ចាំទេថាមានស្នេហាដំបូងពីពេលណា? ពេលខ្លះគិតសូម្បីតែរឿងមានកូនប៉ុន្មាននាក់ ដាក់ឈ្មោះថាមិចខ្លះ...

នៅពេលដែលយើងគិតពីស្នេហាដំបូង យើងនឹងរំឮកពេលវេលាដែលយើងនៅថ្នាក់វិទ្យាល័យឬមហាវិទ្យាល័យ។ ការចងចាំទាំងនោះធ្វើឲ្យយើងញញឹម ព្រោះវាមានទាំងការសប្បាយ និងការខ្វល់ចិត្ត។

ប៉ុន្តែស្នេហាដំបូង (First Love) វាបានបង្កប់នូវលក្ខណៈពិសេសមួយនៃការចងចាំដែលមិនអាចបំភ្លេចបាន បើទោះបីមកដល់ឥឡូវយើងបានផ្តើមដង្ហើមស្នេហ៍ថ្មីជាមួយមនុស្សម្នាក់ផ្សេងទៀតក៏ដោយ។

ហេតុអ្វីបានជាស្នេហាដំបូងមានលក្ខណៈពិសេសនិងមានឥទ្ធិពលខ្លាំងម៉្លេះ?

អស់ចម្ងល់ក្រោយអាន៦ចំណុចនេះ៖

១.​ ស្នេហាដំបូង ជាបទពិសោធន៍ដែលថ្មីស្រឡាង៖

បទពិសោធន៍ដែលអ្នកបានជជែកជាមួយមនុស្សម្នាក់។​ ទៅណាជាមួយគ្នា ញាំអី រឺចែករំលែករឿងរ៉ាវជីវិតមិនចេះតិច... គេអាចនឹងកាន់ដៃអ្នក ថើបថ្ពាល់ រឺថ្ងាសជាលើកដំបូង​ ពេលរំឮកដល់រឿងនោះអ្នកនឹងផ្ទុះសំណើច។ មូលហេតុ ព្រោះនេះជាលើកទីមួយហើយដែលអ្នកជួបប្រទះនូវភាពរីករាយដែលមិនធ្លាប់មានពីមុនទាល់តែសោះ។

២. អារម្មណ៍រំជួលចិត្តខ្លាំងមិនធ្លាប់មាន

ការដែលធំឡើងជាមួយគ្រួសារ រឺមិត្តភក្តិ អ្នកមានអារម្មណ៍ថាស៊ាំនឹងទិដ្ឋភាពនៃអារម្មណ៍រីករាយបែបនោះ។ ក្រោយមកមានមនុស្សប្លែកមុខម្នាក់ចូលមកស្តាប់​ និងចែករំលែកនូវលក្ខណៈផ្អែមល្ហែមមកកាន់អ្នក វាប្រៀបដូចជាការបោះជំហានទៅកាន់កន្លែងថ្មីមួយដែលអ្នកចង់បានពីមនុស្សមានភេទផ្ទុយគ្នា។វាគឺជាអារម្មណ៍នៅពេលដែលអ្នកទន្ទឹងរង់ចាំអ្វីដែលកើតឡើងនាពេលអនាគត។

៣.គ្រាដែលបេះដូងស្រឡះ

នៅពេលដែលយើងឈានជើងឡើងជណ្តើរនៃសេចក្តីស្រឡាញ់ដំបូង យើងមិនធ្វើវាដោយចេតនាអាក្រក់ឡើយ។ យើងធ្វើអ្វីមួយដោយក្តីបរិសុទ្ធ និងស្មោះត្រង់នាគ្រាដំបូង។ យើងមិនបារម្ភទេថាថ្ងៃណាមួយរឿងមិននឹកស្មាននឹងកើតឡើង។​ហើយយើងក៏ចាំអ្វីគ្រប់យ៉ាងទាំងក្នុងខួរក្បាល និងបេះដូង។

៤. គ្រាដែលមិនចេះកើតទុក្ខ

ជាទូទៅនៅពេលដែលយើងមិនទាន់មុជជ្រៅទៅក្នុងទំនាក់ទំនង ជាក្តីស្រលាញ់លើកដំបូង យើងនៅក្មេងនៅឡើយប្រហែលជានៅថ្នាក់វិទ្យាល័យ ឬមហាវិទ្យាល័យ។ យើងមិនទាន់មានទំនួលខុសត្រូវ រឺចេះកើតទុកលើអ្វីមួយឲ្យធំជាងទំហំស្នេហាដែលយើងមានឲ្យគ្នានៅឡើយ។ មិនចាប់បារម្ភថា​ ត្រូវទទួលខុសត្រូវលើការបង់ពន្ធចំណូលរកស៊ីគ្រប់គ្រងផ្ទះ មិនបាច់ព្រួយបារម្ភពីអាជីពនិងការងារអ្វីទេ។រឿងតែមួយគត់ដែលយើងចង់បាន គឺទទួលបានពិន្ទុល្អហើយមានពេលវេលាជាច្រើនសម្រាប់ស្នេហា និងក្តីរំភើបនាថ្ងៃបុណ្យនៃក្តីស្រឡាញ់ រឺខួបកំណើត ព្រមទាំងឃើញមុខគ្នារាល់ថ្ងៃ។ ពេលយើងកាន់តែចាស់ទុំឡើង យើងមានទំនួលខុសត្រូវហើយយើងមិនដែលមានឱកាសអង្គុយគិតតែរឿងស្នេហាមួយមុខទៀតទេ។

៥. នៅខ្ចីគំនិត ហើយជឿថាស្នេហ៍ពិត ប្រាកដជាមាន

ស្នេហាដំបូង គឺជាពេលវេលាដែលអ្នកជឿជាក់ថាទំនាក់ទំនងរបស់អ្នកល្អឥតខ្ចោះហើយមានន័យថាស្ថិតស្ថេរជារៀងរហូត។ អ្នកសប្បាយចិត្តនឹងអ្វីដែលអ្នកមាន; មិនមានការសោកស្តាយ ស្រឡាញ់ខ្លាំង​និងហ៊ានលះបង់ដោយគ្មានលក្ខខណ្ឌ។ គ្មានការរំពឹងទុកថានឹងឈឺចាប់ទេ ហើយមានអារម្មណ៍ថា អ្នកទាំងពីរនៅក្នុងពិភពលោកដ៏ស្រស់ស្រាយជាទីបំផុត។

៦. គិតអ្វីគ្រប់យ៉ាងថាមែនទែន

គ្រាន់តែវិធីដែលគេស្រលាញ់យើងដំបូង ធ្វើឲ្យយើងយល់ថាមានក្តីសុខ​ និងសុវត្ថិភាព។ យើងតែងស្រមើរស្រម៉ៃថា នឹងអាចរៀបការជាមួយគេនាពេលអនាគត។ ពេលខ្លះគិតសូម្បីតែរឿងមានកូនប៉ុន្មានអ្នក ដាក់ឈ្មោះថាមិចខ្លះ ទាំងដែលការពិតកំពុងនៅរៀនសូត្រនៅឡើយ។ យើងជឿថាយើងគិតត្រូវ ហើយគេនឹងគិតដូចយើងដែរ។​ តែអ្វីៗក៏អាចប្រែប្រួលនាពេលបន្ទាប់៕

ប្រភព៖ WomenNow