ខេត្តកំពង់ចាម ៖ អគ្គិភ័យបានឆាបឆេះផ្ទះមួយខ្នងយ៉ាងសន្ធោសន្ធៅ ខណៈម្ចាស់មិននៅ បណ្តាលឱ្យរងការខូចខាតខ្ទង់រាប់ម៉ឺនដុល្លារ ហើយបង្កការភ្ញាក់ផ្អើលដល់ប្រជាពលរដ្ឋ និងរថយន្តពន្លត់អគ្គីភ័យចេញមកជួយអន្តរាគមន៍បាញ់ទឹកពន្លត់ជាបន្តបន្ទាប់ចំនួន៦គ្រឿង ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សហេតុការណ៍ខាងលើនេះបានកើតឡើងកាលពីវេលាម៉ោង៩និង៥០នាទីយប់ថ្ងៃទី១៧ ខែវិច្ឆិកា ឆ្នាំ២០១៩ នៅចំណុចផ្ទះមួយកន្លែងស្ថិតក្នុងភូមិស្ពឺកើត ឃុំស្ពឺ ស្រុកចំការលើ។
ម្ចាស់ផ្ទះរងគ្រោះឈ្មោះ មុត សំណាង ភេទប្រុស ហៅឌុក រស់នៅក្នុងភូមិឃុំកើតហេតុខាងលើ ។
លោកឧត្តមសេនីយ៍ត្រី មិន សុគន្ធវិបុល ស្នងការរងនគរបាលខេត្ត បានឲ្យដឹងថា មុនពេលកើតហេតុ គេឃើញភ្លើងកំពុងតែឆេះតាមបង្អួចផ្ទះកើតហេតុខាងលើ ហើយត្រូវបានអ្នកជិតខាងភូមិផងរបងជាមួយក៏ប្រញាប់ទូរស័ព្ទទៅប្រាប់ម្ចាស់ផ្ទះដែលទៅចូលរួមកម្មវិធីគេនៅក្នុងភូមិឲ្យបានដឹង និងប្រញាប់មកផ្ទះជាបន្ទាន់។
លោកស្នងការរងនគរបាលខេត្តបានបន្តឱ្យដឹងថា មុនដំបូងមានរថយន្តពន្លត់អគ្គិភ័យរបស់អធិការរដ្ឋាននគរបាលស្រុកចំការលើ១គ្រឿងបានចេញមកអន្តរាគមន៍បាញ់ទឹកពន្លត់មុនគេ បន្ទាប់មកលោកឧត្តមសេនីយ៍ទោឯម កុសល ស្នងការនគរបាលខេត្តបានបញ្ជាឲ្យរថយន្តពន្លត់អគ្គីភ័យចេញទៅជួយអន្តរាគមន៍ជាបន្តបន្ទាប់ ក្នុងនោះមានរថយន្តពន្លត់អគ្គិភ័យរបស់ស្រុកស្ទឹងត្រង់ចំនួនមួយគ្រឿង, រថយន្តពន្លត់អគ្គិភ័យរបស់ស្នងការខេត្តចំនួន៣គ្រឿង និងរថយន្តពន្លត់អគ្គិភ័យរបស់ស្រុកកំពង់សៀមចំនួន១គ្រឿង ។ ក្នុងហេតុការណ៍ខាងលើនេះ មិនបណ្ដាលឱ្យភ្លើងរាលដាលឆេះទៅដល់ផ្ទះរបស់អ្នកភូមិផ្សេងទៀតឡើយ។
ពេលគ្រោះអគ្គិភ័យខាងលើនេះកើតឡើង កម្លាំងសមត្ថកិច្ចបានយកចិត្តទុកដាក់ក្នុងនោះបានចុះទៅដល់ផ្ទះកើតហេតុ និងជួយអន្តរាគមន៍បាញ់ទឹកពន្លត់ ដោយប្រើប្រាស់ទឹកអស់ចំនួន១៣រថយន្ត ទើបភ្លើងរលត់ជាស្ថាពរនៅវេលាម៉ោង១១យប់ថ្ងៃដដែល ហើយក៏មិនមានប្រជាពលរដ្ឋណាម្នាក់រងរបួស ឬគ្រោះថ្នាក់ឡើយ។ ចំណែកមូលហេតុគឺបណ្ដាល មកពីឆ្លងចរន្តអគ្គិសនី ។ ចំពោះទំហំនៃការខូចខាតរួមមាន ផ្ទះមួយខ្នងទំហំ៨ម៉ែត្រគុណនឹង១៦ម៉ែត្រ ធ្វើអំពីឈើ ប្រក់ក្បឿង ត្រូវភ្លើងឆេះរងការខូចខាតទាំងស្រុង រីឯទ្រព្យសម្បត្តិដែលបាត់បង់រួមមាន មាសទម្ងន់៣តម្លឹង, ប្រាក់ដុល្លារ៥៨.០០០ដុល្លារ, គ្រឿងសង្ហារឹម និងសម្ភារមួយចំនួនទៀត ។
ពាក់ព័ន្ធនឹងករណីខាងលើ លោកឧត្តមសេនីយ៍ស្នងការនគរបាលខេត្តក៏បានសំណូមពរដល់ប្រជាពលរដ្ឋត្រូវបង្កើនការប្រុងប្រយ័ត្នខ្ពស់មុនពេលចាកចេញពីលំនៅដ្ឋានត្រូវតែពន្លត់ភ្លើងចង្ក្រានបាយឲ្យអស់ និងបិទហ្គាស ព្រមទាំងបិទកុងតាក់ភ្លើងផងដែរ ចៀសវាងកុំឲ្យមានការឆ្លងចរន្តអគ្គិសនីកើតឡើងជាយថាហេតុណាមួយ ។ សូមបងប្អូនបង្កើនការប្រុងប្រយ័ត្នទាំងអស់គ្នា ៕
ប្រភព៖ កោះសន្តិភាព
Bong I.T