រាជធានីផ្នំពេញ ៖ សេចក្តីរាយការណ៍បឋមបានឲ្យដឹងថា លំនៅឋាន២ខ្នងសង់ឡើងពីក្រោមថ្មលើឈើត្រូវអគ្គិភ័យឆាបឆេះបំផ្លាញអស់ហ្មត់គ្មានសល់ បង្កការភ្ញាក់ផ្អើលកាលពីវេលាម៉ោង៩ព្រឹក ថ្ងៃទី១៥ ខែវិឆ្ឆិកានេះ នៅចំណុចក្បែរហ្នឹងរោងចក្រស៊ីឡាំងហួរ ក្នុងភូមិត្នោតជ្រុំទី៤ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលំនៅឋាន២ខ្នងដែលត្រូវឆាបឆេះមានម្ចាស់ឈ្មោះទី១- អ៊ុច សុខហេង អាយុ៧២ឆ្នាំ និងទី២ មានម្ចាស់ឈ្មោះ ទូច សុខៈ អាយុ៣៩ឆ្នាំ ។
យោងតាមប្រភព័ត៌មាននៅកន្លែងកើតហេតុឲ្យដឹងថា មុនកើតហេតុ គឺមានការឆ្លងចរន្តអគ្គិសនីចេញពីប្រអប់ភ្លើង នៅមុខផ្ទះរបស់លោកយាយចំណាស់ឈ្មោះ អ៊ុច សុខហេង ខណៈដែលរូបគាត់កំពុងនៅផ្ទះម្នាក់ឯងក៏បង្កឲ្យមានជាអណ្តាតភ្លើងឆាបឆេះរាលដាលដល់លំនៅដ្ឋានលោកយាយ និងរីករាលដាលបន្តទៅដល់លំនៅឋាន១ខ្នងទៀត នៅជាប់នោះតែម្តង ខណៈលំនៅឋានមួយខ្នងទៀតនេះពុំមានម្ចាស់ផ្ទះនៅ ។
ភ្លាមៗ ក្រុមកម្លាំងអាជ្ញាធរ រួមជាមួយក្រុមរថយន្តពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ និងរថយន្តពន្លត់អគ្គិភ័យមកពីតាមបណ្តាអង្គភាពផ្សេងៗជាច្រើនទៀត បានចុះអន្តរាគមន៍ជាបន្តបន្ទាប់ទៅកន្លែងកើតហេតុ ដើម្បីធ្វើការបាញ់ទឹកទប់ស្កាត់អណ្តាតភ្លើង ។
ក្រោយការខិតខំព្យាយាមអស់ជាងកន្លះម៉ោងរួចមកអណ្តាតភ្លើងក៏ត្រូវបានរលត់ទៅវិញសូន្យសុង១០០ភាគរយ ដោយបានឆាបឆេះបំផ្លាញលំនៅដ្ឋានទាំង២ខ្នងផ្ទះអស់ហ្មត់ទាំងស្រុងតែម្តង ។
ចំណែកឯលំនៅដ្ឋានផ្សេងទៀតដែលនៅជាប់នោះក៏ត្រូវរងការឆាបឆេះដែរ ប៉ុន្តែមិនប៉ះពាល់ធ្ងន់ធ្ងរឡើយត្រឹមឆាបឆេះតិចតួចប៉ុណ្ណោះ ។ ក្នុងករណីអគ្គិភ័យខាងលើកម្លាំងចម្រុះ បានប្រើប្រាស់រថយន្តអគ្គិភ័យអស់១២គ្រឿង ក្នុងចំណោមរថយន្ត១៥គ្រឿង ដែលបានទៅដល់កន្លែងកើតហេតុ ៕
ប្រភព៖ កោះសន្តិភាព
Bong I.T