រាជធានីភ្នំពេញ ៖ រថយន្តម៉ាកតូយ៉ូតាព្រុស១គ្រឿងបើកបរដោយបុរសម្នាក់ និងមានអ្នករួមដំណើរ ចំនួន៤នាក់ទៀតខណៈកំពុងបើកបរធ្វើដំណើរក្នុងល្បឿនលឿនស្រាប់តែវាក់ជាមួយរថយន្រ១គ្រឿងផ្សេងទៀតនៅខាងមុខ ក៏បានខំបើកគេចចេញ ធ្វើឲ្យរេចង្កូតធ្លាក់ផ្លូវហើយជ្រុលទៅបុកបង្គោលភ្លើង បំភ្លឺផ្លូវ១ដើម នៅមាត់ប្រឡាយបណ្ដាលឲ្យបាក់ស្ទើររលំដល់ដី។ មិនតែប៉ុណ្ណោះបើតាមការសង្កេត មើលទិដ្ឋភាពជាក់ស្ដែងបើកុំតែបានបង្គោលភ្លើងបំភ្លឺផ្លូវនោះជួយទប់កុំអីរថយន្តនោះត្រូវក្រឡាប់ធ្លាក់ចូលទៅក្នុងប្រឡាយទឹកស្អុយ ហើយអាចបណ្ដាលឲ្យអ្នកបើកបរព្រមទាំងអ្នករួមដំណើរ ជួបគ្រោះថ្នាក់ធំ បាត់ទៅហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សឧប្បត្តិហេតុនេះបានកើតឡើងកាលពីវេលាម៉ោង១ និង២០នាទីរសៀល ថ្ងៃទី១៦ ខែវិច្ឆិកា ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចមុខបុរីសែនមនោរម្យ ស្ថិតនៅក្នុងភូមិ កន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ។ រថយន្តម៉ាកតូយ៉ូតាព្រូស១គ្រឿងនេះ ពណ៌ស ពាក់ស្លាកលេខ ភ្នំពេញ 2BA-4802 បើកបរដោយបុរសម្នាក់មិនស្គាល់អត្តសញ្ញាណ និងមានអ្នករួមដំណើរជាមួយប្រុសស្រីចំនួន៤នាក់ទៀតផងដែរ។
តាមប្រភពព័ត៌មានបានឲ្យដឹងថា នៅមុនពេលកើតហេតុបានឃើញរថយន្តនេះបើកបរធ្វើដំណើរតាមផ្លូវជាតិលេខ៤ ក្នុងទិសដៅពីលិច ទៅកើតក្នុងល្បឿនលឿន ខណៈពេលទៅដល់ត្រង់ចំណុចកើតហេតុខាងលើ បានវាក់ជាមួយរថយន្ត ១គ្រឿងផ្សេងទៀតនៅខាងមុខ។ ពេលនោះបានអ្នកបើកបរបានកាច់ចង្កូតគេចចេញពីរថយន្ត ខាងមុខនោះទើបបណ្ដាលឲ្យរេចង្កូតធ្លាក់ផ្លូវជ្រុលទៅបុកបង្គោលភ្លើងបំភ្លឺផ្លូវពេញទំហឹង។
បណ្ដាលឲ្យបង្គោលភ្លើងនោះបាក់ស្ទើរដួលរលំរាបដល់ដី ហើយរថយន្តព្រុសនេះវិញ បើកុំតែបានបង្គោលភ្លើងនោះទប់កុំអីត្រូវក្រឡាប់ចូលទៅក្នុងប្រឡាយទឹកហើយអ្នកបើកបររួមជាមួយអ្នករួមដំណើរចំនួន៤នាក់ទៀតមានគ្រោះថ្នាក់ជាមិនខានឡើយ។ ក្រោយពេលកើតហេតុនគរបាលប៉ុស្តិ៍ កន្ទោកបានចុះទៅកាន់កន្លែងកើតហេតុឃាត់អ្នកបើកបរ និងរថយន្តនោះទុករួចទំនាក់ទំនងទៅកាន់ នគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះទៅពិនិត្យ ជាក់ស្ដែង ព្រមទាំងនាំយករថយន្ត និងអ្នកបើកបរទៅសាកសួររង់ចាំការដោះស្រាយតាមច្បាប់៕