អាហ្សង់ទីន៖ អតីតខ្សែប្រយុទ្ធសញ្ជាតិអាហ្សង់ទីនរបស់ក្លិប Paris Saint-Germain និងក្លិប Napoli កីឡាករ Lavezzi បានប្រកាសចូលនិវត្តន៍ពីអាជីពជាកីឡាករបាល់ទាត់ កាលពីថ្ងៃសុក្រម្សិលមិញនេះ ក្នុងវ័យ៣៤ឆ្នាំ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ខ្សែប្រយុទ្ធរូបនេះបានសរសេររៀបរាប់លើគណនី Instagram ផ្លូវការរបស់ខ្លួនថា៖
"រយៈពេលជាច្រើនឆ្នាំដែលបានរៀនសូត្រពីវីស័យមួយនេះ បានបង្កើតនូវអនុស្សាវរីយ៍ជាច្រើន ហើយវានឹងស្ថិតក្នុងបេះដូងខ្ញុំជានិច្ច។ខ្ញុំសូមថ្លែងអំណរអរគុណទៅដល់អ្នកទាំងឡាយដែលតែងតែនៅក្បែរខ្ញុំ ឆ្លងកាត់ដំណើរដ៏វែងឆ្ងាយនេះ។ ដោយក្ដីរីករាយ ខ្ញុំសូមនិយាយពាក្យថាលា ទៅកាន់វិស័យមួយនេះ ដែលបានផ្ដល់ពេលវេលាដ៏អស្ចារ្យបំផុតមកឲ្យខ្ញុំ។ ខ្ញុំពិតជារីករាយណាស់!"
Lavezzi បានឈាងជើងចូលប្រឡូកក្នុងអាជីពជាកីឡាករបាល់ទាត់ជាលើកដំបូង ដោយចាប់ផ្ដើមជាមួយនឹងក្លិប Estudiantes នៅលីគកំពូលប្រទេសអាហ្សង់ទីនក្នុងឆ្នាំ២០០៣ មុនពេលផ្លាស់ទៅលេងឲ្យក្រុម San Lorenzo។
គាត់បានផ្ទេរទៅកាន់ក្លិប Napoli កាលពីរដូវក្ដៅឆ្នាំ២០០៧ ដោយបានចំណាយពេល៥ឆ្នាំនៅទីនោះ បង្ហាញខ្លួនបាន១៨៨ប្រកួត ស៊ុតបញ្ចូលទីបាន៤៨គ្រាប់ និងជួយក្រុមលើកពាន Coppa Italia បាន១ដង។
ដំណើរបន្ទាប់ គាត់បានចាកចេញពីទឹកដីប្រទេសអ៊ីតាលី ទៅចូលរួមជាមួយនឹងក្លិប Paris Saint-Germain ក្នុងឆ្នាំ២០១២ ជាមួយនឹងតម្លៃផ្ទេរ២៨លានអឺរ៉ូ (ឬប្រហែល៣១លានដុល្លារអាមេរិក) ដោយបានជួយក្រុមឈ្នះពានលីគកំពូលបារាំងចំនួន៤ដង មុនពេលផ្លាស់ទៅលេងឲ្យក្លិប Hebei China Fortune នៅលីគកំពូលចិនដែលជាក្លិបចុងក្រោយរបស់គាត់។
ក្រឡេកមកមើលអាជីពក្នុងក្រុមជម្រើសជាតិអាហ្សង់ទីនវិញ កីឡាករ Lavezzi បង្ហាញខ្លួនឲ្យជម្រើសជាតិបាន៥១ប្រកួត ស៊ុតបញ្ចូលទីបាន៩គ្រាប់ និងបានជួយក្រុមឡើងដល់វគ្គផ្ដាច់ព្រ័ត្រព្រឹត្តិការណ៍ បាល់ទាត់ពិភពលោក World Cup ឆ្នាំ២០១៤៕
Bong I.T