កាណាដា៖ យន្តហោះអគ្គិសនីមួយទើបបញ្ចប់ការហោះហើរសាកល្បងបានដោយជោគជ័យនៅក្នុងប្រទេសកាណាដា ហើយអ្នកប្រតិបត្តិការបានហៅវាថាឧស្សាហកម្មអាកាសចរណ៍ដំបូងគេនៅលើពិភពលោក។ យន្តហោះអាយុ៦២ឆ្នាំនេះមានកៅអីសម្រាប់ដឹកអ្នកដំណើរចំនួន៦ ប៉ុន្តែយន្តហោះចាស់នេះត្រូវបានគេកែច្នៃវាសាជាថ្មី និងបានបំពាក់ម៉ូទ័រអគ្គិសនីកម្លាំង៧៥០សេះ។ បើផ្អែកតាមទីភ្នាក់ងារសារព័ត៌មាន AFP បានឲ្យដឹងថាយន្ដហោះនេះបានធ្វើតេស្តហោះសាកល្បងនៅទីក្រុង Vancouver កាលពីថ្ងៃអង្គារកន្លងទៅនេះ ប៉ុន្តែរយៈពេលហោះហើរបានតិចជាង១៥នាទីតែប៉ុណ្ណោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Greg McDougall ដែលជានាយកប្រតិបត្តិក្រុមហ៊ុន Harbour Air បានឲ្យដឹងថាវាជាប្រវត្តិសាស្ត្រថ្មីដែលក្រុមហ៊ុនរបស់លោកបានធ្វើនវានុវត្តន៍ និងបានបង្កើតស្នាដៃថ្មីមួយសម្រាប់ពិភពលោក។ ការហោះហើរនេះជាយុគទី៣នៃយន្តហោះដែលជាយុគប្រើប្រាស់ថាមពលអគ្គិសនីទាំងស្រុង នេះបើតាមសេចក្ដីប្រកាសរបស់ក្រុមហ៊ុន Harbour Air នៅលើគេហទំព័ររបស់ខ្លួន។ លោក Roei Ganzarski ដែលជានាយកប្រតិបត្តិក្រុមហ៊ុន MagniX (រោងចក្រផលិតម៉ូទ័រអគ្គិសនីរបស់អូស្ត្រាលី) និងបានចូលរួមសហការជាមួយក្រុម Harbour Air បានឲ្យដឹងថាវិស័យដឹកជញ្ជូននិងឧស្សាហកម្មអាកាសចរណ៍គឺបានបំបែកចេញពីគ្នា។
លោក Ganzarski បានបន្តទៀតថាការហោះហើរថ្មីគឺចំណាយតិច និងមិនបំពុលបរិស្ថានឡើយ ហើយយន្តហោះអគ្គិសនីនេះអាចនឹងដំណើរការនៅរយៈពេលខ្លីខាងមុខ។ សម្រាប់ការតេស្តសាកល្បងជាលើកដំបូង ថាមពលថ្មលីចូមរបស់វាអាចទ្រទ្រង់ការហោះហើរបានរយៈចម្ងាយ១៦០គីឡូម៉ែត្រ នេះបើតាមសម្ដីលោក Ganzarski ទៅកាន់ភ្នាក់ងារសារព័ត៌មាន AFP។ គេបានប៉ាន់ប្រមាណថាយន្តហោះអគ្គិសនីអាចនឹងដំណើរការនៅឆ្នាំ២០២៣៕