គ្រាន់តែរញ្ជួយដីនៅព្រំប្រទល់ថៃ-ឡាវសោះ ក៏អាចធ្វើឲ្យអគារមួយចំនួននៅក្រុងបាងកករង្គើដែរ

ថៃ៖  គ្រោះរញ្ជួយដីដ៏ខ្លាំងក្លាមួយបានកើតឡើងនៅរវាងភាគខាងជើងប្រទេសថៃ និងភាគពាយព្យប្រទេសឡាវកាលពីព្រឹកថ្ងៃព្រហស្បត្តិ៍នេះ និងបានធ្វើឲ្យអគារខ្ពស់ៗនៅក្រុងបាងកកញ័រផងដែរ។​​​​​ នេះបើយោងតាមការចុះផ្សាយរបស់កាសែតបាងកកប៉ុស្តិ៍ (Bangkok Post)។

អ្នករស់នៅខេត្តឈាងម៉ៃបានប្រាប់ថាការរញ្ជួយនេះមានរយៈពេលយ៉ាងយូរ ប៉ុន្តែមិនឃើញមានការបំផ្លាញ ឬខូចខាតធ្ងន់ធ្ងរនោះទេ។ អគារខ្ពស់ៗនៅក្រុងបាងកកបានរង្គើតិចៗអស់រយៈពេលជាងកន្លះនាទីដែលធ្វើឲ្យប្រជាជនមានការភ្ញាក់ផ្អើលយ៉ាងខ្លាំង។ ភូគព្ភសាស្ត្ររបស់សហរដ្ឋអាមេរិកបាននិយាយថាការរញ្ជួយដីដែលមានកម្លាំង៦.១រិកទ័រនៅព្រឹកថ្ងៃព្រហស្បតិ៍គឺប្រហែលស្ថិតនៅក្រោមដី១០គីឡូម៉ែត្រ។

គួរបញ្ជាក់ទៀតថាវាកើតឡើងនៅភាគពាយព្យនៃប្រទេសឡាវចម្ងាយប្រហែល៣១គីឡូម៉ែត្រពីស្រុក Chaloem Phrakiat ក្នុងខេត្ត Nan និងបានកើតឡើងនៅប្រហែលម៉ោង៧ព្រឹក។

ការរញ្ជួយកម្រិតមធ្យម៤.៦និង៥.៧រ៉ិចទ័របាន ធ្វើឲ្យកក្រើកតំបន់ដដែលពេញមួយយប់៕