ភ្នំពេញ៖ ជាការពិតណាស់ថាមនុស្សម្នាក់ៗ មានចំណង់ចំណូលចិត្ត រួមទាំងការគិតផ្សេងៗពីគ្នា ដែលអ្នកខ្លះចូលចិត្តការធ្វើការងារ រីឯចំណែកអ្នកខ្លះទៀត មានទំនោរចិត្តទៅខាងវិស័យកសិកម្ម ផ្តោតលើការដាំដុះ ការចិញ្ចឹមសត្វជាដើម។ យ៉ាងណាមិញ បើទោះ ប្រទេសកម្ពុជាជាប្រទេសមួយដែល អំណោយផលខាងវិស័យកសិកម្ម ហើយមានប្រជាជន ប្រកបរបរកសិកម្មនេះ មួយភាគធំក៏ពិតមែន តែបើងាកទៅមើលទាក់ទងនឹង បច្ចេកទេសរួមទាំងតិចនិកមួយចំនួន ក្នុងការអនុវត្តន៍ដើម្បី ទទួលបាននៅទិន្នផលខ្ពស់ ក៏នៅតែមានចំណុចខ្វះខាតនៅឡើយផងដែរ។
លោក មាស សីហា ដែលជានិស្សិតឆ្នាំទី៤ នៃសាកលវិទ្យាល័យភូមិន្ទកសិកម្ម ផ្នែកវិទ្យាសាស្រ្តជលផល ទាក់ទងទៅលើការចិញ្ចឹមប្រភេទសត្វផ្សេងៗ ដែលមានដូចជាត្រី កង្កែប ជាដើមនោះ។ សព្វថ្ងៃនេះលោកកំពុងតែចុះធ្វើ ការអនុវត្តន៍ផ្ទាល់នៅ ក្នុងកសិដ្ឋាន របស់សាលាលោកនេះតែម្តង។ ជារួមមកទល់នឹងពេលនេះលោក សីហា និងមិត្តភក្តិរបស់លោក ក៏ទទួលបានជាលទ្ធផល រួមទាំងទិន្នផលពីការចុះពិសោធន៍ផ្ទាល់នេះ ដែល។ ជាក់ស្តែងលោកមានជា ការចិញ្ចឹមប្រភេទត្រីដូចជា ត្រីរស ត្រីទីលាប់យ៉ា ត្រីអណ្តែង រួមទាំងកង្កែប ដែលមកទល់នឹងពេលនេះ រូបលោកក៏បានបញ្ចេញយកទៅ លក់ នៅលើទីផ្សារខ្លះៗ រួចមកហើយផងដែរ។
ចំណែកឯពូជត្រីដែលលោកជ្រើសរើស យកមកចិញ្ចឹមគឺមានប្រភេទត្រីខ្លះ ត្រូវទិញយកមកពីខាងក្រៅ ដូចជាពីខាងព្រែកព្នៅ ចំណែកកង្កែបកាលពីមុនលោកក៏ទិញពូជមកពីគេដែរ ក៏ប៉ុន្តែពេលបច្ចុប្បន្ននេះពូជកង្កែបគឺ អាចបង្កាត់បានដោយខ្លួនឯង ហើយប្រភេទត្រីខ្លះទៀត ក៏អាចធ្វើការបង្កាត់ដោយខ្លួនឯងបាន នៅក្នុងកសិដ្ឋាននេះផ្ទាល់តែម្តង។ ជាមួយគ្នានេះលោក សីហា ក៏បានបញ្ជាក់ប្រាប់ផងដែរថា មូលហេតុចម្បង ដែលលោកសម្រេចចិត្តជ្រើសរើស យកប្រភេទត្រីអណ្តែងនេះ យកមកចិញ្ចឹមនោះក៏ព្រោះតែវាជា ប្រភេទត្រីដែលងាយស្រួល ក្នុងការចិញ្ចឹមធន់នឹងជំងឺបើទោះបីជា ស្ថានភាពទឹកមិនល្អ ឡើងស្អុយយ៉ាងណាក៏ដោយ ឬកង្វះជាមួយនឹងអុកស៊ីសែន ក៏វាមិនសូវជាប៉ះពាល់ហើយធន់ ថែមទាំងអាចឆាប់ទទួលបានផលលឿន នឹងឆាប់ដល់តម្រូវការ លើទីផ្សារថែមទៀតផង។ ពោលគឺចំណាយរយៈពេល ក្នុងការមើលថែនិង ចិញ្ចឹមត្រឹមតែ២ខែប៉ុណ្ណោះគឺ អាចទទួលផលបានហើយ។ ចំណែកចំណីសម្រាប់ពពួកត្រីប្រភេទនេះ ក៏មានភាពងាយស្រួលនឹងសាមញ្ញបំផុត។ យ៉ាងណាមិញ ចំពោះចំណីត្រីគឺ យើងអាចរកបានពីកាកសំណល់ ក្នុងផ្ទះបាយឬក៏អាចជាចំណី ដែលទិញស្រាប់នៅ លើទីផ្សារក៏បានដូចគ្នាផងដែរ។
លើសពីនេះទៀតនោះលោក មាស សីហា ក៏បានចែករំលែក នៅតិចនិកមួយចំនួនក្នុង ការជ្រើសរើសរកទីតាំងសាកសម ក្នុងការធ្វើស្រះដែលលោកបានលើកឡើងថា ទីមួយ ប្រជាកសិករគ្រប់រូប គួរតែជ្រើសរើសរកទីតាំងណា ដែលនៅជិតប្រភពទឹកដើម្បីងាយស្រួល បញ្ចេញបញ្ចូលទឹកងាយស្រួលប្តូរទឹក នៅពេលដែលមានបញ្ហាទឹកស្អុយ យើងអាចងាយស្រួល ក្នុងការប្តូរវាបាន។ រីឯចំណុចទី២ ក៏សំខាន់ដែរនោះគឺ មិនគួរជ្រើសរើសទីតាំងណា ដែលមានព្រៃដុះជុំវិញទេ ព្រោះវាអាចបាំងម្លប់ ដែលអាចបណ្តាលឲ្យខ្វះ អុកស៊ីសែនដល់ត្រីបាន។
ជាមួយគ្នានេះដែល សម្រាប់អ្នកដែលចង់បង្កើតមុខរបរ ខាងចិញ្ចឹមត្រីនេះគួរតែយល់ដឹងបន្ថែមនោះគឺ សម្រាប់ជាប្រភេទត្រីអណ្តែង ក្នុងមួយម៉ែត្រការ៉េនៃស្រះត្រី យើងអាចដាក់ត្រីបានពីចន្លោះ ពី៧០ទៅ៨០ត្រី រីឯត្រីផ្សេងៗទៀត ដូចជាប្រភេទត្រីទីលាប់យ៉ា និងត្រីរសយើងអាចដាក់ បានពី៥ទៅ៦ក្បាលដូចគ្នា។
ចំណែកចំណុចដ៏សំខាន់មួយទៀតនោះ ដែលប្រជាកសិករទូទៅ គួរតែយល់ដឹងទាក់ទងទៅនឹង បច្ចេកទេសក្នុងការមើលថែទាំត្រី ដើម្បីធ្វើយ៉ាងណាឲ្យទទួលបាន នៅទិន្នផលល្អ នោះគឺទី១ មិនគួរមើលរំលង នៅគុណភាពនៃទឹកនោះទេ ពីព្រោះទឹកគឺជាប្រភពមួយដ៏សំខាន់ ក្នុងការរបស់នៅរបស់ត្រី ដូច្នេះដើម្បីគ្រប់គ្រងទៅលើ គុណភាពទឹកនេះបានយើងក៏ត្រូវ គ្រប់គ្រងទៅលើចំណីដូចគ្នាផងដែរ។ ពោលគឺនៅរាល់ពេលដែលយើងឲ្យចំណីសល់ គឺដាច់ខាតត្រូវតែយកចំណីទាំងនោះ ចេញពីក្នុងទឹកនោះវិញ ធ្វើយ៉ាងណាកុំឲ្យមាន សំណល់សល់ក្នុងទឹកនោះឲ្យសោះ បើមិនដូច្នោះទេទឹកនឹងឆាប់ឡើងជាស្អុយ ដែលវាអាចធ្វើឲ្យប៉ះពាល់ដល់គុណភាពត្រី រួមទាំងអាចធ្វើឲ្យត្រីងាប់ថែមទៀតផង។
ជាចុងក្រោយលោក សីហា ក៏មានជាមតិផ្តាំផ្ញើមួយចំនួនទៅដល់ ប្រជាកសិករឬប្រជាពលរដ្ឋទូទៅឲ្យងាកមក ចាប់អារម្មណ៍លើមុខរបរចិញ្ចឹមត្រីនេះវិញ ដោយលោកបានបញ្ជាក់ថា ការចិញ្ចឹមត្រីនេះគឺ មានភាពងាយស្រួលនោះទេ ហើយយើងអាចឆ្លៀតធ្វើវាបាន បន្ទាប់ពីពេលទំនេរ ឬការធ្វើការខាងក្រៅប្រចាំថ្ងៃ ដោយចំណាយពេលត្រឹមតែមួយម៉ោង ទៅពីរម៉ោងប៉ុណ្ណោះជារៀងរាល់ថ្ងៃ លើការដាក់ចំណី និងលើការមើលថែ។ ម្យ៉ាងវិញលោកក៏បានបន្ថែមទៀតថា ក្នុងការជ្រើសរើសពូជត្រីគួរតែ ជ្រើសរើសយកប្រភេទត្រីណា ដែលឆាប់ដល់ទំហំទីផ្សារ ពីព្រោះវាអាចធ្វើឲ្យយើងចំណេញចំណីនិង ពេលវេលាក្នុងការមើលថែវាផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ
