អបអរផង Lisa ជាប់ចំណាត់ថ្នាក់លេខ១ ជា«តារាស្រីមានសម្រស់ស្អាតបំផុតប្រចាំអាស៊ីឆ្នាំ២០១៩»!

កូរ៉េខាងត្បូង៖ ថ្វីត្បិតចូលប្រឡូកសិល្បៈទើបតែបាន៣ឆ្នាំក៏ពិតមែន ប៉ុន្តែតារាចម្រៀងស្រីវ័យ២២ឆ្នាំ Lalisa Manoban សមាជិកក្រុម BLACKPINK បានសាងកេរ្តិ៍ឈ្មោះរបស់ខ្លួនបានយ៉ាងល្បីល្បាញលើឆាកអន្តរជាតិ និងទទួលបានការស្រលាញ់គាំទ្រយ៉ាងច្រើនលើសលប់ ពីសំណាក់ទស្សនិកជនគ្រប់មជ្ឍដ្ឋាន ទូទាំងពិភពលោក ហើយជាពិសេសទៀតនោះ នាងក៏តែងតែទទួលបានសមិទ្ធិផលថ្មីៗ នៅក្នុងស្នាដៃសិល្បៈសម្រាប់ខ្លួនឯថែមទៀតផងដែរ។

ជាក់ស្តែង ក៏ដូចជាថ្មីៗនេះ Lisa ក៏ទើបតែទទួលបាននូវសមិទ្ធិផលថ្មីមួយទៀតសម្រាប់ខ្លួនឯង ដោយយោងតាម TC Candler Asia បានប្រកាសពីបញ្ជីឈ្មោះ តារាស្រីទាំង១០០នាក់ ដែលមានសម្រស់ស្រស់ស្អាតបំផុតនៅក្នុងទ្វីបអាស៊ី ប្រចាំឆ្នាំ២០១៩ «100 Most Beautiful Faces In Asia 2019 » ហើយនៅក្នុងចំណោមតារាស្រីទាំង១០០នេះផងដែរ Lisa គឺបានជាប់ចំណាត់ថ្នាក់លេខ១ ជាប់ជាតារាស្រីដែលមានសម្រស់ស្អាតជាងគេនៅអាស៊ី ដែលធ្វើឲ្យប្រិយមិត្តគាំទ្ររំភើបចិត្តរីករាយអបអរជាខ្លាំង។

ដោយឡែក ទន្ទឹមនឹងនេះផងដែរ គេសង្កេតឃើញថា សមាជិករួមក្រុមBLACKPINK ទាំង៣នាក់ផ្សេងទៀត ក៏បានជាប់ក្នុងបញ្ជីចំណាត់ថ្នាក់ស្រីស្អាតប្រចាំអាស៊ីនេះផងដែរ ដោយ Jennie បានជាប់ចំណាត់ថ្នាក់លេខ៣ Rosé ជាប់ចំណាត់ថ្នាក់លេខ ១៣ និង Jisoo ជាប់ចំណាត់ថ្នាក់លេខ ២២ ផងដែរ៕