គន្លឹះងាយៗ គ្រាន់តែ​ follow មគ្គទេសក៍ ប្រចាំតំបន់នៅលើ Google Maps អ្នកអាចដើរលេងក្នុងទីក្រុងមួយបានយ៉ាងងាយ

បរទេស៖ បើសិនជាអ្នកទៅដល់ទីកន្លែងណាមួយដែលអ្នកមិនធ្លាប់ទៅពីមុន កុំបារម្មណ៍ Google មានគន្លឹះងាយៗចង់បង្ហាញ។ អ្វីដែលអ្នកត្រូវធ្វើនោះគឺស្វែងរកកំពូលមគ្គទេសក៍ ប្រចាំតំបន់(Top Local Guides)នៅលើ Google Maps ដើម្បីដឹងថាកន្លែងណាដែលអ្នកគួរតែទៅ។ បន្ទាប់មកត្រូវចុចពាក្យ “Follow” ទៅកាន់ពួកគាត់ដើម្បីមើលការផ្ដល់យោបល់សម្រាប់អ្នកនិងទីកន្លែងនៅលើផែនទីដែលអ្នកអាចជ្រើសរើសដោយខ្លួនឯង។ បើអ្វីគ្រប់យ៉ាងដំណើរការបានយ៉ាងស្រួល​ អ្នកអាចស្វែងរកកន្លែងល្អបំផុតសម្រាប់ញុំាអាហារនៅក្នុងទីក្រុងដែលអ្នកមិនស្គាល់អ្វីទាំងអស់ ទាំងនេះក៏ដោយសារមគ្គទេសក៍ ប្រចាំតំបន់ស្គាល់ភូមិសាស្ត្រច្បាស់។

ការធ្វើតេស្តសាកល្បងមុខងារនេះនឹងចាប់ផ្ដើមក្នុងពេលឆាប់ៗនៅក្នុងទីក្រុងទាំង៩នេះដូចជា​ បាងកក ដេលី​  ឡុងដ៍  ម៉ិចស៊ីកូ ញូវយ៉ក អូសាកា សានហ្វ្រេនស៊ីស្កូ សៅប៉ូឡូ និងតូក្យូ។  ប្រហែលជាវាត្រូវចំណាយពេលយូរបន្តិចហើយក្នុងការស្វែងរកមគ្គទេសក៍ ដែលសាកសមសម្រាប់អ្នកនៅក្នុងតំបន់ដែលអ្នកចង់ទៅ។ ថ្វីត្បិតតែអ្នកចំណាយពេលយូរដើម្បីស្វែងរកមគ្គទេសក៍ឆ្នើម​ តែវាប្រសើរជាងការជឿជាក់លើផ្កាយដែលគេវាយតម្លៃ (Review) ទៅលើភោជនីយដ្ឋានមួយចំនួនដែរ៕