អង់គ្លេស៖ យោងតាមប្រភពព័ត៌មានមួយក្នុងប្រទេសអង់គ្លេសបានឲ្យដឹងថា ក្លិបបិសាចក្រហម Manchester United គ្រោងនឹងតម្លើងថ្លៃពលកម្មដល់ខ្សែបម្រើឆ្នើមវ័យ២៣ឆ្នាំ កីឡាករ Scott McTominay ក្នុង១សប្ដាហ៍៦ម៉ឺនផោន (ឬប្រហែល ៧ម៉ឺនដុល្លារអាមេរិក)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខ្សែបម្រើសញ្ជាតិស្កុតឡេន បានបង្ហាញទម្រង់លេងដ៏គួរឲ្យភា្ញក់ផ្អើលក្នុងរដូវកាលនេះ ជាពិសេសកំឡុងពេលប្រកួតទល់នឹងក្រុម Manchester City កាលពីថ្ងៃសៅរ៍កន្លងទៅ។
McTominay បានអភិវឌ្ឍន៍សម្ថភាពរបស់ខ្លួនក្លាយជាកីឡាករដ៏សំខាន់មួយរូបក្នុងក្រុមលោក Solskjaer ជាក់ស្ដែងក្នុងរដូវកាលនេះ រូបគេបង្ហាញខ្លួនក្នុងជម្រើស១១នាក់ដំបូងបាន១៨ប្រកួតមកហើយ។
កាសែត The Sun បាងអះអាងថា ក្លិប Man Utd ចង់ផ្ដល់រង្វាន់លើកទឹកចិត្តទៅដល់កីឡាកររូបនេះ ដោយគ្រោងនឹងផ្ដល់កុងត្រាថ្មីដល់រូបគេ ជាមួយនឹងការតម្លើងប្រាក់ខែគុណនឹង២ ខណៈកិច្ចសន្យាបច្ចុប្បន្ន គាត់ទទួលបានថ្លៃឈ្នួលនឿយហត់ ៣ម៉ឺនផោនក្នុង១សប្ដាហ៍។
McTominay ទើបតែចុះកុងត្រាថ្មីជាមួយនឹងក្រុមបិសាចក្រហម កាលពីដើមឆ្នាំនេះ ដោយមានសុពលភាពរហូតដល់ឆ្នាំ២០២៣ ជាមួយនឹងការសន្យាផ្ដល់ជូនប្រាក់រង្វាន់បន្ថែម ប្រសិនបើបន្តទម្រង់លេងបានល្អ។
ប្រភពដដែលបានបន្ថែមទៀតថា កុងត្រាថ្មីរបស់ McTominay នឹងមានសុពលភាពរហូតដល់ឆ្នាំ ២០២៥ ជាមួយនឹងជម្រើសបន្ថែមរយៈពេល១២ខែ ហើយកិច្ចពិភាក្សាត្រូវបានគេជឿជាក់ថានឹងចាប់ផ្ដើមនៅពេលឆាប់ៗនេះ។
គួររម្លឹកផងដែរថា ខ្សែបម្រើវ័យក្មេងរូបនេះ ជាយុវជនថ្នាលរបស់ក្រុម Manchester United ហើយបានតម្លើងឲ្យមកលេងក្នុងឈុតធំ កាលពីឆ្នាំ២០១៧ រជ្ជកាលលោក Jose Mourinho ដឹកនាំ ដោយបង្ហាញខ្លួនសរុបបានចំនួន៦៥ប្រកួត ស៊ុតបញ្ចូលទីបាន៥គ្រាប់៕
ប្រភព៖ Dailymail