អង់គ្លេស៖ អតីតខ្សែប្រយុទ្ធក្លិបបិសាចក្រហម Manchester United លោក Dimitar Berbatov យល់ឃើញថាក្រុមមាន់ខ្នាយមាស Tottenham Hotspurs ដែលបច្ចុប្បន្នស្ថិតក្រោមការដឹកនាំរបស់លោក Mourinho មានឱកាសឈ្នះពាន Champions League ច្រើនជាងក្រុម Manchester City។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
៦ប្រកួតកន្លងទៅក្នុងវគ្គជម្រុះក្នុងពូល ក្រុមមេឃខៀវ Manchester City មិនដែលស្គាល់ពាក្យថាចាញ់នោះទេ ដោយប្រកួតជុំចុងក្រោយ កាលពីថ្ងៃព្រហស្បតិ៍ កន្លងទៅ ពួកគេយកឈ្នះក្រុម Dinamo Zagreb ៤ទល់នឹង១ ឈរចំណាត់ថ្នាក់លេខ១ ក្នុងពូល C មាន១៣ពិន្ទុ ទទួលបានកៅអីទៅលេងវគ្គ១៦ក្រុមចុងក្រោយបន្ត។
យ៉ាងណាមិញ លោក Berbatov បែរជាគិតថា លោក Pep Guardiola ហាក់អស់សង្ឃឹមក្នុងការឈ្នះពានមួយនេះទៅវិញ ដោយលោកលើកឡើងថា៖
"Manchester City ជាក្រុមដែលចង់ឈ្នះពាន Champions League ប៉ុន្តែពួកគេមិនស្ថិតក្នុងការភ្នាល់របស់ខ្ញុំថានឹងឈ្នះពានមួយនេះនៅខែឧសភាខាងមុខនោះទេ។ City បញ្ចប់ការប្រកួតជម្រុះក្នុងពូលរបស់ពួកគេ ដោយផ្ដួលក្រុម Dinamo Zagreb ៤-១ ក្នុងសប្ដាហ៍នេះ តែពួកយើងមិនត្រូវផ្ដោតច្រើនទៅលើលទ្ធផលមួយនេះរបស់ City នោះទេ ព្រោះពួកគេមិនទាន់ជួបគួប្រកួតដែលមានកម្រិតស្មើពួកគេនៅឡើយ។
Pep Guardiola ហាក់អស់សង្ឃឹមក្នុងការឈ្នះពាន Champions League ជាមួយ City ដោយសារក្រុមដទៃទៀតកំពុងធ្វើបានល្អជាង។"
លោក Berbatov បានបន្ថែមទៀតថា ក្រុមរបស់លោក Mourinho ជាក្រុមដ៏គ្រោះថ្នាក់មួយក្នុងការប្រកួតប្រជែងមួយនេះ ដោយលោកលើកឡើងថា៖
"Liverpool ធ្វើមិនបានល្អគ្របគ្រាន់នោះទេ ក្នុងព្រឹត្តិការណ៍ Champions League រដូវកាលនេះ តែពួកគេធ្វើបានល្អខ្លាំងនៅ Premier League។ចំណែក Barcelona និង Juventus ជាគូប្រជែងដ៏ខ្លាំងក្លាបំផុត ប៉ុន្តែអ្នកទាំងអស់គ្នាក៏មិនត្រូវមើលរំលង Spurs ផងដែរ។
ក្រោមការដឹកនាំរបស់លោក Jose Mourinho ក្រុម Spurs មានគ្រូបង្វឹក១រូបដែលធ្លាប់ឈ្នះពានរង្វាន់ច្រើនក្នុងអាជីព រួមមានពាន Champions League ជាមួយ Porto និង Inter ទាំងដែលក្រុមទាំងពីនេះមានអ្នកគាំទ្រតិច។
ដូច្នេះវាគ្មានបញ្ហាសម្រាប់ Spurs នោះទេ បើទោះបីជាពួកគេត្រូវជួបក្រុមណាក៏ដោយនៅវគ្គបន្ទាប់ ព្រោះពួកគេជាក្រុមដែលមានគុណភាព ហើយកាលដែលឡើងដល់វគ្គផ្ដាច់ព្រ័ត្រកាលពីឆ្នាំមុន នឹងធ្វើឲ្យពួកគេមានអារម្មណ៍ជឿជាក់ខ្លាំងជាមុន។"
គួរម្លឹកផងដែរថា ៦ប្រកួត ក្នុងវគ្គសន្សំពិន្ទុក្នុងពូល B ក្រុម Tottenham Hotspur បញ្ចប់ទៅក្នុងចំណាត់ថ្នាក់លេខ២ ដោយមាន១០ពិន្ទុ ខណៈក្រុមលេខ១ក្នុងពូលនេះ គឺក្រុមជើងខ្លាំងអាល្លឺម៉ង់ Bayern Munich មាន១៨ពិន្ទុ៕
Bong I.T