ទីភ្នាក់ងារអវកាសអឺរ៉ុបនឹងចាប់ផ្ដើមបេសកកម្មថ្មីក្នុងការប្រមូលសំរាមនៅទីអវកាស

បរទេស៖ បេសកកម្មប្រមូលសំរាមនៅទីអវកាសដំបូងគេដែលមានឈ្មោះថា ClearSpace-1 នឹងចាប់ផ្ដើមនៅឆ្នាំ២០២៥ ហើយបេសកកម្មមួយនេះនឹងចំណាយទឹកប្រាក់អស់ជិត១៣៣លានដុល្លារ។ ដោយសារតែមនុស្សបានបញ្ជូនផ្កាយរណបទៅទីលំហច្រើនពេក ហើយផ្កាយរណបទាំងនោះដាក់ឲ្យដំណើរការស្ថិតនៅរយៈកំពស់ទាបនៃគន្លងផែនដី ហេតុដូច្នេះហើយសំណល់កំទេចកំទីជាច្រើនដែលបានមកពីផ្កាយរណបទាំងនោះហោះរសាត់ជុំវិញគន្លងផែនដី។

ក្នុងរយៈពេល៦០ឆ្នាំមកនេះសំរាមរាប់ពាន់តោនបានហោះជុំវិញផែនដី សំរាមទាំងនោះមានដូចជាកំទេចចាស់ៗនៃរ៉ុកកែត ផ្កាយរណប៣៥០០គ្រឿងដែលលែងដំណើរការ និងកំទេចកំទីប្រមាណជា៧៥០,០០០បំណែកទៀតដែលហោះរប៉ាត់រប៉ាយក្នុងលំហ។ បំណែកកំទេចកំទីទាំងនោះវិលជុំវិញផែនដីក្នុងល្បឿន២០,០០០គីឡូម៉ែត្រក្នុងមួយម៉ោង។ គោលដៅដំបូងគេរបស់បេសកកម្មនេះគឺទៅប្រមូលកំទេចកំទីរបស់ផ្កាយរណបមួយដែលមានឈ្មោះ Vespa ដែលបញ្ជូនទៅគន្លងផែនដីតាំងពីឆ្នាំ២០១៣។

Vespa មានទម្ងន់១០០គីឡូក្រាមនិងវិលតាមគន្លងផែនដីក្នុងរយៈកំពស់៨០០គីឡូម៉ែត្រ មូលហេតុដែលគេជ្រើសរើសផ្កាយរណប Vespa ដើម្បីប្រមូលកំទេចកំទីរបស់វាក៏ព្រោះតែផ្កាយរណបមួយនេះមានរាងសាមញ្ញដែលអាចងាយស្រួលក្នុងការប្រមូលកំទេចកំទីរបស់វា។ យាន ClearSpace-1 នឹងបញ្ជូនទៅទីលំហក្នុងរយៈកម្ពស់៥០០គីឡូម៉ែត្រពីផែនដីដើម្បីធ្វើតេស្តសាកល្បង។ បន្ទាប់មកយាននេះនឹងហោះខ្ពស់ជាងមុនពីផ្ទៃផែនដី ហើយមនុស្សយន្តដៃបួនដែលមាននៅក្នុងយាននឹងចេញទៅប្រមូលសំរាមកំទេចកំទីផ្សេងៗរបស់ផ្កាយរណប Vespa៕​