ចិន៖ បច្ចុប្បន្នប្រជាជនក្នុងប្រទេសចិនតម្រូវឲ្យប្រើមុខងារស្កេនមុខមុននឹងចុះឈ្មោះប្រើប្រាស់សេវាកម្មទូរសព្ទថ្មី ពីព្រោះវាងាយស្រួលដល់មន្ត្រីអាជ្ញាធរស្វែងរកអត្តសញ្ញាណរបស់អ្នកប្រើប្រាស់អ៊ីនធឺណេតរាប់លាននាក់ទូទាំងប្រទេស។ នៅពេលទិញទូរសព្ទថ្មី ឬប្រើប្រាស់កញ្ចប់សេវាកម្មទិន្នន័យនៅលើទូរសព្ទ អ្នកប្រើប្រាស់ក្នុងប្រទេសចិនតម្រូវឲ្យបង្ហាញអត្តសញ្ញាណប័ណ្ណនិងប្រើប្រាស់មុខងារស្កេនមុខ ដើម្បីឲ្យច្បាស់ថាតើអត្តសញ្ញាណប័ណ្ណ និងមុខមាត់សព្វថ្ងៃត្រូវគ្នាដែរឬអត់។

រូបតំណាង

កាលពីឆ្នាំ២០១៧កន្លងទៅ ប្រជាជនចិនតម្រូវឲ្យប្រើឈ្មោះពិត និងអត្តសញ្ញាណពិតមុននឹងចុះឈ្មោះប្រើប្រាស់សេវាកម្មអ៊ីនធឺណេត ពីព្រោះការធ្វើបែបនេះគឺងាយស្រួលដល់ការគ្រប់គ្រងនិងពិនិត្យមើលស្ថានភាពជាក់ស្ដែង។ ក្រសួងឧស្សាហកម្មនិងបច្ចេកវិទ្យាព័ត៌មានរបស់ប្រទេសចិនបានឲ្យដឹងថារដ្ឋាភិបាលកំពុងជំរុញឲ្យអ្នកដែលប្រើប្រាស់លេខទូរសព្ទ និងគណនីអ៊ីនធឺណេតទាំងឡាយដែលគ្មានឈ្មោះប្រើប្រាស់ច្បាស់លាស់ងាកមកដាក់អត្តសញ្ញាណពិតវិញ ព្រោះវាផ្ដល់ភាពងាយស្រួលឲ្យមន្ត្រីអជ្ញាធរពង្រឹងប្រព័ន្ធសុវត្ថិភាពនិងបង្រាបការឆបោកនៅលើប្រព័ន្ធអ៊ីនធឺណេត។​

មុខងារសំគាល់មុខ

ច្បាប់ថ្មីមួយនេះបានប្រកាសកាលពីខែកញ្ញាកន្លងទៅនេះ ចំណែកប្រជាជនក្នុងប្រទេសក៏មានការព្រួយបារម្ភពីអត្តសញ្ញាណពិតរបស់ពួកគេដែលកំពុងកាន់កាប់ដោយរដ្ឋាភិបាល។ អ្នកប្រើប្រាស់មួយចំនួនបានសម្ដែងអារម្មណ៍ភ័យព្រួយថាអត្តសញ្ញាណពិតរបស់ពួកគេដូចជាឈ្មោះនិងអាស័យដ្ឋានអាចនឹងបែកធ្លាយ ហើយករណីចាប់ជំរិត និងការគំរាមកំហែងផ្សេងៗតាមរយៈទូរសព្ទនិងអ៊ីនធឺណេតអាចនឹងកើតមានផងដែរ។ មុខងារសំគាល់មុខគឺជាវិធីថ្មីសម្រាប់ឲ្យប្រព័ន្ធគ្រប់គ្រងធ្វើការអង្កេតនិងស្រង់ស្ថិតិពីអ្នកប្រើប្រាស់៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]