បរទេស៖ កាលពីពេលថ្មីៗនេះយានអវកាស Juno ដែលជាយានសម្រាប់អង្កេតនៅទីអវកាសបានប្រទះឃើញព្យុះស៊ីក្លូនយក្សថ្មីមួយនៅលើភពព្រហស្បត្តិ៍។ បើយោងតាមអង្គការណាសាបានឲ្យដឹងថាយាន Juno ដែលជាយានប្រើប្រាស់ថាមពលពីពន្លឺព្រះអាទិត្យបានរកឃើញព្យុះស៊ីក្លូនមួយនៅកំលុងពេលហោះទៅជិតភពព្រហស្បត្តិ៍លើកទី២២នៅដើមខែវិច្ឆិកាដើម្បីប្រមូលទិន្នន័យពីភពឧស័្មនយក្សមួយនេះនៅរយៈចម្ងាយ៣,៥០០គីឡូម៉ែត្រ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបន្ថែមលើការរកឃើញព្យុះនៅភព្រហស្បត្តិ៍ ក្រុមការងារណាសាត្រូវតែធ្វើយ៉ាងណាឲ្យយានអង្កេតទីអវកាសមួយនេះទទួលពន្លឺគ្រប់គ្រាន់ពីព្រះអាទិត្យ បើមិនដូច្នោះទេយានមួយនេះច្បាស់ជាមានវាសនាដូចជាយាន Opportunity ដែលកាត់ផ្ដាច់ទំនាក់ទំនងនៅពេលដែលព្យុះធូលីបានបិទពន្លឺមិនឲ្យយាននេះស្រូបថាមពលពីព្រះអាទិត្យបាន។ វាពិតជាសំណាងណាស់ដែលក្រុមការងារណាសាបានបញ្ជាឲ្យយាន Juno ហោះចេញពីស្រមោលភពព្រហស្បត្តិ៍ដែលអាចរារាំងការទទួលពន្លឺពីព្រះអាទិត្យ ហើយអាចរកឃើញព័ត៌មានថ្មីថែមទៀត។ គួររម្លឹកដែរថា យាន Juno ធ្លាប់បានរកឃើញព្យុះស៊ីក្លូនចំនួន៩នៅលើប៉ូលខាងជើងរបស់ភពព្រហស្បត្តិ៍និងចំនួន៦នៅប៉ូលខាងត្បូងក្នុងខែកក្កដាឆ្នាំ២០១៦។
នៅកំឡុងពេលហោះទៅជិតភពព្រហស្បត្តិ៍ យាន Juno បានរកឃើញខ្យល់ព្យុះចំនួន៥ក្នុងចំណោមព្យុះដែលវារកឃើញខាងលើនេះ ហើយបានរួមបញ្ចូលគ្នាបង្កើតបានទំហំមួយប៉ុនសហរដ្ឋអាមេរិកទាំងមូល។ ប៉ុន្តែឥឡូវខ្យល់ព្យុះថ្មីដែលទើបតែរកឃើញអាចនឹងចូលរួមជាមួយក្រុមព្យុះទាំង៥ខាងលើ រួចព្យុះទាំងនោះអាចនឹងប្ដូររូបរាងពីបញ្ចកោណទៅជាឆកោណវិញ។ អង្គការណាសាបានបញ្ជាក់ថាព្យុះយក្សថ្មីមួយនោះមានទំហំប៉ុនរដ្ឋតិចសាសរបស់សហរដ្ឋអាមេរិក។ ទិន្នន័យដែលទទួលបានពីយាន Juno បានឲ្យដឹងថា ខ្យល់ព្យុះស៊ីក្លូននោះមានល្បឿន ៣៦២គីឡូម៉ែត្រក្នុងមួយម៉ោង៕