អ្នកដឹកជញ្ជូនអាហារម្នាក់ ដាល់សន្ដិសុខពីរនាក់ចំកណ្ដាលមុខ ព្រោះតែមិនចង់យឺតពេលក្នុងការដឹកជញ្ជូន (មានវីដេអូ)

ចិន៖ ថ្មីៗកន្លងទៅនេះ បុរសម្នាក់ដែលជាអ្នកដឹកជញ្ជូនអាហារនៅឯប្រទេសចិន បានដាល់សន្ដិសុខពីរនាក់ចំកណ្ដាលមុខ ព្រោះតែមិនចង់យឺតពេលក្នុងការដឹកជញ្ជូនទៅឲ្យអតិថិជន។

ប្រភពបានឲ្យដឹងថា អ្នកដឹកជញ្ជូនអាហារទាំងអស់នៅក្នុងប្រទេសចិន ត្រូវតែបំពេញឈ្មោះជាមុនសិន ទើបអាចអនុញ្ញាតឲ្យចូលក្នុងតំបន់លំនៅដ្ឋានរបស់អតិថិជនបាន។ សម្រាប់យានជំនិះត្រូវបានហាមឃាត់មិនឲ្យជិះចូលផងដែរ។ នៅក្នុងថ្ងៃកើតហេតុ អ្នកដឹកជញ្ជូនអាហាររូបនោះ (មិនបញ្ចេញអត្តសញ្ញាណ) ត្រូវបានសន្ដិសុខស្នើសុំឲ្យបំពេញឈ្មោះ និងធ្វើដំណើរដោយថ្មើរជើងក្នុងការយកអាហារទៅឲ្យអតិថិជន។

បើទោះបីជាយ៉ាងណាក្ដី អ្នកដឹកជញ្ជូននោះបានបដិសេធ មិនព្រមចុះពីលើម៉ូតូ ព្រោះគាត់មានពេលត្រឹមតែ២នាទីទៀតប៉ុណ្ណោះក្នុងការដឹកជញ្ជូន។ សន្ដិសុខបានព្យាយាមហាមឃាត់ ស្រាប់តែអ្នកដឹកជញ្ជូនផ្ទុះកំហឹង បានដាល់សន្ដិសុខនោះចំកណ្ដាលមុខ បណ្ដាលឲ្យដួលសន្លប់ទៅលើដីភ្លាមៗ។

ប្រភពបានបន្ដថា បន្ទាប់ពីប្រគល់អាហារទៅឲ្យអតិថិជនរួចមក អ្នកដឹកជញ្ជូនបម្រុងនឹងចាកចេញ ស្រាប់តែមានសន្ដិសុខម្នាក់ទៀតបានមកដល់ដោយព្យាយាមចាប់ឃាត់ខ្លួន។ អ្នកដឹកជញ្ជូនបានចុះពីលើម៉ូតូ រួចស្ទុះទៅវាយ និងដាល់សន្ដិសុខចំផ្ទៃមុខជាច្រើនដៃ បណ្ដាលឲ្យសន្ដិសុខដួលទៅលើដី។

យ៉ាងណាមិញ ប៉ូលិសបានចុះទៅដល់ទីតាំងកើតហេតុផ្ទាល់ ចាប់ខ្លួនអ្នកដឹកជញ្ជូន ក្រោយពីទទួលបានការរាយការណ៍ពីអ្នកដែលរស់នៅក្នុងតំបន់នោះ។ អ្នកដឹកជញ្ជូនត្រូវបានចោទប្រកាន់ពីបទបង្ករបួសដោយចេតនា ខណៈពេលដែលការស៊ើបអង្កេតកំពុងបន្ត។ សន្តិសុខទី១ទទួលរងការបាក់ឆ្អឹងថ្គាម ចំណែកសន្ដិសុខទី២រងការបាក់ឆ្អឹងត្រង់មេដៃខាងស្តាំ និងកំំពុងសម្រាកព្យាបាលនៅក្នុងមន្ទីរពេទ្យ៕

សូមទស្សនារូបភាពនិងវីដេអូខាងក្រោម៖