សាន់ដារ៉ា បើកដំណើរការទីតាំងលក់ទាំង៧សាខារបស់ខ្លួន ស្របពេលក្នុងរដូវកាលបុណ្យណូអែលឆ្នាំនេះ!

ភ្នំពេញ៖ ត្រឹមតែរយៈពេលមួយឆ្នាំ ក្រោយពីការបើកដំណើការជាផ្លូវការនូវហាងលក់គ្រឿងអលង្កា PANDORA និងហាងលក់នាឡិកាដៃ BERING នៅសាខា Aeon Mall សែនសុខរួចមក ក្រុមហ៊ុន សាន់ដារ៉ា ក៏បា​នបញ្ចប់ជាស្ថាពរនូវគម្រោងកែលម្អហាងរបស់ខ្លួន ដែលមានទីតាំងនៅ Exchange Square ផងដែរ។

ក្រុមហ៊ុន សាន់ដារ៉ា បានចាប់ផ្តើមដំណើការដំបូង ដោយបានបើកហាងលក់គ្រឿងអលង្ការប្រណិតម៉ាក PANDORA តែមួយសាខាប៉ុណ្ណោះ នៅផ្សារទំនើបអ៊ីអនម៉លភ្នំពេញ។ ដោយទទួលបានការគាំទ្រពីសំណាក់អតិថិជន ក្រុមហ៊ុនក៏បានពង្រីកសាខា ៥ទីតាំង​ បន្ថែមទៀត ក្នុងនោះរួមមានហាងលក់នាឡិកាដៃ BERING និងហាងលក់គ្រឿងអលង្ការ PANDORA ផ្សារទំនើបអូឡាំព្យា។

យោងទៅតាមប្រសាសន៍របស់កញ្ញា ប៊ុន កុលសាលីតា ដែលជាប្រធានគ្រប់គ្រងម៉ាក PANDORA និង BERING ថា៖

ជាការពិតណាស់ អតិថិជនយើងទាំងអស់ប្រាកដជាមានភាពរីករាយ ព្រោះថានៅក្នុងឆ្នាំនេះដែរ PANDORA​ បានមានការតែទម្រង់ជាមួយការបញ្ចេញនូវខូឡិកសិនថ្មីរបស់ខ្លួនទូទាំងពិភពលោក។ PANDORA គឺជាម៉ាកគ្រឿងអលង្ការប្រណិតលំដាប់ថ្នាក់លេខមួយក្នុងពិភពលោក ដែលបច្ចុប្បន្នមានវត្តមានជាងមួយរយប្រទេស និងមានទីតាំងលក់រហូតដល់ទៅ ២,៤០០ ហាងនៅជុំវិញពិភពលោក។

លើសពីនេះទៅទៀត នាពេលថ្មីៗនេះក្រុមហ៊ុន សាន់ដារ៉ា បានឈានជើងចូលប្រឡូកក្នុងវិស័យផលិតផលថែរក្សាសម្រស់ដំណើរការផលិតផលថែរក្សាសម្ផស្ស និងកំពុងតែសម្រិតសម្រាំងយកនូវផលិតផលដែលមានគុណភាព និងតម្លៃសមរម្យ ដើម្បីបំពេញតម្រូវការទីផ្សារបច្ចុប្បន្នដែលកំពុងតែមានការរីកចម្រើនយ៉ាងឆាប់រហ័ស៕