អាមេរិក៖ នៅឆ្នាំ២០២០ខាងមុខនេះគឺជាឆ្នាំដែលនឹងត្រូវបោះឆ្នោតជ្រើសរើសប្រធានាធិបតីថ្មីរបស់អាមេរិក ហើយក្រុមហ៊ុនបច្ចេកវិទ្យាជាច្រើនកំពុងផ្លាស់ប្ដូរគោលការផ្សាយពាណិជ្ជកម្មថ្មីរបស់ខ្លួនផងដែរ។ កាលពីខែមុនក្រុមហ៊ុន Google​ រួមជាមួយនឹង YouTube បានកែប្រែគោលការថ្មីស្ដីពីការផ្សាយពាណិជ្ជកម្មទាំងឡាយណាដែលទាក់ទងនឹងនយោបាយ។ ឥឡូវពាណិជ្ជកម្មទាក់ទងនឹងនយោបាយត្រូវបានដាក់ផ្សាយមានចំនួនកំណត់ ដោយវានឹងបង្ហាញឲ្យឃើញតែចំពោះមនុស្សមួយចំនួនតែប៉ុណ្ណោះ។ មួយរយៈចុងក្រោយនេះ Google និង YouTube បានដកចោលការផ្សាយពាណិជ្ជកម្ម៣០០ជាងរបស់លោក Trump ដោយសារការល្មើសនឹងគោលការណ៍ថ្មីរបស់ក្រុមហ៊ុន។

ទាំងនេះគឺជាផ្ទាំងពាណិជ្ជកម្មរបស់លោក​  Trump ដែលត្រូវបានដកចោល

អ្នកស្រី Susan Wojcicki ដែលជានាយកប្រតិបត្តិក្រុមហ៊ុន YouTube បានឲ្យដឹងថាក្រុមការងារបស់អ្នកស្រីបានដកចោលពាណិជ្ជកម្មមួយចំនួនរបស់លោកប្រធានាធិបតីអាមេរិក Donald Trump ដោយសារតែល្មើសគោលការណ៍របស់ក្រុមហ៊ុន ប៉ុន្តែមិនបានបញ្ជាក់ឲ្យច្បាស់ថាតើល្មើសត្រង់ចំណុចណាមួយឡើយ។

អ្នកស្រី Susan Wojcicki ដែលជានាយកប្រតិបត្តិក្រុមហ៊ុន YouTube

ក្នុងរបាយការណ៍បានបញ្ជាក់ថាពាណិជ្ជកម្មរបស់លោក Trump បានដាក់ផ្សាយពីរទៅបីថ្ងៃមុនពេលត្រូវបានគេដកចោល។ គួររម្លឹកផងដែរថាកាលពីខែមុនក្រុមហ៊ុន Twitter និង SnapChat ក៏បានកំណត់គោលការណ៍ថ្មីស្ដីពីការផ្សាយពាណិជ្ជកម្មដែលទាក់ទងនឹងនយោបាយដូចគ្នា៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]