អេហ្ស៊ីប៖ បុរាណវិទូអេហ្ស៊ីបមួយក្រុមបានបង្ហាញពីមឈូសមានទាំងចម្លាក់បុរាណរបស់អេហ្ស៊ីប ដែលបានលាក់ទុកសាកសពម៉ាំមីដែលមានអាយុកាលជាង ៣០០០ឆ្នាំមុន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមឈូសចំនួន៣០ត្រូវបានគេរកឃើញនៅក្នុងទីក្រុងបុរាណរបស់អេហ្ស៊ីបនៅច្រាំងខាងកើតនៃទន្លេនីល។ យោងតាមអាជ្ញាធរអេហ្ស៊ីបបានឲ្យដឹងថា ការរកឃើញមឈូសដ៏ច្រើននេះគឺជាការរកឃើញដ៏ធំបំផុតដែលមិនធ្លាប់មានក្នុងប្រវត្តិសាស្ត្រ ហើយវាក៏ជាការរកឃើញវត្ថុបុរាណដែលដឹកនាំដោយបុរាណវិទូអេហ្ស៊ីបដំបូងបង្អស់ដែរ។
បុរាណវិទូបានបើកមឈូសមួយដែលមានផ្ទុកសាកសពបុរសម្នាក់ កាលពីថ្ងៃសៅរ៍ទី១៩ខែតុលា។ ចូលរួមក្នុងពិធីបង្ហាញនេះលោក Zahi Hawass សាស្រ្តាចារ្យបុរាណវិទូអេហ្ស៊ីបនិងជាអតីតរដ្ឋមន្រ្តីក្រសួងកិច្ចការបូរាណវិទ្យាបានប្រាប់ប្រព័ន្ធផ្សព្វផ្សាយថា លោកជឿជាក់ថានេះ “គឺជាការរកឃើញដ៏អស្ចារ្យបំផុត”។
យោងតាមអ្នកបុរាណវិទូរូបនេះបានបញ្ជាក់ថា មឈូស១២ក្នុងចំណោម៣០ត្រូវបានរកឃើញនៅលើគេបង្អស់នៃមឈូស១៨ផ្សេងទៀត ហើយសាកសពម៉ាំមីនៅខាងក្នុងមឈូសទាំងនោះបានបង្ហាញឲ្យឃើញសាកសពបុរស២៣នាក់ ស្ត្រី៥នាក់និងកុមារ២នាក់។
លោក Hawass បានប្រាប់សារព័ត៌មាន CNN ថា៖ «មឈូសបុរាណដែលបានលាក់ទុកនេះអាចបញ្ជាក់បានថា មានវត្តមានជនជាតិអេហ្ស៊ីបបុរាណរស់នៅយ៉ាងពិតប្រាកដ។ ហើយលោកបានសង្កត់ធ្ងន់ទៀតថា រូបចម្លាក់ឈើទាំងនេះត្រូវបានថែរក្សាយ៉ាងល្អតាំងពីរាប់រយសហស្សវត្សរ៍មកហើយ ដែលវាអាចបង្ហាញឱ្យឃើញអំពីទំនៀមទម្លាប់និងវប្បធម៌ជាច្រើននាសម័យបុរាណរបស់ប្រទេសអេហ្ស៊ីប។
លោក Hawass បានអត្ថាធិប្បាយអំពីសិល្បៈហត្ថកម្មនិងគុណភាពនៃពណ៌ដែលត្រូវបានប្រើនៅលើមឈូសនិងឈុតឆាកដែលបង្ហាញពីសកម្មភាពនាសម័យបុរាណក្នុងការបួងសួងដល់អាទិទេព ក៏ដូចជាឯកសារយោងទៅតាមសៀវភៅអេហ្ស៊ីប "សៀវភៅនៃសេចក្តីមរណ" ដែលជាអត្ថបទណែនាំសម្រាប់ការរៀបចំធ្វើពិធីបុណ្យសពនៅអេហ្ស៊ីបបុរាណ។
យោងតាមគេហទំព័រសារព័ត៌មាន BBC បានឲ្យដឹងថា មឈូសចំនួន៣០នឹងត្រូវដាក់តាំងបង្ហាញនៅសារមន្ទីរ Grand Egypt ថ្មីដែលកំពុងសាងសង់នៅឡើយនៅក្នុងទីក្រុង ហ្គីហ្សា៕
ចង់ជ្រាបច្បាស់សូមទស្សនាវីដេអូខាងក្រោម៖