ភ្នំពេញ៖ ធនាគារឯកទេស វីង (ខេមបូឌា) លីមីតធីត បានសហការឧបត្ថម្ភក្រសួងអប់រំ យុវជន និងកីឡា រៀបចំសិក្ខាសលាស្តិពី “អក្ខរកម្មហិរញ្ញវត្ថុ” នៅក្នុងខេត្តបាត់ដំបង កាលពីថ្ងៃទី១៩ ដល់ថ្ងៃទី២១ វិច្ឆិកា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់ ឯកឧត្តម សេរី ជំនៈ អនុរដ្ឋលេខាធិការ ក្រសួងអប់រំយុវជន និងកីឡា ដោយមានការចូលរួមពីសិក្ខាកាមប្រមាណជា ៣០០ នាក់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កម្មវិធីនេះត្រូវបានរៀបចំឡើងក្នុងគោលបំណងបញ្ជ្រាបការយល់ដឹងអំពីការប្រើប្រាស់ឧបករណ៍ហិរញ្ញវត្ថុមូលដ្ឋានលើប្រព័ន្ធឧបករណ៍ចល័ត បំពេញបន្ថែមចំណេះដឹងហិរញ្ញវត្ថុមូលដ្ឋានដល់យុវជន និងកាត់បន្ថយហានិភ័យនៃការជាប់បំណុលហួសកម្រិត ឬការក្លាយជាជនរងគ្រោះនៃក្រុមផ្តល់សេវាហិរញ្ញវត្ថុមិនស្របច្បាប់ ក៏ដូចជាសេវាឥណទានផ្សេងៗដែលមាននៅក្នុងព្រះរាជាណាចក្រកម្ពុជា។
លោក កែវ ជីវ៉ា តំណាងឲ្យក្រសួងអប់រំ យុវជន និងកីឡា បានឲ្យដឹងថា៖
“ចំណេះស្តីពីការគ្រប់គ្រងហិរញ្ញវត្ថុពិតជាមានសារៈសំខាន់ណាស់សម្រាប់យុវជន និងប្រជាជនទាំងអស់គ្នា ដោយឲ្យពួកគាត់មានផែនការហិរញ្ញវត្ថុច្បាស់លាស់ និងគេចផុតហានិភ័យនៃបំណុលផ្សេងៗ”។
សិក្ខាកាមដែលចូលរួមកម្មវិធីនេះរួមមាន លោកគ្រូ អ្នកគ្រូ គរុសិស្ស គរុនិស្សិតមកពីខេត្តបាត់ដំបង សៀមរាប និងបន្ទាយមានជ័យ ដែលពួកគាត់នឹងយកចំណេះដែលទទួលបានទៅចែករំលែកដល់សិស្សានុសិស្ស ក៏ដូចជាប្រជាជននៅតាមសហគមន៍របស់ពួកគាត់ផងដែរ។
លោក ស្រ៊ុន ឈាងស្រេង នាយកគ្រប់គ្រងអាជីវកម្មទីផ្សារអតិថិជននៃធនាគារឯកទេស វីង បានឲ្យដឹងថា៖
“ខ្ញុំរំពឹងយ៉ាងមុតមាំថាសិក្ខាកាម ដែលចូលរួមក្នុងកម្មវិធីរយៈពេល៣ថ្ងៃនេះ និងយកចំណេះមួយចំនួនដែលបានរៀនសូត្រយកទៅចែករំលែកដល់សមាជិកគ្រួសារ សហគមន៍និងសិស្សានុសិស្សដ៏ទៃផ្សេងទៀត ដើម្បីរួមចំនែកលើកកម្ពស់ជីវភាពប្រចាំថ្ងៃរបស់ពួកគេ និងជួយកាត់បន្ថយវិបត្តិហិរញ្ញវត្ថុផ្សេងដែលអាចកើតមានជាយថាហេតុ”។
ក្រៅពីឧបត្ថម្ភជាថវិការណ៍ និងសម្ភារៈមួយចំនួន វីង ក៏បានចែករំលែកចំណេះអំពីការប្រើប្រាស់ឧបករណ៍ហិរញ្ញវត្ថុមូលដ្ឋានលើប្រព័ន្ធឧបករណ៍ចល័ត ការសន្សំហិរញ្ញវត្ថុតាមវិធីផ្សេងៗ និងសេវាកម្មហិរញ្ញវត្ថុសម្រាប់យុវជន។
នេះជាកម្មវិធី “អក្ខរកម្មហិរញ្ញវត្ថុ” លើកទីពីរហើយដែលធនាគារឯកទេស វីង (ខេមបូឌា) លីមីតធីត បានសហការជាមួយក្រសួងអប់រំ យុវជននិងកីឡារៀបចំឡើង ដោយលើកទី១ត្រូវបានរៀបចំឡើងនៅក្នុងខេត្តកំពង់ចាមដោយមានការចូលរួមពីសិក្ខាកាមចំនួន ២៥០ នាក់ មកពីខេត្តកំពង់ចាម ក្រចេះ និងស្ទឹងត្រែង៕
Bong I.T