ប៊ែលហ្សិក៖ ពិធីបុណ្យកានីវ៉ាល់របស់ប៊ែលហ្សិកត្រូវបានដកចេញពីបញ្ជីបេតិភណ្ឌវប្បធម៌អរូបីនៃអង្គការយូណេស្កូ បន្ទាប់ពីមន្ត្រីជាប់ពាក់ព័ន្ធបានរកឃើញការកើតមានអំពើរើសអើងជាតិសាសន៍និងការប្រឆាំងនឹងជនជាតិជ្វីហ្វដែលជាការប្រាសចាកពីគោលការណ៍របស់ខ្លួន។ ពិធីបុណ្យកានីវ៉ាល់នៅក្នុងទីក្រុង Aalst នៃប្រទេសប៊ែលហ្សិកធ្លាប់បានទទួលស្គាល់ដោយអង្គការយូណេស្កូ ប៉ុន្តែវាត្រូវបានអង្គការរបស់ជ្វីហ្វធ្វើការថ្កោលទោស។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សគណៈកម្មាធិការអន្តររដ្ឋាភិបាលសម្រាប់ការការពារបេតិកភណ្ឌវប្បធម៌អរូបីនៃមនុស្សជាតិបានប្រកាសកាលពីថ្ងៃសុក្រថាខ្លួននឹងលុបចោលនូវពិធីបុណ្យកានីវ៉ាល់ក្នុងទីក្រុង Aalst ចេញពីបញ្ជីបេតិកភណ្ឌរបស់ខ្លួន។ អ្នកនាំពាក្យរបស់យូណេស្កូបាននិយាយនៅក្នុងសេចក្ដីថ្លែងការណ៍មួយថា៖ «បន្ថែមលើសំណើដែលដាក់ដោយលេខាធិការដ្ឋានយូណេស្កូ គណៈកម្មាធិការផ្អែកលើសេចក្តីសំរេចរបស់ខ្លួនលើការពិតដែលថាការកើតមានឡើងវិញនូវអំពើរើសអើងជាតិសាសន៍និងការប្រឆាំងនឹងជនជាតិជ្វីហ្វគឺមិនត្រូវគ្នានឹងគោលការណ៍គ្រឹះនៃអនុសញ្ញាឆ្នាំ២០០៣ សម្រាប់ការការពារបេតិកភណ្ឌវប្បធម៌អរូបីទេ»។
នៅក្នុងខែធ្នូនេះអភិបាលក្រុងលោក Christoph D'Haese បានបង្ហាញសញ្ញាថាទីក្រុងនេះចង់ផ្ដាច់ទំនាក់ទំនងជាមួយអង្គការយូណេស្កូបន្ទាប់ពីមានការរិះគន់លើពិធីព្យុហយាត្រាក្នុងឆ្នាំនេះដែលប្រារព្ធឡើងដើម្បីប្រឆាំងនឹងជនជាតិជ្វីហ្វ។ គណៈកម្មាធិការយូណេស្កូបាននិយាយនៅក្នុងសេចក្តីថ្លែងការណ៍មួយថាខ្លួនបានឈរលើគោលការណ៍គ្រឹះនៃសេចក្តីថ្លៃថ្នូរ សមភាព និងការគោរពគ្នាទៅវិញទៅមកក្នុងចំណោមប្រជាជនទាំងឡាយ ប៉ុន្តែថ្កោលទោសរាល់ទម្រង់នៃការរើសអើងជាតិសាសន៍ ការប្រឆាំងជនជាតិជ្វីហ្វ និងអំពើស្អប់ខ្ពើមជនបរទេស៕