ខេត្តបាត់ដំបង ៖ ជនត្រូវចោទក្នុងអំពើ«ប្លន់»២នាក់ ត្រូវបានកម្លាំងផ្នែកអនុវត្តដីកាចាប់ខ្លួនបានជាបន្ត បន្ទាប់ កាលពីថ្ងៃទី១២ វិច្ឆិកា ដែលស្ថិតនៅកន្លែងផ្សេងៗគ្នា ក្រោយពីពួកគេប្រព្រឹត្តបទល្មើស ហើយព្យាយាមរត់គេចខ្លួនអស់រយៈពេល១១ឆ្នាំ កន្លងទៅនេះ ។ លោកកង សុផាន់ណា នាយរងការិយាល័យព្រហ្មទណ្ឌកំរិតធ្ងន់ទទួលបន្ទុកក្រុមអនុវត្តដីកាបានឲ្យដឹងថា ជនត្រូវចោទទាំង២នាក់នោះ ម្នាក់ឈ្មោះវ៉ាន់ វ៉ែន អាយុ២៤ឆ្នាំ នៅភូមិព្រៃចែក ឃុំកំពង់ព្រះ ស្រុកសង្កែ និងម្នាក់ទៀតឈ្មោះវឿន អឿយ អាយុ៤២ឆ្នាំ នៅភូមិនរា២ ឃុំនរា ស្រុកសង្កែ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោកនាយរងការិយាល័យកំរិតធ្ងន់បានប្រាប់ថា ជនទាំង២នាក់ត្រូវកម្លាំងផ្នែកអនុវត្តដីកានៃអធិការនគរបាលស្រុកសង្កែចាប់ខ្លួនជាបន្តបន្ទាប់ តាមដីកាបង្គាប់ឲ្យចាប់ខ្លួនលេខ២៤៣ និង លេខ២៤៥ ចុះថ្ងៃជាមួយគ្នា ថ្ងៃទី២៦ មិថុនា ២០០៨ ដែលចេញដោយលោកគី ឬទ្ធី ចៅក្រមស៊ើបសួរ នៃសាលាដំបូងខេត្ត ដែលពាក់ព័ន្ធនឹងអំពើ«ប្លន់»។
បើតាមយោងតាមព្រឹត្តិហេតុរបស់សមត្ថកិច្ច និងតាមដីកាបង្គាប់ឲ្យចាប់ខ្លួន ជនត្រូវចោទឈ្មោះវ៉ាន់ វ៉ែន និងឈ្មោះវឿន អឿយ ត្រូវតំណាងអយ្យការអមសាលាដំបូងខេត្ត ចោទប្រកាន់ពីបទ«ប្លន់» ដែលប្រព្រឹត្តកាលពីថ្ងៃទី២០ ឧសភា ឆ្នាំ២០០៨ កន្លងទៅ។ ប៉ុន្តែក្រោយពីប្រព្រឹត្តបទល្មើសឧក្រិដ្ឋនេះ ពួកជនដៃដល់នេះ បានព្យាយាមរត់គេចខ្លួន ដែលសមត្ថកិច្ចស្ទើរតែភ្លេចនូវសំណុំរឿងនេះទៅហើយ តែនៅពេលប្រទះឃើញជនត្រូវចោទទាំង២នាក់ ដែលមានដីកាតាមចាប់ខ្លួនស្រាប់ផង ទើបតាមក្របួចកវាយខ្នោះបញ្ជូនទៅប្រគល់ជួនតុលាការតែម្ដង ។
លោកកង សុផាន់ណា នាយរងការិយាល័យព្រហ្មទណ្ឌកំរិតធ្ងន់បាននិយាយថា បើគិតត្រឹមថ្ងៃប្រព្រឹត្តបទល្មើសរហូតមកដល់ថ្ងៃចាប់ខ្លួននេះ មានរយៈពេល១១ឆ្នាំហើយ ។ លោកបានបញ្ជាក់ថា ក្រោយពីរត់គេចខ្លួនជនជាប់ចោទខ្លះបានត្រឡប់មកសម្ងំនៅក្នុងផ្ទះ និងជនខ្លះទិញតុតុរត់ឈ្មូលទាំងភ្នែកលើថ្ងាស លុះទាក់ភ្នែកសមត្ថកិច្ច ទើបក្របួចបានតែម្ដង។
ទោះយ៉ាងណា លោកកង សុផាន់ណា បានបញ្ជាក់ថា កម្លាំងផ្នែកអនុវត្តដីកា នៃការិយាល័យជំនាញ របស់លោកបានរៀបចំបញ្ជូនជនត្រូវចោទទាំង២នាក់ខាងលើ ទៅប្រគល់ជួនលោកចៅក្រមស៊ើបសួរនៅព្រឹកថ្ងៃទី១៣ វិច្ឆិកា នេះហើយ ដើម្បីចាត់ការតាមនីតិវិធី៕
ប្រភព៖ កោះសន្តិភាព
Bong I.T