បើខ្ចិល Forward សារអ៊ីមែលច្រើនទៅកាន់មនុស្សតែម្នាក់ ពេលនេះមុខងារថ្មីរបស់ Gmail អាចជួយបាន

បរទេស៖ ពីមុនពេលយើងមានសារអ៊ីមែលចំនួន៥ ហើយចង់បញ្ជូនបន្តទៅកាន់មនុស្សម្នាក់ យើងត្រូវ Forward សារអ៊ីមែលទាំងនោះម្ដងមួយៗរហូតដល់៥ដង ប៉ុន្តែពេលនេះក្រុមហ៊ុន Google បានណែនាំវិធីសាស្ត្រថ្មីដែលអាចបញ្ជូនសារអ៊ីមែលទាំងអស់ទៅកាន់មនុស្សម្នាក់ដោយគ្រាន់តែបញ្ជូនសារអ៊ីមែលតែមួយប៉ុណ្ណោះ។ ដូចនេះអ្នកមិនចាំបាច់អង្គុយដោនឡូដឯកសារពីអ៊ីមែលមុនៗ ហើយយកទៅបញ្ជូនបន្តទៅមនុស្សតែម្នាក់នោះទេ។

មុខងារថ្មីរបស់ Gmail គឺអាចបំលែងសារអ៊ីមែលផ្សេងទៀតទៅធ្វើជា file មួយដែលមានទម្រង់កន្ទុយខាងក្រោយ .eml រួចយើងអាចទាញសារអ៊ីមែលជាច្រើនដាក់នៅសារអ៊ីមែលមួយនិងបញ្ជូនសរុបតែម្ដង។ មុខងារមួយនេះអាចបើកឲ្យប្រើប្រាស់ប្រហែលជាពីរសប្ដាហ៍ទៀត។ អ្នកអាចមើលរូបភាពមានចលនាខាងក្រោម បើសិនជាអ្នកមិនសូវយល់ពីដំណើរនៃមុខងារថ្មីនេះ៕​