រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានបើកបររថយន្ត១គ្រឿងទាំងការភិយភ័យសំដៅចូលទៅកាន់សាលាសង្កាត់ចោមចៅ៣ ដើម្បីឲ្យអាជ្ញាធរជួយ បន្ទាប់ពីមានសត្វពស់ថ្លាន់១ក្បាលទំហំប៉ុនក.ដៃមនុស្សចាស់លូនចូលទៅសម្ងំនៅក្នុងរថយន្តរបស់គាត់មិនដឹងថា ចូលតាំងពីពេលណាឡើយ លុះពេលកំពុងបើករថយន្តតាមផ្លូវចេញពីផ្ទះបន្តិច ទើបប្រទះឃើញពស់នេះក្នុងរថយន្តតែម្តង បង្កឲ្យមានការភ្ញាក់ផ្អើល កាលពីម៉ោង១០ព្រឹក ថ្ងៃទី១៩ ខែវិច្ឆិកា ឆ្នាំ២០១៩ នៅក្នុងសាលាសង្កាត់ចោមចៅ៣ នៅតាមបណ្ដោយផ្លូវជាតិលេខ៤ ក្នុងភូមិព្រៃព្រីងខាងត្បូង ខណ្ឌពោធិ៍សែនជ័យ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសេចក្តីរាយការណ៍បន្តថា រថយន្តដែលត្រូវពស់ថ្លាន់លូនចូលទៅសម្ងំនោះម៉ាក TOYOTA RAV4 ពណ៌ស្លែ ពាក់ស្លាកលេខភ្នំពេញភ្នំពេញ 2R-6262 ហើយម្ចាស់មិនបានប្រាប់ឈ្មោះឡើយ គ្រាន់តែប្រាប់ថា គាត់ជាអ្នករស់នៅក្នុងភូមិព្រៃព្រីងខាងត្បូង២ តែប៉ុណ្ណោះ។
បើតាមបុរសជាម្ចាស់រថយន្តរូបនេះនិយាយប្រាប់ឲ្យដឹងថា គាត់មិនបានដឹងថា ពស់ថ្លាន់នេះលូនចូលទៅសម្ងំនៅក្នុងរថយន្តរបស់គាត់តាំងពីពេលណាមកនោះទេ ហើយនៅព្រឹកថ្ងៃកើតហេតុ គាត់បានបើករថយន្តចេញពីផ្ទះនៅក្នុងភូមិព្រៃព្រីងត្បូង២ ជិតសាលសង្កាត់ចោមចៅ៣ ដែរ។ ហើយពេលពេលចូលបើកដំបូង គាត់អត់បានឃើញពស់ថ្លាន់នេះឡើយ លុះពេលបើកចេញផុតពីផ្ទះ ស្រាប់តែឃើញពស់នេះនៅក្រោមពូករថយន្តតែម្តង។
ប្រភពដដែលបន្តថា ខណៈនោះគាត់មានការភ័យខ្លាចខ្លាំងណាស់ ហើយដោយសារតែជ្រុលហួសទៅហើយ ទើបបន្តដំណើរសំដៅចូលទៅកាន់សាលាសង្កាត់ចោមចៅ៣ ដើម្បីឲ្យអាជ្ញាធរជួយចាប់វាចេញពីក្នុងរថយន្ត និងប្រគល់ជូនខាងក្រុមអភិក្សសត្វព្រៃតែម្ដង។
ដោយឡែកខាងមន្ត្រីអភិរក្សសត្វព្រៃ ក៏បានទៅទទួលយកពស់នោះភ្លាមៗដែរ និងបានបញ្ជាក់ថា ពួកគាត់ធ្លាប់បានទទួលយកពស់ថ្លាន់ដែលប្រជាពលរដ្ឋខណ្ឌពោធិ៍សែនជ័យ ចាប់បានចំនួន១០៤ក្បាលមកហើយ ដោយបានយកទៅលែងនៅឯសួនសត្វភ្នំតាម៉ៅ។
ទាក់ទងនឹងបញ្ហាខាងលើនេះ អាជ្ញាធរបាននិយាយថា បច្ចុប្បន្នខណ្ឌពោធិ៍សែនជ័យ គឺជាតំបន់អភិវឌ្ឍន៍មានការចាក់ដីលុបបឹងប្រឡាយ ត្រពាំងទឹក ព្រៃ និងថ្លុក ដែលជាជម្រកសត្វពស់ និងមច្ឆាផ្សេងៗ ដូច្នេះហើយទើបពួកវាគ្មានកន្លែងរស់នៅដូចមុន ក៏លូនចេញ ហើយឲ្យតែមានកន្លែងចូលបាន គឺវាលូនចូលហើយ ជាក់ស្ដែងដូចជាការលូនចូលក្នុងរថយន្តរបស់សត្វពស់នេះជាដើម៕
ប្រភព៖ កោះសន្តិភាព