ឡូយមែន! ក្រុមហ៊ុន IBM នឹងចាប់ផ្តើមប្រព័ន្ធព្យាករណ៍អាកាសធាតុលឿនជាងមុនគ្របដណ្តប់លើពិភពលោក

បរទេស៖ ក្រុមហ៊ុនបច្ចេកវិទ្យា IBM បាននិយាយកាលពីថ្ងៃព្រហស្បតិ៍ថា ខ្លួននឹងចាប់ផ្តើមប្រព័ន្ធព្យាករណ៍អាកាសធាតុថ្មីមួយ ដែលអាចព្យាករណ៍លក្ខខណ្ឌរហូតដល់១២ម៉ោងមុន និងគ្របដណ្ដប់លើផ្នែកខ្លះនៃពិភពលោក។

តម្រូវការនៃការព្យាករណ៍អាកាសធាតុច្បាស់លាស់ និងលឿនជាងមុនបានកើនឡើងនៅពេលដែលមានលក្ខខណ្ឌកាន់តែធ្ងន់ធ្ងរ មូលហេតុគឺដោយសារតែការប្រែប្រួលអាកាសធាតុ។ ប្រព័ន្ធនេះត្រូវបានគេហៅថា GRAF របស់ក្រុមហ៊ុន IBM ដែលជាប្រព័ន្ធព្យាករណ៍កម្រិតខ្ពស់សម្រាប់ដំណោះស្រាយបរិយាកាសពិភពលោក ហើយវាដំណើរការដោយម៉ាស៊ីន Supercomputer ដែលអាចផ្តល់នូវការព្យាករណ៍បានលម្អិត និងគុណភាពខ្ពស់ជាងមុន។

​ប្រព័ន្ធព្យាករណ៍អាកាសធាតុថ្មីរបស់ក្រុមហ៊ុន IBM នឹងផ្តល់ទិន្នន័យគ្របដណ្តប់លើពិភពលោករួមមាន អាស៊ី អាហ្រ្វិក អាមេរិកខាងត្បូង និងតំបន់មួយចំនួនទៀត ដែលងាយនឹងរងឥទ្ធិពលពីការប្រែប្រួលអាកាសធាតុ។

ប្រព័ន្ធព្យាករណ៍អាកាសធាតុពិភពលោកបច្ចុប្បន្នគ្របដណ្តប់បានតែ ១០-១៥ គីឡូម៉ែត្រការ៉េ និងត្រូវធ្វើបច្ចុប្បន្នភាពរៀងរាល់ ៦ ទៅ ១២ ម៉ោងម្តង។  ប្រព័ន្ធថ្មីរបស់ក្រុមហ៊ុន IBM អាចព្យាករណ៍ចុះដល់ ៣ គីឡូម៉ែត្រការ៉េ និងធ្វើបច្ចុប្បន្នភាពរៀងរាល់ម៉ោង។

លោក Cameron Clayton ប្រធានក្រុមហ៊ុនអាកាសធាតុ ដែលជាក្រុមហ៊ុនបុត្រសម្ព័ន្ធរបស់​ IBM បានមានប្រសាសន៍ថា ការព្យាករណ៍កាន់តែប្រសើរឡើងអាចជាបដិវត្តសម្រាប់តំបន់មួយចំនួននៃពិភពលោកដូចជា សម្រាប់កសិករនៅជនបទប្រទេសឥណ្ឌា ឬ កេនយ៉ា។

លោកបានបន្ថែមទៀតថា ពីមុនមកយើងមិនដែលមានប្រព័ន្ធព្យាករណ៍អាកាសធាតុកម្រិតខ្ពស់ប្រើប្រាស់ទេ តែពេលនេះយើងអាចដឹងមុនពីគ្រោះធម្មជាតិមានព្យុះផ្គររន្ទះ ហើយជាពិសេសយើងអាចកំណត់ពេលវេលាក្នុងការដាំដុះ និងប្រមូលផលបានត្រឹមត្រូវ៕