Real Madrid ត្រៀមកញ្ចប់ទឹកប្រាក់ ៧៣លានផោនបូកជាមួយនឹងកីឡាករឆ្នើម២រូប ជាថ្នូរប្ដូរយក Pogba នៅទីផ្សារដោះដូរកីឡាករខែមករាខាងមុខ

អេស្ប៉ាញ៖ ក្លិបអធិរាជស Real Madrid ត្រូវបានគេរាយការណ៍ថាបានត្រៀមកញ្ចប់ទឹកប្រាក់៧៣លានផោន (ឬប្រហែល៩៣លានដុល្លារអាមេរិក)​ បូករួមជាមួយនឹងកីឡាករឆ្នើម២រូបរួមមានកីឡាករ Mariano Diaz និង James Rodriguez ជាថ្នូរប្ដូរយកខ្សែបម្រើសញ្ជាតិបារាំងកីឡាករ Paul Poga ពីក្លិបបិសាចក្រហម Manchester United។

កីឡាករ Paul Pogba បង្ហាញខ្លួនក្នុងក្របខណ្ឌ Premier League បានតែ៥ប្រកួតប៉ុណ្ណោះ ក្នុងរដូវកាលនេះ បន្ទាប់ពីជួបបញ្ហារបួសក.ជើងកាលពីខែកញ្ញា ដោយក្លិបរំពឹងថារូបគេនឹងអាចត្រឡប់មកហ្វឹកហាត់បានក្នុងសប្ដាហ៍នេះវិញ។

ហើយកាលពីពេលថ្មីនេះៗ គេហទំព័រ Cope បានបញ្ជាក់ថាខ្សែបម្រើរូបនេះបានបដិសេធមិនចូលប្រកួត ដោយមានបំណងចង់ផ្ទេរទៅលេងឲ្យលោក Zinedine Zidane នៅកីឡដ្ឋាន Santiago Bernabeu។

យ៉ាងណាមិញដោយយោងតាមកាសែត​ The Mirror បានឲ្យដឹងថាប្រធានក្លិប Real Madrid លោក Florentino Perez កំពុងត្រៀមកញ្ចប់ទឹកប្រាក់ប្រមាណ ៧៣ លានផោនសម្រាប់ Paul Pogba លើសពីនេះ Real ក៏នឹងបូកបញ្ចូលកីឡាករ ២រូប ក្នុងកិច្ចព្រមព្រៀងនេះផង។

រួមមានកីឡាករ James Rodriguez ដែលបង្ហាញទម្រង់លេងល្អអំឡុងពេលលេងឲ្យក្លិប Bayern Munich ក្នុងលក្ខខណ្ឌខ្ចីជើងរយៈពេល២ឆ្នាំមុន ដោយបង្ហាញខ្លួនបាន៩ប្រកួតនិង ស៊ុតបញ្ចូលទីបាន១គ្រាប់ក្នុងរដូវកាលនេះ មួយវិញទៀតរូបគេក៏មានទំនាក់ទំនងខ្លាំងក្នុងការផ្ទេរមកកាន់ក្លិបនៅ Premier League ជាយូរណាស់មកហើយ។

 ចំណែកឯកីឡាករ១រូបទៀតនោះគឺខ្សែប្រយុទ្ធ Mariano Diaz ដែលមិនសូវមានឱកាសលេងក្រោមការដឹកនាំរបស់លោក Zidane ដោយក្នុងរដូវកាលនេះរូបគេមិនទាន់បានចូលលេងនៅឡើយទេសូម្បីតែ១ប្រកួត៕

ប្រភព៖ thesun