រាជធានីភ្នំពេញ៖ កញ្ញា វង្ស ម៉ាលីន ម្ចាស់ជ័យលាភីមហោស្រពប្រឡងចម្រៀងខ្មែរជាសាកលឆ្នាំ២០១៩ ។ ជ័យលាភីនេះធ្វើឲ្យកេរ្តិ៍ឈ្មោះនាងឡើងខ្ពស់ត្រដែត ជាពិសេសនៅប្រទេសកាណាដាដែលនាងរស់នៅ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបន្ទាប់ពីជាប់ជ័យលាភីនៅកម្ពុជាមក វង្ស ម៉ាលីន បានបន្តស្នាក់នៅកម្សាន្ត ហើយទើបតែត្រឡប់ទៅកាន់ប្រទេសកាណាដាវិញកាលពីពេល ថ្មីៗកន្លងមកនេះ ។ នាងបានទៅរស់នៅទីនោះជិត១០ឆ្នាំមកហើយ ដោយនាងមានស្រុកកំណើតនៅខេត្តបាត់ដំបង ។
ដិតដាមអនុស្សាវរីយ៍ជាច្រើននៅលើទឹកដីមាតុភូមិ វង្ស ម៉ាលីន ឃ្លាតឃ្លាទាំងក្ដីនឹករឭក។ នាងបានសាងស្នាដៃដ៏ល្អ តាមរយៈក្លាយជាម្ចាស់ជ័យលាភីលេខ១ ក្រោមការវិនិច្ឆ័យយ៉ាងច្បាស់លាស់របស់គណៈកម្មការ ។ លើសពីនេះនាងត្រូវលោកជំទាវកិត្តិសង្គហបណ្ឌិតម៉ែន សំអន អនុញ្ញាតឲ្យជួបផ្ទាល់ ដោយស្រឡាញ់ពេញចិត្តទឹកដមសំឡេងរបស់នាង និងទទួលនាងជាកូនធម៌ទៀតផង ។
វង្ស ម៉ាលីន បាននិយាយឆ្លងឆ្លើយ តាមសារអេឡិចត្រូនិកជាមួយភ្នាក់ងារកោះសន្តិភាព ថានាងបានទៅដល់កាណាដា ដោយសុវត្ថិភាព ក្រោយពេលបំពេញការងារ និងដើរលេងកម្សាន្ត នៅលើទឹកដីកំណើតជិត១ខែ ។ ខ្ញុំនឹកស្រុកយើងណាស់ខុសពីរាល់ដង ដោយឃើញភាពរីកចម្រើនគ្រប់ផ្នែក ពិសេសវិស័យសិល្បៈ។ មិននឹកស្មានលោកជំទាវម៉ែន សំអនពេលណាត់នាងខ្ញុំជួប គឺគាត់រួសារាយ សាមញ្ញសំដីសម្ដៅគួរឲ្យគោរព ។ ជាពិសេសគាត់ចាត់ទុកនាងខ្ញុំជាកូនធម៌ ដែលនេះជាកិត្តិយសណាស់ ដោយមិននឹកស្មានថាមានថ្ងៃនេះឡើយជីវិតនាងខ្ញុំ ។
ទៅដល់កាណាដា ភ្លាមមានគេទាក់ទង ឲ្យវង្ស ម៉ាលីនច្រៀងនៅអាមេរិក នារដូលកាលចុងឆ្នាំ គឺក្នុងឱកាសបុណ្យ ធំៗ ។ នាងបានសម្រេចជ្រើសរើសគម្រោងសម្តែងតាមរដ្ឋនានារួចរាល់ហើយ ដើម្បីតបតាមការចង់ជួបរបស់ជនរួមជាតិខ្មែរនៅទីនោះ ។
បន្តចេញពីអាមេរិកវង្ស ម៉ាលីន ត្រៀមជួបបងប្អូននៅប្រទេសជប៉ុន ដោយការសម្តែងនៅទីនោះនាងយកពេលវេលាបានតែជាង១០ថ្ងៃប៉ុណ្ណោះ ព្រោះការងារច្រើនបន្តទៀត ។
យ៉ាងណាមិញនាងខ្ញុំនៅតែមិនភ្លេចកម្មវិធីប្រឡងចម្រៀងខ្មែរជាសាកលដែលបង្កើតឡើងក្នុងន័យថែរក្សាមរតកសិល្បៈពីដើម។ បើមិនមានកម្មវិធីនោះទេនាងខ្ញុំក៏គ្មានគេស្គាល់ចាប់អារម្មណ៍ដែរ ។ ភាពជោគជ័យដែលទទួលបាននេះធ្វើឲ្យនាងខ្ញុំបែរជាស្រពោនចិត្តព្រោះនាងខ្ញុំចង់ឲ្យលោកឪពុកបានឃើញស្នាដៃកូនស្រីធ្វើបាន ។ ប៉ុន្តែនាងខ្ញុំបែរជាបាត់បង់លោកឪពុកមិនបានតបសងគុណអ្វីច្រើនសល់តែម្តាយ ។ នាងខ្ញុំមានតែការធ្វើបុណ្យឧទ្ទិសកុសលជូនលោកឪពុកឲ្យញឹកញាប់ និងព្យាយាមមើលថែអ្នកម្តាយឲ្យបានល្អមិនឲ្យដួងវិញ្ញាណក្ខន្ឋលោកឪពុកអស់សង្ឃឹមឡើយ ៕
ប្រភព៖ កោះសន្តិភាព