នាយកបច្ចេកទេសក្លិប Arsenal លោក Edu ចង់បានអតីតកីឡាករក្រុមកាំភ្លើងធំ១រូបទៅដឹកនាំបន្តពីលោក Emery

អង់គ្លេស៖ នាយកបច្ចេកទេសក្លិប Arsenal លោក Edu ត្រូវបានគេរាយការណ៍ថា​ កំពុងជំរុញឲ្យក្លិបកាំភ្លើងធំនាំយកអតីតកីឡាកររបស់ខ្លួនលោក Patrick Vieira  មកដឹកនាំបន្តពីលោក Unai Emery ដែលត្រូវបានក្លិបបណ្ដេញចេញកាលពីចុងខែវិច្ឆិកាកន្លងទៅនេះ។

ក្លិបកាំភ្លើងធំ Arsenal បច្ចុប្បន្នកំពុងស្ថិតក្នុងស្ថានភាពមួយដ៏លំបាក​ ដោយ៩ប្រកួតចុងក្រោយពួកគេមិនទាន់ស្វែងរកជ័យជម្នះឃើញនៅឡើយទេ។

យ៉ាងណាមិញយោងតាមកាសែត The Time បានឲ្យដឹងថា លោក Edu​ កំពុងជំរុញក្លិប ឲ្យតែងតាំងលោក Vieira ឡើងដឹកនាំបន្ត។

លោក​ Vieira បច្ចុប្បន្នជាគ្រូបង្វឹករបស់ក្រុម Nice នៅក្របខណ្ឌ League 1 ដែលជាលីគកំពូលប្រចាំប្រទេសបារាំង ហើយលោកបានដឹកនាំក្រុមមួយនេះជាប់ចំណាត់ថ្នាក់លេខ៧ កាលពីរដូវកាលមុន ចំណែកឯរដូវកាលនេះក្រុមរបស់លោកកំពុងឈរនៅចំណាត់ថ្នាក់លេខ១១។

មុនពេលឈានជើងមកកាន់ការងារនៅក្រុម Nice គ្រូបង្វឹកវ័យ៤៣ឆ្នាំរូបនេះ ធា្លប់ដឹកនាំក្រុម New York City FC នៅលីគកំពូលសហរដ្ឋអាមេរិក និងធ្លាប់ជាគ្រូបង្វឹកក្រុមយុវជនថ្នាលរបស់ក្រុម Manchester City ផងដែរ។

លោក Vieira ធ្លាប់ជាកីឡាករឆ្នើមប្រចាំក្លិបកាំភ្លើងធំ Arsenal កំឡុងឆ្នាំ ១៩៩៦ ដល់ឆ្នាំ ២០០៥ ដោយធ្លាប់រួមចំណែកជួយក្រុមឈ្នះពានលីគកំពូលចំនួន៣ដង និងពាន FA Cup ចំនួន៤ដង។

គួរបញ្ជាក់ផងដែរថា អតីតមិត្តរួមក្រុមរបស់លោក Edu មួយរូបទៀតគឺលោក Freddie Ljungberg បច្ចុប្បន្នកំពុងដឹកនាំក្រុម Arsenal បន្តពីលោក Emery ក្នុងនាមជាគ្រូបង្វឹកបណ្ដោះអាសន្ន ដោយ ២ប្រកួតចុងក្រោយដែលលោកដឹកនាំ គឺទទួលបានលទ្ធផលមិនល្អនោះទេ ពោលគឺក្នុងប្រកួតទី១ ក្រុមកាំភ្លើងធំបានត្រឹមស្មើគ្នា ២-២​ ជាមួយនឹងក្រុម Norwich និងប្រកួតទី២ ចាញ់ក្រុម Brighton ក្នុងដី ២-១ ដោយឈរចំណាត់ថ្នាក់លេខ ១១ មាន១៩ពិន្ទុ គិតត្រឹម១៥ប្រកួតកន្លងទៅ៕

ប្រភព៖ thesun