អង់គ្លេស៖ គោលដៅរបស់ក្រុមបិសាចក្រហម Manchester United កីឡាករ Richarlison បានយល់ព្រមបន្តកុងត្រាថ្មីរយៈពេល៥ឆ្នាំ ជាមួយនឹងក្លិបស្ករគ្រាប់ Everton កាលពីថ្ងៃអង្គារម្សិលមិញនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កីឡាករ Richarlison បាននិយាយពីអារម្មណ៍របស់ខ្លួនជុំវិញការបន្តកុងត្រាថ្មីជាមួយនឹងក្លិបថា៖
"អ្នកគាំទ្រមានក្តីស្រឡាញ់ច្រើនចំពោះខ្ញុំ ហើយខ្ញុំនឹងព្យាយាមផ្តល់ក្តីស្រឡាញ់ទាំងអស់នេះតាមរយៈអ្វីដែលអាចធ្វើបាននៅលើទីលាន។ ខ្ញុំមានបំណងបន្តការគោរពទៅដល់អាវមួយនេះ និងធ្វើឲ្យអ្នកគាំទ្រសប្បាយចិត្ត។"
អ្នកចាត់ការទូទៅសញ្ជាតិព័រទុយហ្កាល់លោក Marco Silva បានបង្ហើបថា មុនពេលដែលកីឡាករ Richarlison សម្រេចចិត្តបន្តកុងត្រាថ្មី មិនមែនមានតែក្លិប Manchester United នោះទេ ដែលចាប់អារម្មណ៍ទៅលើខ្សែប្រយុទ្ធសញ្ជាតិប្រេស៊ីលរូបនេះ ក្នុងនោះនៅមានក្លិបធំៗជាច្រើនទៀតនៅអឺរ៉ុប ដោយលោកលើកឡើងថា៖
"ខ្ញុំជឿជាក់ថាមិនមែនមានតែ Manchester United នោះទេ ដែលចង់បានរូបគេ នៅមានក្លិបផ្សេងៗទៀត ដូច្នេះក្នុងនាមជាក្លិបពួកយើងត្រូវព្យាយាមឲ្យអស់ពីលទ្ធភាពដើម្បីរក្សាទុកកីឡាករឆ្នើមៗ។"
គួររម្លឹកផងដែរថាកីឡាករវ័យ២២ឆ្នាំរូបនេះ ត្រូវបានក្លិប Everton ផ្ទេរយកពីក្លិប Watford កាលពីឆ្នាំ២០១៨ ជាមួយនឹងតម្លៃ ៣៩,២លានអឺរ៉ូ (ឬប្រហែល៤៣,៤លានដុល្លារអាមេរិក) ដោយបង្ហាញខ្លួនសរុបបានចំនួន៥៥ប្រកួត ស៊ុតបញ្ចូលទីបាន២០គ្រាប់និងបញ្ជូនបាល់ឲ្យមិត្តរួមបញ្ចប់ទីបាន៤ដង៕
ប្រភព៖ theguardian
Bong I.T