ប្រព័ន្ធកម្មវិធីស៊ីរីបានជួយសង្គ្រោះជីវិតបុរសម្នាក់ដែលបើកឡានធ្លាក់ទន្លេទឹកកក

អាមេរិក៖ បើផ្អែកតាមទីភ្នាក់ងារសារព័ត៌មាន CNN បានឲ្យដឹងថាបុរសម្នាក់ឈ្មោះ Gael Salcedo មានអាយុ១៨ឆ្នាំបានកំពុងបើកបរទៅកាន់មហាវិទ្យាល័យរបស់គាត់នៅភាគខាងជើងរដ្ឋ Iowa សហរដ្ឋអាមេរិក ប៉ុន្តែចៃនដ្យឡានរបស់គាត់បុកចំដុំទឹកកកនៅលើដងផ្លូវ។ ពេលនោះឡានរបស់លោក​ Salcedo មិនអាចគ្រប់គ្រងលំនឹងហើយរេចង្កូតទៅខាងស្ដាំ និងបន្ទាប់មកលោកមើលអ្វីៗក៏មិនឃើញ នេះបើយោងតាមសម្ដីរបស់លោក Salcedo។​

ឡានរបស់គាត់ក៏បានធ្លាក់ចូលទន្លេ Winnebago រួចលោកបានបន្តទៀតថាពេលនោះគាត់មិនដឹងថាខ្លួនឯងនៅទីណាទេហើយក៏មិនដឹងត្រូវធ្វើអ្វីដែរ។ គាត់បានប្រាប់ទៅកាន់ភ្នាក់ងារសារព័ត៌មានទៀតថាគាត់ច្បាស់ជាស្លាប់ជាក់ជាមិនខាន។ លោក Salcedo បានបើកបង្អួចឡាននិងព្រួយបារម្ភខ្លាចឡានរបស់គាត់លិចចូលទន្លេ។

ទឹកកកនិងទឹកដែលនៅជុំវិញឡានរបស់គាត់ក៏ចាប់ផ្ដើមកកខ្លាំង ហើយរូបលោកក៏រកទូរសព្ឌមិនឃើញទៀត ប៉ុន្តែលោកបាននឹកឃើញគំនិតមួយគឺស្រែកឲ្យកម្មវិធីស៊ីរីតេទូរសព្ឌទៅកាន់លេខ៩១១ដើម្បីហៅប៉ូលិស។ បន្ដិចក្រោយមកសមត្ថកិច្ចក៏មកដល់ ប៉ុន្តែឡានរបស់លោក Salcedo ជាប់គាំងចេញមិនរួច ចុងក្រោយលោកត្រូវដើរចេញទៅក្រៅដើម្បីទៅរកជំនួយ។ ប៉ូលិសក៏បានតេហៅឡានពេទ្យដើម្បីបញ្ជូនលោក Salcedo ទៅសង្គ្រោះបន្ទាន់៕