ភ្នំពេញ៖ ក្នុងនាមជាកូនខ្មែរមួយរូប ពិតជាគូរឲ្យមានមោទនខ្លាំងណាស់ ជាមួយសម្បត្តិវប្បធម៌ ដ៏ចម្រុះនិងសម្បូរបែប ជារួមមានសិល្បៈបុរាណជាច្រើនទម្រង់ និងច្រើនប្រភេទយ៉ាងអស្ចារ្យ ដែលបុព្វបុរសខ្មែរបានខិតខំបន្សល់ទុក ឲ្យកូនចៅខ្មែរជំនាន់ក្រោយទុកជាកេរ្តិ៍ដំណែល នឹងជាសម្បិត្តដែលជាតំណាង បង្ហាញប្រាប់ពិភពលោកអំពីអត្តសញ្ញាណ ដ៏មានតម្លៃមិនអាចកាត់ថ្លៃបានរបស់ខ្មែរពី អតីតកាលតរហូតមកទល់នឹង ពេលបច្ចុប្បន្ននេះផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាក់ស្តែងលោកថុន ភារម្យ ដែលជាសិល្បៈករខ្មុកស្មាច់មួយរូប ដែលលោកសព្វថ្ងៃបានចាប់យកអាជីពធ្វើខ្មុក និងតោកនេះអស់រយៈពេលជាង៧ឆ្នាំមកហើយ ដែលលោកគឺជាអតីតសិស្សនៃ សាលាមជ្ឃឹមវិចិត្រសិល្បៈ។ ជាក់ស្តែងលោក ភារម្យ គឺជាក្មេងម្នាក់ដែលចូលចិត្តនិងស្រលាញ់ ការធ្វើខ្មុកនេះតាំងតែពីលោកនៅក្មេងមកម្ល៉េះរហូតដល់ ពេលលោកធំឡើងលោកក៏បន្តក្តីស្រម៉ៃ ដោយបានសម្រេចចិត្តចូលសិក្សាផ្នែកសិល្បៈធ្វើខ្មុកនេះ នៅសាលាមជ្ឈឹមវិចិត្រសិល្បៈតែម្តង។
បើទោះមើលទៅអាចថាធម្មតាតែ ការពិតការងារធ្វើខ្មុកនេះគឺពិតជា ទាមទារនៅការអត់ធ្មត់ខ្លាំងណាស់ ក្នុងការអង្គុយគូសនៅ ក្បាច់នីមួយៗយ៉ាងផ្ចត់ផ្ចង់ រួមទាំងត្រូវចំណាយរយៈពេលយូរ ក្នុងការធ្វើថែមទៀតផង។ ជាទូទៅខ្មុកមួយអាចចំណាយរយៈពេលធ្វើ រហូតដល់ទៅ២ខែឬអាច យូរជាងនេះក៏មាន។ ចំណែកធាតុផ្សំសំខាន់ក្នុងការធ្វើខ្មុកនេះគឺ មានដូចជាក្រដាសគឺជាធាតុផ្សំដ៏សំខាន់បំផុត ក្នុងការធ្វើខ្មុកពីព្រោះខ្មុកខ្មែរគឺ បង្កើតឡើងចេញពីក្រដាស ម្រែក និងជ័របាយម៉ាន រួមតាំងវត្ថុធាតុបន្ទាប់បន្សំផ្សេងៗទៀតផងដែរ។ ចំណែកការប្រើប្រាស់ពណ៍ក៏មានជា ការប្រើប្រាស់ខុសប្លែកទៅតាម តួអង្គនីមួយៗផងដែរ។ ពោលដូចជាហនុមានគេប្រើប្រាស់ពណ៌ស នាយរោងឯកគេប្រើពណ៌ខ្មៅ ក្រុងរាពណ៍ប្រើពណ៌បៃតង ទៅតាមប្រភេទនៃតួអង្គនីមួយៗនោះ។
ជាមួយគ្នានេះដែល លោក ភារម្យ ក៏បានលើកឡើងពីផលវិបាកមួយចំនួន ដែលលោកធ្លាប់ជួបប្រទះ ក្នុងអំឡុងពេលនៃការធ្វើខ្មុកនេះថា រាល់ពេលដែលលោកចាប់ផ្តើមធ្វើម្តងៗគឺ ត្រូវការពេលវេលា ត្រូវការផ្តោតអារម្មណ៍ខ្លាំង ប្រសិនណាបើធ្វើនៅពេលដែលមិនសប្បាយចិត្ត ឬអារម្មណ៍មិនមូលទេ នោះទឹកដៃក្នុងការធ្វើក៏មិនល្អមិនស្អាត ហើយមិនត្រូវទៅតាមអ្វីដែលចង់បាន ដូចគ្នានោះផងដែរ។
ជាចុងក្រោយ លោក ភារម្យ ក៏មានជាការសំណូមពរ ក៏ដូចជាសូមអំពាវនាវទៅកាន់ សាធារណៈជនទូទៅ ក៏ដូចជាប្រជាពលរដ្ឋកម្ពុជាទាំងអស់ ឲ្យជួយគាំទ្រនៅសា្នដៃសិល្បៈខ្មុកខ្មែរនេះ។ ម្យ៉ាងវិញទៀតលោកក៏បានផ្តាំផ្ញើរ ទៅដល់បងប្អូនទាំងឡាយណាដែលស្រលាញ់សិល្បៈខ្មុកនេះ តែពួកគាត់មានជំនឿថា ការទិញរូបខ្មុកនេះ យកទៅដាក់តាំងក្នុងផ្ទះ ឬហាងជារឿងដែលមិនល្អ ឬនាំឧបទ្រុបមិនល្អនោះ សូមឈប់គិតបែបនេះទៀតទៅ។ ប្រសិនបើបងប្អូនទាំងអស់គ្នា ស្រលាញ់អាចជាវយកទៅ ដាក់តាំងលំអរ ក្នុងគេហដ្ឋានបានគឺ មិនមានជាបញ្ហាអ្វីនោះទេ។ ពីព្រោះទាំងនេះគឺសុទ្ធសឹងតែ ជាសិល្បៈបុរាណខ្មែរ ចំណែកលក្ខណៈនៃតួអង្គគឺគ្រាន់តែជា សាច់រឿងជាសិល្បៈដែល គេបង្កើតឡើងមកនោះទេ។ ទៀតសោតប្រសិនបើយើងជាវ យកទៅដាក់តាំងនៅក្នុងផ្ទះឬហាងគឺ អាចជួយឲ្យសិល្បៈបុរាណខ្មែរ អាចដើរទៅមុខ ហើយក៏អាចជួយផ្សព្វផ្សាយ នៅសិល្បៈខ្មែរថែមទៀតផង។ ដូច្នេះសូមកុំគិតអវិជ្ជមាន ទៅតាមការសម្តែងឬលក្ខណៈ របស់តួអង្គក្នុងសាច់រឿងនោះអី៕