រាជធានីភ្នំពេញ ៖ ដើម្បីពង្រឹងការគោរពច្បាប់ចរាចរណ៍ផ្លូវមន្ត្រីជាន់ខ្ពស់នៃអគ្គស្នងការដ្ឋាននគរបាលជាតិបានអះអាងថា នៅពេលខាងមុខនេះ សមត្ថកិច្ចនឹងចុះទៅចាប់ពិន័យម្ចាស់រថយន្តណាដែលបើកល្មើសភ្លើងស្តុប និងស្លាកសញ្ញាចរាចរណ៍ដល់ផ្ទះតែម្តង ។ ថ្លែងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក រយៈពេល១០ខែ នារសៀលថ្ងៃទី០៣ ខែធ្នូនេះ នៅទីស្តីការក្រសួងសាធារណការ និងដឹកជញ្ជូន ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកនាយកនាយឧត្តមសេនីយ៍ហ៊ឹម យ៉ាន អគ្គស្នងការរងនៃអគ្គស្នងការនគរបាលជាតិ ក្រសួងមហាផ្ទៃបានលើកឡើងថា សមត្ថកិច្ចបានរៀបចំកាមេរ៉ាសុវត្ថិភាពដាក់តាមស្តុបទាំងអស់នៅក្នុងរាជធានីភ្នំពេញបណ្ដើរៗរួចហើយ ។
លោកឧត្តមសេនីយ៍បានឲ្យដឹងផងដែរថា សមត្ថកិច្ចនឹងចុះទៅចាប់ដល់រថយន្តណាដែលមិនគោរពច្បាប់ចរាចរណ៍ដែលមានដូចជា រថយន្តដែលមិនគោរពភ្លើងស្តុបក្រហមដោយបើកឆ្លងកាត់ រថយន្តដែលចតកន្លែងហាមឃាត់ជាដើម ។ ព្រោះថា នៅតាមភ្លើងស្តុបមានកាមេរ៉ា សុវត្ថិភាពបំពាក់ដោយថតបានស្លាកលេខរថយន្ត រួចហើយយទៅស្គែន ដើម្បីឆែករកឈ្មោះម្ចាស់រថយន្ត រួចហើយសមត្ថកិច្ចចុះទៅពិន័យដល់ផ្ទះតែម្តង ។
លោកនាយឧត្តមសេនីយ៍ហ៊ឹម យ៉ាន បានបញ្ជាក់ថា «ឥឡូវនេះការបំពាក់ឧបករណ៍កាមេរ៉ានៅភ្នំពេញបានប្រើប្រាស់បានល្អណាស់ ព្រោះមានការសម្រួលបច្ចេកទេសរួចហើយ ។ នៅពេលខាងមុខនេះ មានការឈានដល់ពិន័យតាមរយៈកាមេរ៉ានេះចំពោះអ្នកមិនគោរពភ្លើងសញ្ញាតាមដងផ្លូវ ភ្លើងស្តុប ។ យើងថតយកលេខយានយន្តរថយន្តបានយើងនឹងស្រាវជ្រាវរកអត្តសញ្ញាណដល់ផ្ទះ ហើយចេញប័ណ្ណពិន័យតែម្តង» ។
លោកហ៊ឹម យ៉ាន ក៏បានឲ្យលើកឡើងថា នៅពេលចាប់បានយានយន្តដែលមិនគោរពច្បាប់ចរាចរណ៍ស្លាកសញ្ញាចរាចរណ៍នោះនឹងធ្វើការផ្សព្វផ្សាយតាមបណ្តាញសង្គមនូវយានយន្តនោះ ស្លាកលេខយានយន្តនោះ ដើម្បីឲ្យមហាជនរិះគន់ផងដែរ ។ ការធ្វើបែបនេះ ដើម្បីពញ្ញាក់ស្មារតីដល់មនុស្សទូទៅចេញខ្មាសអៀន និងគោរពច្បាប់ចរាចរណ៍ ។
ពាក់ព័ន្ធគ្រោះថ្នាក់ចរាចរណ៍វិញលោក ហ៊ឹម យ៉ាន អះអាងថា បច្ចុប្បន្ននេះមានប្រតិកម្មពីមហា ជនរឿងគ្រោះថ្នាក់ចរាចរណ៍តាមបណ្តាញសង្គម មានសន្ទុះខ្លាំង ទោះបីជាសមត្ថកិច្ចមិនដឹងពីមូលហេតុក៏បណ្តាញសង្គមរកឃើញ ។ ក្នុងនោះមានផេកៗថ្មីដែលទើបបានបង្កើតដោយបានបង្ហោះយ៉ាងព្រោងព្រាតរហូតធ្វើឲ្យសមត្ថកិច្ចស្រាវជ្រាវឃាត់ជនល្មើសបានផងដែរ ។
លោកបន្តថា នៅក្នុងឆ្នាំ២០១៨ និង២០១៩នេះ កំណើនការនាំចូលយានយន្តមានការកើនឡើងប្រមាណជាង៣០% និងតម្រូវការដឹកជញ្ជូនកើនឡើងធ្វើឲ្យផ្លូវថ្នល់ចង្អៀត និងកកស្ទះចរាចរណ៍។ លោកបានបន្ថែមថា បច្ចុប្បន្ននេះ ស្មារតីរបស់ប្រជាពលរដ្ឋដែលធ្វើដំណើរតាមផ្លូវមានការខ្លាចនគរបាលជាងខ្លាចច្បាប់ ហើយសមត្ថភាពមន្ត្រីអនុវត្តច្បាប់នៅមានកម្រិត និងគុណភាព ការងារមិនទាន់ឆ្លើយតបនឹងតម្រូវដោយសារខ្វះមធ្យោបាយ សម្ភារប្រើប្រាស់ និងការគ្រប់គ្រងមធ្យោបាយនៅមានចន្លោះប្រហោងដោយមិនអាចរកឃើញម្ចាស់យានយន្ត មួយតាមរយៈទិន្នន័យដែលចុះបញ្ជីតាមរយៈការផ្ទេរកម្មសិទ្ធិ ឬការផ្លាស់ប្តូរទីលំនៅ…៕ កែសម្រួលដោយ ៖ សុឃាក់
ប្រភព៖ កោះសន្តិភាព
Bong I.T