Google បង្កើតគោលការណ៍ថ្មីដើម្បីបញ្ឈប់ផ្ទាំងពាណិជ្ជកម្មដែលទាក់ទងនឹងនយោបាយ

បរទេស៖ កាលពីថ្ងៃពុធម្សិលមិញនេះ​ Google បានប្រកាសថាខ្លួននឹងមានការកំណត់លើការផ្សព្វផ្សាយពាណិជ្ជកម្មដែលទាក់ទងនឹងនយោបាយនៅប៉ុន្មានខែខាងមុខនេះ។ អនុប្រធានផ្នែកគ្រប់គ្រងផលិតផលនិងការផ្សព្វផ្សាយរបស់ Google លោក Scott Spencer​ បានប្រកាសនៅលើប្លក់(Blog)មួយថា ក្រុមហ៊ុននឹងបញ្ឈប់ការផ្សព្វផ្សាយពាណិជ្ជកម្មទាំងឡាយណាដែលទាក់ទងនឹងរឿងនយោបាយដូចជាសម្ព័ន្ធភាពនយោបាយរបស់ពួកគេ ឬបញ្ជីបោះឆ្នោតជាសាធារណៈទៅកាន់អតិថិជនរបស់ខ្លួន។  ប៉ុន្តែអ្នកផ្សព្វផ្សាយនយោបាយទាំងនោះនៅតែអាចដាក់ពាណិជ្ជកម្មរបស់ខ្លួនទៅកាន់អ្នកបោះឆ្នោត​ ដោយធ្វើការកំណត់អាយុ ភេទ លេខកូដតំបន់ ប៉ុន្តែមិនអាចកំណត់ទីតាំងច្បាស់លាស់ឲ្យពាណិជ្ជកម្មត្រូវតែឃើញនោះទេ។

ពាណិជ្ជកម្មដែលទាក់ទងនឹងរឿងសេដ្ឋកិច្ចគឺមិនចោទជាបញ្ហាទេ នៅពេលដែលអ្នកប្រើប្រាស់របស់ខ្លួនកំពុងតែអាន មើល ឬនិយាយរឿងដែលទាក់ទងនឹងសេដ្ឋកិច្ច។ ការផ្លាស់ប្ដូរទាំងនេះនឹងចាប់ផ្ដើមមុនគេនៅក្នុងចក្រភពអង់គ្លេស មុនពេលការឃោសនារកសំឡេងឆ្នោតចាប់ផ្ដើមនៅបំណាច់ឆ្នាំនេះ ហើយនឹងត្រូវដាក់ឲ្យអនុវត្តទូទាំងពិភពលោកនៅថ្ងៃទី៦ខែមករាឆ្នាំ២០២០។ កាលពីខែតុលាកន្លងទៅនេះ លោក Jack Dorsey ដែលជានាយក​ប្រតិបត្តិរបស់ Twitter បានប្រកាសថាក្រុមហ៊ុនរបស់់ខ្លួននឹងធ្វើការបញ្ឈប់ពាណិជ្ជកម្មដែលទាក់ទងនឹងនយោបាយនៅលើ Twitter ដែលចាប់ផ្ដើមពីថ្ងៃទី២២ខែវិច្ឆិកានេះតទៅ៕