ប្រជាជន៩មុឺនគ្រួសារនៅក្នុងខេត្តមួយនៃប្រទេសហ្វីលីពីនត្រូវបានជម្លៀសដោយសារតែខ្យល់ព្យុះទីហ្វុង

ហ្វីលីពីន៖ លោក Al Francis Bichara ដែលជាអភិបាលខេត្ត Albay បានបញ្ជាឲ្យជម្លៀសមនុស្សជាង៥០០,០០០នាក់ដែលត្រូវជា៩០,០០០គ្រួសារទូទាំងខេត្ត ដោយសារតែព្យុះទីហ្វុង Tisoy កំពុងបោកបក់តំបន់ Bicol។ ក្រុងផ្សេងៗនៅខេត្ត Albay បានទទួលរងគ្រោះដោយសារព្យុះនេះដូចជាការហូរភក់ល្បាប់ ការរអិលបាក់ដី ទឹកជំនន់ និងខ្យល់បក់ជាដើម។ មនុស្ស១០៦,២១១នាក់ដែលត្រូវជា២៥,៧៧០គ្រួសារត្រូវបានជម្លៀសរួចរាល់ ហើយការជម្លៀសនេះនៅតែបន្តចាប់ពីថ្ងៃនេះរហូតដល់ព្រឹកថ្ងៃស្អែក។

លោកអភិបាលខេត្តបានដាស់តឿនប្រជាជនឲ្យទុកដាក់យានជំនិះរបស់ខ្លូននៅទីទួលខ្ពស់ ពីព្រោះទឹកជំនន់អាចនឹងកើតមានបន្ទាប់ពីមានភ្លៀងខ្លាំង នេះបើតាមសេចក្ដីថ្លែងការរបស់លោកអភិបាលខេត្តកាលពីថ្ងៃអាទិត្យម្សិលមិញ។ មន្រ្តីសុខុមាលភាពសង្គមលោក Eva Grageda បានប្រាប់ឲ្យដឹងថាអាជ្ញាធរស្បៀងអាហារជាតិបានត្រៀមអាហារ ២,០០០កញ្ចប់រួមមានអង្ករ អាហារកំប៉ុង ភេសជ្ជៈ និងកាហ្វេសម្រាប់ជនភៀសខ្លួនរួចរាល់ហើយ។

បន្ទាប់ពីព្យុះបានបញ្ចប់ ការិយាល័យសុខមាលភាពសង្គមខេត្ត និងក្រុងទាំងអស់នឹងត្រូវធ្វើរបាយការណ៍ភ្លាមៗស្ដីតម្រូវការរបស់គ្រួសាររងគ្រោះដោយសារគ្រោះធម្មជាតិមួយនេះដូចជាស្បៀងជាដើម៕