ខំដាំដំណាំយ៉ាងស្អាតនៅលើដីគេបោះបង់ចោល បែរជាអ្នកជិតខាងច្រណែន លួចកាប់បំផ្លាញខ្ទេចគ្មានសល់

ម៉ាឡេស៊ី៖ ថ្មីៗនេះ នាង Li Pheng រស់នៅក្នុងទីប្រជុំជន Penang បានចែករំលែករឿងរ៉ាវដ៏ហួសចិត្តមួយ ដែលទាក់ទងទៅនឹងអ្នកជិតខាងរបស់នាងម្នាក់ បានលួចកាប់បំផ្លាញដំណាំ។

បើយោងតាមសម្ដីរបស់នាង Li Pheng បានឲ្យដឹងថា មានដីតូចមួយកន្លែង គ្មានម្ចាស់កាន់កាប់នៅម្ដុំផ្ទះរបស់នាង ដែលហុំព័ទ្ធជុំវិញទៅដោយស្មៅ។ ដើម្បីការពារកុំឲ្យមានមូស និងពស់ អ៊ុំប្រុសម្នាក់បានសម្អាតស្មៅចេញ ហើយប្រែក្លាយទៅជាសួនដំណាំដ៏ស្រស់ស្អាតមួយ។ អ៊ុំប្រុសបានចំណាយពេលជារៀងរាល់ថ្ងៃក្នុងការដាំនិងស្រោចដំណាំ ហើយគាត់ក៏បានអនុញ្ញាតឲ្យអ្នកភូមិទាំងអស់ អាចបេះយកទៅធ្វើម្ហូបបានទៀតផង។ 

នាង Li Pheng បានបន្ដទៀតថា រាល់ពេលឃើញអ៊ុំប្រុសដាំនិងស្រោចដំណាំម្ដងៗ មានស្ត្រីម្នាក់ដែលជាអ្នកជិតខាង តែងតែមករករឿងដោយគ្មានមូលហេតុ។ លុះមកដល់ថ្ងៃទី១១ ខែធ្នូកន្លងទៅនេះ ស្ត្រីនោះបានលួចកាប់បំផ្លាញដើមល្ហុងចំនួន១០ដើម និងដំណាំផ្សេងៗទៀត  ខណៈពេលអ្នកភូមិកំពុងដេកលក់។

ជុំវិញរឿងរ៉ាវខាងលើនេះ ធ្វើឲ្យអ្នកភូមិហួសចិត្តគ្រប់ៗគ្នា  និងសោកស្ដាយយ៉ាងខ្លាំងចំពោះការបាត់បង់ដំណាំដែលអ៊ុំប្រុសខិតខំប្រឹងប្រែងថែរក្សាកន្លងមកនេះ៕

សូមទស្សនារូបភាពខាងក្រោម៖