លោក Sarri បានស្នើឱ្យក្លិប Juventus ព្យាយាមចុះកុងត្រាយកជួរមុខរបស់ Chelsea ១រូប

អ៊ីតាលី៖ លោក Maurizio Sarri ដែលជាអ្នកចាត់ការទូទៅក្រុមសេះបង្កង់ Juventus ត្រូវបានគេរាយការណ៍ថា បានស្នើដល់ក្លិប អោយព្យាយាមចុះកុងត្រាយកអតីតកូនក្រុមរបស់លោកកីឡាករ Emerson Palmieri នាខែមករាខាងមុខនេះ។

លោក Sarri បានចូលមកដឹកនាំក្រុមសេះបង្កង់ Juventus ក្នុងរដូវកាល២០១៩/២០នេះ ក្រោមការដឹកនាំរបស់លោក បច្ចុប្បន្នក្រុមដែលមានមូលដ្ឋាននៅទីក្រុងទូរីនមួយនេះកំពុងឈរចំណាត់ថ្នាក់លេខ១ក្នុងក្របខណ្ឌ Serie A។

យោងតាមកាសែត Calciomercato បានអោយដឹងថាលោក Sarri ចាប់អារម្មណ៍ចង់បានខ្សែការពារស្លាបឆ្វេងរបស់ក្លិប Chelsea កីឡាករ Emerson ដែលជាអតីតកូនក្រុមរបស់លោក ដោយលោកបានស្នើសំណើជាក់លាក់មួយទៅកាន់ក្លិប អោយចរចាយកកីឡាកររូបនេះនាអំឡុងពេលទីផ្សារដោះដូរកីឡាករខែមករាខាងមុខ។

កីឡាករ Emerson បង្ហាញខ្លួនបាន២៧ប្រកួតក្រោមការដឹកនាំរបស់លោក Sarri នៅទឹកដី Stamford Bridge កាលពីរដូវកាលមុន ដោយបានដណ្ដើមកៅអីជម្រើស១១នាក់ដំបូងពីកីឡាករ Marcos Alonso ។

យ៉ាងណាមិញ ក្នុងរដូវកាលនេះក្រោមការដឹកនាំរបស់លោក Lampard រូបគេលេងបាន៨ប្រកួត ហើយត្រូវបានគេមើលឃើញថាកីឡាកររូបនេះ ក៏ជាផ្នែកមួយសំខាន់ក្នុងតំបន់ការពាររបស់ក្រុម Chelsea បច្ចុប្បន្នផងដែរ ដូច្នេះការចាកចេញអាចនឹងស្ថិតក្នុងការពិចារណា។

គួរអោយដឹងដែរថា កីឡាករ Emerson បានចាកចេញពីក្រុម Roma មកចូលរួមជាមួយក្រុម Chelsea កាលពីឆ្នាំ២០១៨ ក្នុងតម្លៃផ្ទេរ២០លានអឺរ៉ូ (ឬប្រហែល២២លានដុល្លារអាមេរិក) ដោយបង្ហាញខ្លួនសរុបបានចំនួន៤២ប្រកួត ស៊ុតបញ្ចូលទី១គ្រាប់៕

ប្រភព៖ Caughtoffside