ខេត្តព្រះសីហនុ ៖ លោក ទេព មុនី អភិបាលរងស្រុកស្ទឹងហាវ ខេត្តព្រះសីហនុ បានមានប្រសាសន៍ឲ្យដឹងថា កាលពីរសៀលថ្ងៃទី២៨ ខែវិច្ឆិកា ឆ្នាំ២០១៩ កន្លងមកនេះបន្ទាប់ពីមានឧប្បត្តិហេតុមានមនុស្សចំនួន០៦នាក់បានបាត់បង់ជីវិតជាបន្តបន្ទាប់នៅចុងខែវិច្ឆិកា ឆ្នាំ២០១៩ ប្រជាពលរដ្ឋក៏បានសំណូមពរអាជ្ញាធរស្រុកស្ទឹងហាវឱ្យរៀបចំកម្មវិធីតាមបែបអបីយ៍ជំនឿ និមន្តព្រះសង្ឃចំនួន០៧អង្គសូត្រមន្តនៅសាលាស្រុកស្ទឹងហាវ បន្ទាប់មកនិមន្តព្រះសង្ឃតាមរថយន្តប្រោះព្រំទឹកមន្តតាមផ្លូវ តាមទីប្រជុំផ្សារ និងឃុំទាំង០៣នៅក្នុងស្រុកស្ទឹងហាវដើម្បីដេញឧបទ្រពចង្រៃចេញពីភូមិ ឃុំ ស្រុក កុំឲ្យមានហេតុការបាត់បង់ជីវិតមនុស្សបន្តទៀត ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោកអភិបាលរងបានបន្តឱ្យដឹងទៀតថា កម្មវិធីសូត្រមន្តខាងលើរដ្ឋបាលស្រុកស្ទឹងហាវបានរៀបចំឡើងតាមការស្នើរសុំតាមពេលវេលាខាងលើ និងមានការចូលរួមពីប្រជាពលរដ្ឋយ៉ាងច្រើនកុះករ ។
ប្រជាពលរដ្ឋនៅស្រុកស្ទឹងហាវខេត្តព្រះសីហនុជាច្រើននាក់បានឱ្យដឹងដូចៗគ្នាថា មុនមានហេតុការមានមនុស្សបាត់បង់ជីវិតអស់ចំនួន០៦នាក់ដែលកើតឡើងក្នុងហេតុការផ្សេងៗពីគ្នា មានប្រជាពលរដ្ឋនៅស្រុកស្ទឹងហាវបានយល់សប្តិឃើញមានគេបើករថយន្តតូរីសមួយគ្រឿង និងមានរថយន្តធុនតូចមួយគ្រឿងទៀតមានមនុស្សម្នាក់ឈរនៅលើរថយន្តមានភិនភាគជាលោកម្ចាស់ប៉ាវនៅក្នុងរឿងភាគចិនមកស្រែករកមនុស្សប្រុសដឹកយកទៅ តែមិនបញ្ជាក់ថាយកទៅធ្វើការអ្វីនោះទេ ។ បន្ទាប់មកក៏មានហេតុការមនុស្សបាត់បង់ជីវិតជាបន្តបន្ទាប់នៅចុងខែវិច្ឆិកាតែម្តង ។
ប្រភពខាងលើបានបន្តឱ្យដឹងទៀតថា ប្រជាពលរដ្ឋនៅក្នុងស្រុកខាងលើមានការភ័យខ្លាចគ្រប់ៗគ្នាហើយបាននាំគ្នាធ្វើរូបទីងមោងដាក់តាមមុខផ្ទះរៀៗខ្លួនតាមបែបអបីយ៍ជំនឿដើម្បីបញ្ចៀសគ្រោះចង្រៃ និងបណ្តេញខ្មោចព្រាយបីសាច ។
ប្រភពខាងលើបានបញ្ជាក់ឱ្យដឹងថា នេះជាករណីលើកទី០២ហើយបន្ទាបពីហេតុការខាងលើបានកើតឡើងនៅអំឡុងឆ្នាំ១៩៨០-១៩៨១កន្លងមកដែលមានមនុស្សបាត់បង់ជីវិតអស់ជាច្រើននាក់ក្រោយពីមានសត្វឈ្លូសមួយក្បាលរត់ចូលមកក្នុងភូមិនៅក្នុងស្រុកស្ទឹងហាវបន្ទាប់មកប្រជាពលរដ្ឋក៏បាននិមន្តព្រះសង្ឃសូត្រមន្តប្រោះព្រំរំដោះគ្រោះទើបស្ងប់ស្ងាត់ទៅវិញ ៕
ប្រភព៖ កោះសន្តិភាព
Bong I.T