ខេត្តកំពង់ធំ ៖ សេចក្តីរាយការណ៍បឋមបានឲ្យដឹងថា ដូនចាស់ម្នាក់សង្ស័យឡើងឈាមបានដួលទៅលើភ្នក់ភ្លើងឆេះស្លាប់ ហេតុការណ៍ភ្ញាក់ផ្អើលកាលពីព្រឹកថ្ងៃទី១៥ ខែវិច្ឆិកានេះស្ថិតនៅភូមិគោកស្រុក ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសេចក្តីរាយការណ៍បានបន្តថា សពលោកយាយរងគ្រោះខាងលើឈ្មោះ ស៊ុន ពោ អាយុ៧៤ឆ្នាំ រស់នៅភូមិកើតហេតុខាងលើ ។
ពាក់ព័ន្ធនឹងករណីនេះលោក អ៊ុត វណ្ណារ៉ា អភិបាលស្រុកប្រសាទសំបូរមានប្រសាសន៍ប្រាប់ឲ្យកោះសន្តិភាពបានដឹងនៅរសៀលថ្ងៃដដែលនេះថា បន្ទាប់ពីលោកទទួលបានដំណឹងនេះលោកមានការសោកស្តាយ និងអាណិតអាសូរជាខ្លាំង នៅពេលដែលឈ្មោះ ហោ ជា ភេទស្រី អាយុ៣៥ឆ្នាំ ត្រូវជាកូនបង្កើតរបស់ជនរងគ្រោះប្រាប់ថា ម្ដាយនាងមានកើតរោគឡើងឈាម ហើយគាត់បានលេបថ្នាំរាល់ថ្ងៃ លុះដល់ម៉ោងប្រហែល៥និង១០នាទីព្រឹក ថ្ងៃកើតហេតុ នាង និងប្ដីបានលឺសំឡេងថ្ងូរ ពួកគេស្ទុះក្រោកពីដំណេករកមើលលើផ្ទះមិនឃើញម្តាយ ភ្លាមនោះនាងក៏បានរត់ចុះមកដីឃើញម្ដាយនាងដេកដួលនៅក្នុងភ្នក់ភ្លើងដែលដុតបំពួកមូសក្បែរក្រោលគោ និងទ្រុងជ្រូកមិនដឹងតាំងពីថ្មើរណាមកនោះទេ ឆេះមួយកំណាត់ខ្លួនឡើងរួញដៃរួញជើង តែនៅដង្ហើមតិច ភ្លាមនោះនាងបានស្រែកហៅប្ដី និងអ្នកជិតខាងមកជួយលើកយកម្តាយឡើងទៅលើផ្ទះបានប្រហែល៥នាទី គាត់ក៏បានដាច់ខ្យល់ស្លាប់ទៅនាងក៏ហៅបងប្អួនបង្កើតមកជុំគ្នាតែម្ដង ។
នៅពេលទទួលព័ត៌មានភ្លាម កម្លាំងជំនាញនគរបាលស្រុក និងនគរបាលប៉ុស្ដិ៍មានលោកគ្រូពេទ្យមណ្ឌលសុខភាពឃុំ លោកមេឃុំ លោកមេភូមិ និងក្រុមប្រឹក្សាឃុំរបស់លោកបានចុះដល់កន្លែងកើតហេតុ និងពិនិត្យសាកសពឃើញមានស្នាមភ្លើងឆេះមួយចំហៀងខ្លួន និងឆេះដៃ ជើងខ្លោចរួញទើបធ្វើការសន្និដ្ឋាន ការស្លាប់នេះដោយសារតែអាកាសធាតុរៀងត្រជាក់ផងនោះ ជនរងគ្រោះប្រហែលជាគាត់ចុះពីលើផ្ទះទៅអាំងភ្លើងតែម្នាក់ឯង ដោយមានជំងឺរាំរៃឡើងឈាមផង ជាហេតុធ្វើឲ្យគាត់ដួលទៅលើភ្នក់ភ្លឺងដែលកំពុងឆេះតិចៗនោះ ទោះបីជាគាត់រើបម្រាស់ក៏កម្រើកខ្លួនមិនរួច បណ្ដាលឲ្យយស្លាប់តែម្តង ដោយមិនពាក់ព័ន្ធបទល្មើសព្រហ្មទណ្ឌណាមួយឡើយ ហើយសពបានប្រគល់ជូនក្រុមគ្រួសារធ្វើបុណ្យតាមប្រពៃណី ៕
ប្រភព៖ កោះសន្តិភាព