ខេត្តកំពង់ឆ្នាំង ៖ សាលាដំបូងខេត្តកំពង់ឆ្នាំងបានសម្រេចឃុំខ្លួនបុរសម្នាក់នៅរសៀលថ្ងៃទី១១ ខែធ្នូ ឆ្នាំ២០១៩ នេះដោយចោទប្រកាន់ពីបទរំលោភ លើស្ត្រីរងគ្រោះ ដែលបានប្រព្រឹត្តឡើងកាលពីយប់ថ្ងៃទី៩ ខែធ្នូ ឆ្នាំ២០១៩ ស្រុកកំពង់លែង។ យោងតាមសមត្ថកិច្ចនគរបាលស្រុកកំពង់លែង បានឲ្យដឹងថា ជនសង្ស័យមានឈ្មោះ នៅ នី អាយុ៣៣ឆ្នាំ មានទីលំនៅភូមិឃុំកើតហេតុខាងលើ ចំណែកស្រី្តរងគ្រោះមានអាយុ២៥ឆ្នាំ។ សមត្ថកិច្ចបានបញ្ជាក់ ថា រវាងផ្ទះគ្រួសារស្ត្រីរងគ្រោះ និងជនសង្ស័យជាអ្នកនោះក្បែរគ្នា ហើយគ្រួសារទាំង២ស្រឡាញ់រាប់អានគ្នា ដូចបងប្អូន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
នៅមុនពេលចាកចេញទៅធ្វើការនៅរាជធានីភ្នំពេញ ប្តីស្ត្រីរងគ្រោះបានផ្តាំផ្ញើ គ្រួសារខាងជនសង្ស័យ ជួយមើលប្រពន្ធកូនផង ព្រោះនាងមានកូនតូច និងមានផ្ទៃពោះ៣ខែ។ ប្រភពដដែលបានបន្តថា នៅយប់ថ្ងៃកើតហេតុ នៅផ្ទះជនសង្ស័យមានការផឹកស៊ីតាំងពីក្បាលល្ងាច រហូតដល់ម៉ោងជាង១រំលងអាធ្រាត្រ ។ យប់នោះស្ត្រីរងគ្រោះក៏នៅលេងជាមួយគ្រួសារជនសង្ស័យដែរ ព្រោះទុកចិត្តគ្នាជាបងប្អូន។
នៅយប់នោះពេល ស្ត្រីរងគ្រោះសុំត្រឡប់ទៅផ្ទះវិញ ជនសង្ស័យឈ្មោះ នៅ នី ក៏បានជួយពរកូនជូនស្ត្រីរងគ្រោះត្រឡប់ទៅផ្ទះវិញដែរ។ ប៉ុន្តែពេលមកដល់ផ្ទះស្ត្រីរងគ្រោះបុរសជាជនសង្ស័យក៏បានចាប់រំលោភនាងរហូតដល់បានសម្រេច ។ យប់នោះនាងមិនហ៊ានស្រែកទេ ម្យ៉ាងប៉ុស្តិ៍នគរបាលក៏នៅឆ្ងាយដែរ។
លុះព្រឹកឡើងទើបនាងទៅដាក់ពាក្យប្តឹង នៅប៉ុស្តិ៍នគរបាលរដ្ឋបាល ហើយត្រូវបានសមត្ថកិច្ចនគរបាលចាប់ខ្លួនកសាងសំណុំរឿងបញ្ជូន ខ្លួនជាបន្តបន្ទាប់ មកស្នងការដ្ឋាននគរបាលខេត្ត។ នៅចំពោះមុខសមត្ថកិច្ច នគរបាលខេត្ត ជនសង្ស័យខាងលើបានសារភាពថា ខ្លួនពិតជាបានប្រព្រឹត្តអំពើចាប់រំលោភនារីរងគ្រោះពិតមែន ហើយបន្ទាប់នគរបាលខេត្ត កសាងសំណុំរឿង បញ្ជូនទៅតុលាការ ត្រូវបានតុលាការសម្រេចឃុំខ្លួនជនសង្ស័យរូបនោះតែម្តង៕
ប្រភព៖ កោះសន្តិភាព
Bong I.T