ខេត្តកំពង់ចាម ៖ សេចក្តីរាយការណ៍បឋមបានឲ្យដឹងថា ខឿនច្រាំងទន្លេសាងសង់ពីបេតុងនៅក្រោយប៉ុស្តិ៍រដ្ឋបាល និងសាលាសង្កាត់កំពង់ចាមបានបាក់ស្រុត នៅព្រលប់ថ្ងៃទី១៦ វិច្ឆិកានេះ ដែលមានទីតាំងស្ថិតនៅក្នុងភូមិទី១៥ សង្កាត់កំពង់ចាម ក្រុងកំពង់ចាម ដែលមានប្រវែងបណ្ដោយប្រមាណជា៥០ម៉ែត្រ បង្កឲ្យមានសេចក្តីកង្វល់ខ្លាចរលំបាក់សំណង់អគារសាលាសង្កាត់កំពង់ចាម ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមរបាយការណ៍របស់លោកប្លោក សុវណ្ណ ចៅសង្កាត់កំពង់ចាមចុះថ្ងៃទី១៧ វិច្ឆិកានេះ ដោយបានរៀបរាប់ឲ្យដឹងថា ក្នុងពេលដែលទឹកទន្លេមេគង្គបានចាប់ផ្ដើមស្រកទៅវិញកាល ពីថ្ងៃទី២៥ តុលា កន្លងទៅបណ្ដាលឲ្យបាក់ស្រុតដីម្ដង ។ ហើយដោយមានការអន្តរាគមន៍របស់ឯកឧត្តម អ៊ុន ចាន់ដា អភិបាលខេត្តបានអញ្ជើញចុះមកពិនិត្យភ្លាមៗត្រូវបានកម្លាំងរបស់ក្រសួងធនធានទឹក និងឧតុនិយមបានចុះមកអន្តរាគមន៍ដោយបូមខ្សាច់និងច្រកខ្សាច់ក្នុងថង់បានទប់ច្រាំងមិនឲ្យបាក់ ។ របាយការណ៍របស់លោកចៅសង្កាត់កំពង់ចាម បានឲ្យដឹងទៀតថា បន្ទាប់ពីនោះមកខឿនបេតុងច្រាំងទន្លេបានទ្រេតបន្តិចម្តងៗរហូតមកដល់ល្ងាចថ្ងៃទី១៦ វិច្ឆិកា ២០១៩ ខឿនបេតុងត្រូវបានរលំបាក់ជាហេតុបង្កឲ្យមានក្តីកង្វល់ខ្លាចសំណង់អគារបេតុងសាលាសង្កាត់កំពង់ចាម រួម និងប៉ុស្តិ៍រដ្ឋបាលត្រូវបាក់ជាយថាហេតុ ។
ជាមួយនោះមានសំណូមពរពីចំណុច១-សុំអន្តរាគមន៍ជួសជុលច្រាំងទន្លេជាបន្ទាន់ តាមដែលអាចធ្វើបាន ដើម្បីជួយសង្គ្រោះអគាររដ្ឋបាលសង្កាត់ ។ ២-ក្នុងករណីចាំបាច់ខ្ញុំបាទសូមស្នាក់ការសង្កាត់ទៅកាន់ស្នាក់ការគណបក្សប្រជាជនសង្កាត់ ឬសុំចង់ឲ្យបង្ហាញពីថ្នាក់លើចំពោះទីតាំងណាមួយដែលសមស្របដែលជាអគាររបស់រដ្ឋ ដើម្បីប្រក្រតីភាពការងាររដ្ឋបាលសង្កាត់ជាបណ្ដោះអាសន្ន សូមលោកអភិបាលក្រុងកំពង់ចាមជួយអន្តរាគមន៍ ។
លោកចាន់ ផល្លី អភិបាលក្រុងកំពង់ចាមមានប្រសាសន៍ឲ្យដឹងនៅល្ងាចថ្ងៃទី១៧ វិច្ឆិកានេះថា បន្ទាប់ពីទទួលដំណឹងបាក់ខឿនច្រាំងទន្លេនៅក្រោយសាលាសង្កាត់កំពង់ចាម ឯកឧត្តមអ៊ុន ចាន់ដា អភិបាលខេត្ត និងប្រធានក្រុមប្រឹក្សាខេត្ត ព្រមទាំងសហការីបានអញ្ជើញចុះមកពិនិត្យដោយផ្ទាល់ និងបានរកដំណោះស្រាយជាបន្ទាន់ ។ ក្នុងនោះអាចនឹងត្រូវប្រើប្រាស់ថវិកាខេត្ត ដើម្បីយកមកសាងសង់ខឿនច្រាំងទន្លេឡើងវិញ សម្រាប់សំណង់អគារសាលាសង្កាត់កំពង់ចាមមិនឲ្យរលំបាក់ ហើយក៏ជាអត្ថប្រយោជន៍សម្រាប់ទប់ទឹកទន្លេមិនឲ្យហូរមកចូលជន់លិចក្រុងកំពង់ចាមផងដែរ ។
សូមបញ្ជាក់ថា ក្រោយពីកើតមានគ្រោះធម្មជាតិបាក់ច្រាំងនៅក្នុងឃុំពាមកោះស្នា ស្រុកស្ទឹងត្រង់ ក្រោមកិច្ចសហការក្រសួងធនធានទឹកបានទុកច្រាំងទន្លេមិនឲ្យបាក់ស្ពានបេតុងព្រែកគៀនជ្រៃ ក្នុងស្រុកកំពង់សៀម និងច្រាំងទន្លេក្រុងកំពង់ចាម គឺឯកឧត្តមអ៊ុន ចាន់ដា អភិបាលខេត្តកំពង់ចាមបានយកចិត្តទុកដាក់មិនថា យប់ ឬថ្ងៃនោះទេ គឺបានចុះពិនិត្យដោយផ្ទាល់ និងមានវិធានការអន្តរាគមន៍សង្គ្រោះបានទាន់ពេលវេលាធ្វើឲ្យប្រជាពលរដ្ឋមានក្តីសប្បាយរីករាយ និងសាទរ ៕
ប្រភព៖ កោះសន្តិភាព