នៅ Premier League ដេញគ្រូ១ទៀតហើយ! អ្នកចាត់ការទូទៅសញ្ជាតិអេស្ប៉ាញលោក Sanchez Flores ត្រូវបានក្លិប Watford បណ្ដេញចេញ ក្រោយដឹកនាំក្រុមបាន៣ខែ

អង់គ្លេស៖ ក្លិប Watford បានបណ្ដេញគ្រូបង្វឹកចេញជាលើកទីពីរក្នុងរដូវកាលនេះ ដោយកាលពីម្សិលមិញ ក្លិបបានសម្រេចបណ្ដេញអ្នកចាត់ការទូទៅសញ្ជាតិអេស្ប៉ាញ លោក Quique Sanchez Flores ក្រោយកាន់ដំណែងបានរយៈពេល ៨៥ថ្ងៃ។

ក្លិប Watford បានសម្រេចចិត្តចែកផ្លូវជាមួយគ្រូបង្វឹកវ័យ៥៤ឆ្នាំរូបនេះ បន្ទាប់ពីលោកដឹកនាំក្រុមរងបរាជ័យក្រោមថ្វីជើងក្រុម Southampton ២-១ ក្នុងក្របខណ្ឌ​ Premier League កាលពីថ្ងៃសៅរ៍កន្លងទៅនេះ។

នេះជាលើកទីពីរហើយដែលលោក Sanchez Flores ត្រូវបានក្លិប Watford បណ្ដេញចេញ ដោយលោកធ្លាប់ដឹកនាំក្រុមមួយនេះ រយៈពេល១ឆ្នាំកាលពីឆ្នាំ២០១៥-២០១៦ ចំណែកឯរដូវកាលនេះ លោកត្រូវបានក្លិបអញ្ជើញមកដឹកនាំវិញជំនួសលោក Javi Gracia ដែលដឹកនាំក្រុមចាប់ផ្ដើមរដូវកាលមិនបានល្អ។

យ៉ាងណាមិញលោក Sanchez Flores នៅតែមិនមានលទ្ធភាពក្នុងការជួយស្រោចស្រង់ក្រុម Watford បាន ដោយអំឡុងពេល១០ប្រកួតដែលលោកដឹកនាំ លោកស្វែងរកជ័យជម្នះឲ្យក្រុមបានតែ១ដងគត់។

គួរបញ្ជាក់ផងដែរថាបច្ចុប្បន្ន ក្រុម Watford កំពុងឈរបាតតារាង ដោយមានត្រឹម៨ពិន្ទុក្នុងដៃ គិតត្រឹម១៤សប្ដាហ៍កន្លងទៅនេះក្នុងក្របខណ្ឌ Premier League ដោយឈ្នះ១ដង ស្មើ៥ដង និងចាញ់៨ដង៕

ប្រភព៖ theguardian