គិសនីនេះដំណើរការជាមួយចរន្តអគ្គិសនីក៏ដោយ តែវាក៏អាចប្រើប្រេងម៉ាស៊ូតដើម្បីបញ្ឆេះម៉ាស៊ីនសម្រាប់សាកអាគុយបានដែរ។ វាអាចដំណើរការបានប្រហែល ៨ ម៉ោង ហើយបើរថយន្តនេះត្រូវពន្លត់អគ្គិភ័យលើសពី ៨ ម៉ោង គឺយើងអាចប្រើប្រេងម៉ាស៊ូតដើម្បីជួយសាកថាមពលបន្ថែមទៀត ខណៈពេលវាកំពុងដំណើរការនោះ។
លោក Schapelhouman បានបន្តថា ផែនការនេះគឺដើម្បីធ្វើការផ្លាស់ប្តូររថយន្តប្រភេទនេះឱ្យសមទៅនឹងតម្រូវការខាងនាយកដ្ឋាន។ ដំបូងឡើយគេនឹងសាកល្បងប្រើវាជារថយន្តសង្គ្រោះ មុនពេលប្រើវាដើម្បីពន្លត់អគ្គិភ័យ។
គាត់បានបន្ថែមថា រថយន្តអគ្គិសនីគឺមានតម្លៃប្រហែល ១,២ លានដុល្លារ វាពិតជាថ្លៃប្រសិនបើយើងប្រៀបធៀបទៅនឹងតម្លៃនៃរថយន្តពន្លត់អគ្គិភ័យផ្សេងទៀត ប៉ុន្តែរថយន្តអគ្គិសនីនឹងជួយសន្សំថវិការបស់នាយកដ្ឋានក្នុងរយៈពេលវែង ពីព្រោះវាមិនចាំបាច់ត្រូវប្រើសាំងឬម៉ាស៊ូតអីនោះទេ ហើយចំណុចដែលសំខាន់បំផុតគឺថា រថយន្តអគ្គិសនីគឺល្អប្រសើរសម្រាប់បរិស្ថាននិងមានថាមពលខ្លាំងសំរាប់ធ្វើជារថយន្តពន្លត់អគ្គិភ័យនាពេលអនាគត៕